ભારતમાં સોના અને ચાંદીના ભાવ નવી ઊંચી સપાટીએ. સોનું 7000 ડૉલરને આંબી શકે
સોનું આગામી મહિનાઓમાં ટ્રોય ઓંસદીઠ 7000 અમેરિકી ડૉલરની સપાટીને વળોટી જાય તેવી નિષ્ણાતોએ સંભાવના દર્શાવી
અમેરિકા અને યુરોપ વચ્ચે ગ્રીનલેન્ડ મુદ્દે ચાલતા તણાવને કારણે રોકાણકારો સુરક્ષિત રોકાણ તરીકે સોનાં-ચાંદીમાં રોકાણ કરવા તરફ વળ્યા છે. પરિણામે મંગળવારે વૈશ્વિક અને ઘરેલું બજારમાં બંને કિંમતી ધાતુઓના ભાવ નવા રેકોર્ડ સ્તરે પહોંચી ગયા છે.
વિશ્વ બજારની વાત કરવામાં આવે તો સોનાનો ભાવ પ્રતિ ઔંસ $4,700નો આંક પાર કરી ગયો છે. રાત્રે 7:30 વાગ્યે (IST) તે $4,732.05 પર સોનાના સોદાઓ પડ્યા હતા. ફેબ્રુઆરીમાં પૂરા થનારા સોનાના ફ્યુચર્સ COMEX પર $4,739.75નો ભાવ ક્વોટ થયો હતો.
ભારતમાં મુંબઈ સ્પોટ માર્કેટમાં સોનું પ્રતિ 10 ગ્રામ રૂ.1,47,409 પર બંધ રહ્યું હતું. બીજીતરફ MCX પર ફેબ્રુઆરી કોન્ટ્રાક્ટ રૂ.1,50,110 પર રહ્યા અને દિવસ દરમિયાન રૂ. 1,52,250 સુધી પહોંચ્યા હતા.
તેની સામે ચાંદી પ્રતિ ઔંસદીઠ ભાવ વિશ્વબજારમાં $95 પાર કરીને $95.36 સુધી પહોંચી ગયા છે. COMEX પર માર્ચ ફ્યુચર્સ $95.24ના ભાવ બોલાયા છે. મુંબઈ સ્પોટ માર્કેટમાં ચાંદી પ્રતિ કિલોગ્રામ રૂ. 3,09,345 પર બંધ આવ્યા છે. બીજીતરફ MCX પર માર્ચ કોન્ટ્રાક્ટ રૂ. 3.25 લાખ સુધી જઈને પછી રૂ. 3,24,524 પર બંધ આવ્યો છે.
શાંઘાઈમાં ચાંદી $105 નજીક
શાંઘાઈ ફ્યુચર્સ એક્સચેન્જ પર ચાંદી $104.26 પ્રતિ ઔંસ (23,358 યુઆન) પર ટ્રેડ થઈ હતી. આમ દિવસ દરમિયાન $105.87 (23,700 યુઆન) સુધી પહોંચી ગઈ હતી. તેમ છતાં, અમેરિકાની નાણાકીય સંસ્થા JP મોર્ગને ચેતવણી આપી છે કે ઉદ્યોગિક માંગ નબળી થવી, ETFમાંથી નાણાંનો ઉપાડ અને ચીનની કડક ટ્રેડિંગ નીતિઓને કારણે ચાંદીની કિંમતોમાં તીવ્ર સુધારો આવી શકે છે.
માઇનિંગ ઉદ્યોગના નિષ્ણાત ડેવિડ જેન્સને જણાવ્યું કે અમેરિકા અને યુરોપના ઘણા સ્ટોરોમાં ચાંદીની અછત જોવા મળી રહી છે.
LBMA સરવેમાં બહાર આવેલી વિગતો દર્શાવે છે કે 2026ની શરૂઆતથી અત્યાર સુધી સોનું લગભગ 10 ટકા અને ચાંદી લગભગ 33 ટકા વધી છે. પ્લેટિનમ $2,500 પ્રતિ ઔંસ આસપાસ ટ્રેડ થઈ રહ્યું છે અને તેમાં 18.5 ટકાનો વધારો થયો છે, જ્યારે પેલેડિયમ $1,890 પર રહીને 14 ટકા કરતાં વધુ વધ્યું છે. લંડન બુલિયન મર્ચન્ટ્સ એસોસિએશન (LBMA)ના વાર્ષિક સરવે મુજબ, વિશ્લેષકો માને છે કે 2026 દરમિયાન સોનું, ચાંદી, પ્લેટિનમ અને પેલેડિયમ નવા ઊંચા સ્તરે પહોંચશે. સોનું $6,000 નહીં તો $7,000 પ્રતિ ઔંસ સુધી પણ જઈ શકે છે. ચાંદી $160 સુધી પહોંચી શકે છે. પ્લેટિનમ $3,000થી ઉપર અને પેલેડિયમ તેની નજીક પહોંચવાની શક્યતા છે.
