શેરબજારના નિષ્ણાતોની નવ શેર્સમાં સતત લેવાલી કરી
- ડોલી ખન્ના, મુકુલ અગ્રવાલ, આશિષ કચોલિયા, વિજય કેડિયાએ 2025-26ના ઓક્ટોબરથી ડિસેમ્બર સુધીના ત્રિમાસિક ગાળામાં 9 સ્ટોક્સ પર દાવ લગાવ્યો
શેરબજારની ડિસેમ્બર ત્રિમાસિકના શેરહોલ્ડિંગ પેટર્ન ધીમે ધીમે સામે આવી રહ્યા છે. આ પેટર્ન બતાવે છે કે પૈસા ક્યાં જઈ રહ્યા છે. તાજેતરના ફાઇલિંગ્સ દર્શાવે છે કે વિજય કેડિયા, આશિષ કચોલિયા, મુકુલ અગ્રવાલ અને ડોલી ખન્ના જેવા પ્રખ્યાત રોકાણકારો તેમના પોર્ટફોલિયોનું પુનર્ગઠન કરવામાં વ્યસ્ત રહ્યા છે, પસંદગીના સ્ટોક્સમાં નવી એન્ટ્રી કરી છે અને હિસ્સો વધાર્યો છે.
ડોલી ખન્ના, મુકુલ અગ્રવાલ, આશિષ કચોલિયા, વિજય કેડિયાએ Q3માં આ 9 સ્ટોક્સ પર દાવ લગાવ્યો હોવાનું જાણવા મળી રહ્યું છે.
વિજય કેડિયાએ અદ્વૈત એનર્જીમાં નવી એન્ટ્રી કરી છે. કેડિયા સિક્યોરિટીઝ મારફતે તેમણે ડિસેમ્બર ત્રિમાસિક દરમિયાન 1.20 ટકા હિસ્સો અથવા 11,51,501 શેર ખરીદ્યા છે. રસપ્રદ વાત તો એ છ કે આ સ્ટોકમાં પહેલેથી જ બીજા એક દિગ્ગજ રોકાણકાર આશિષ કચોલિયા હાજર છે. આશિષ કચોલિયાએ જુલાઈ 2024થી અદ્વૈત એનર્જીમાં રોકાણ કરેલું છે. ત્રિમાસિકના અંતે તેમનો હિસ્સો 2.06 ટકા (2,25,000 શેર) થઈ ગયો છે. કેડિયાએ પટેલ એન્જિનિયરિંગમાં પણ ફરી એન્ટ્રી કરી છે. શેરબજારમાં આપવામાં આવેલી નોંધમાં જણાવવામાં આવ્યું છે કે ડિસેમ્બરમાં 1.01 ટકા હિસ્સો અથવા 1,00,25,099 શેર નવી અથવા વધારેલી એન્ટ્રી તરીકે દર્શાવવામાં આવ્યા છે. શક્ય છે કે વિજય કેડિયાએ કંપનીમાં અગાઉનો આખો હિસ્સો ક્યારેય પૂરો વેચ્યો ન હોય, કારણ કે 1 ટકાથી ઓછા હિસ્સા એક્સચેન્જમાં અલગથી જાહેર કરવાની જરૂર નથી.
આશિષ કચોલિયા
આશિષ કચોલિયા અનેક સ્ટોક્સમાં સક્રિય રહ્યા છે. તેમણે ગુજરાત એપોલો ઇન્ડસ્ટ્રીઝમાં પોતાનો હિસ્સો વધાર્યો છે. ડિસેમ્બરમાં 2.29 ટકા (2,97,056 શેર) સુધી પહોંચાડી દીધો છે. બીજીતરફ સપ્ટેમ્બર ત્રિમાસિકમાં તેમનો હિસ્સો 1.06 ટકા (1,25,056 શેર) હતો. SME સેગમેન્ટમાં NSEના શેરહોલ્ડિંગ ડેટા મુજબ તેમણે ટેકએરા એન્જિનિયરિંગમાં નવી એન્ટ્રી કરીને 2.11 ટકા હિસ્સો અથવા 3,48,800 શેર ખરીદ્યા છે. ઉપરાંત તેમણે એડકાઉન્ટી મીડિયા ઇન્ડિયામાં પણ નવી પોઝિશન લીધી છે. એડકાઉન્ટી મીડિયા ઇન્ડિયામાં ત્રિમાસિક દરમિયાન 2.92 ટકા હિસ્સો અથવા 6,56,000 શેર ખરીદ્યા છે.
મુકુલ અગ્રવાલ
મુકુલ અગ્રવાલે હિન્દુસ્તાન કન્સ્ટ્રક્શન કંપની (HCC)માં નવી એન્ટ્રી કરીને 1.68 ટકા હિસ્સો ખરીદ્યો છે. શેર્સની સંખ્યાની દ્રષ્ટિએ વાત કરીએ તો મુકુલ અગ્રવાલે 4,40,19,921 શેર ખરીદ્યા છે. અગ્રવાલે ઓલકાર્ગો લોજિસ્ટિક્સમાં પણ નવી એન્ટ્રી કરી છે, જ્યાં તેમણે મજબૂત 2.94 ટકા હિસ્સો (4,41,00,000 શેર) મેળવ્યા છે. દિગ્ગજ રોકાણકારના પોર્ટફોલિયોમાં હવે સુદીપ ફાર્મા પણ સામેલ છે. સુદીપ ફાર્મામાં ડિસેમ્બર સુધીમાં અગ્રવાલ પાસે 1.33 ટકા હિસ્સો અથવા 15,00,117 શેર હતા.
ડોલી ખન્ના
ડોલી ખન્નાએ પણ Q3માં તેમના પોર્ટફોલિયોમાં નવી ઉમેરો કર્યો છે. તાજેતરના ડેટા મુજબ તેમણે IFB એગ્રો ઇન્ડસ્ટ્રીઝમાં 1.13 ટકા હિસ્સો લીધો છે અને ડિસેમ્બર સુધી તેમના પાસે 1,05,693 શેર હતા.
