શું સોનું હવે સલામત કમાણીનો વ્યૂહ તૈયાર કરવાનું મશીન બની રહ્યું છે?
સોનું $3,800થી $4,000નો ઝોન આ દાયકાનો નવો બેઝ બની શકે છે. જો ભાવ પુલબેક દરમિયાન પણ આ લેવલ ઉપર રહે, તો સમજવું કે સોનું હવે ઊંચી કક્ષામાં પ્રવેશી ગયું છે.
અમદાવાદઃ COMEX માર્કેટમાં સોનાની તીવ્ર તેજી ભાવોને છેલ્લા 25 વર્ષથી ચાલતી ભાવ વધારાની ચેનલની ઉપર લઈ ગયા છે. સોનાના બજારના ચાર્ટ્સ પર ઐતિહાસિક મોમેન્ટમ જોવા મળી રહી છે. સોનાનો RSI-રિલેટિવ સ્ટ્રેન્ગ્થ ઇન્ડેક્સ 1980ના સ્તરને સ્પર્શી રહ્યો છે. આ સ્થિતિમાં ભારતીય રોકાણકારો નબળું પ્રદર્શન કરતી ઇક્વિટી સામે સોનું અને ચાંદીમાં રોકાણ કરવાના વિકલ્પને માપી રહ્યા છે. સોના-ચાંદીનું બજાર વિશ્વાસ, ભય અને ઝડપી બદલાતા વૈશ્વિક ટ્રેન્ડ્સથી ચલિત છે.
સોનાના ભાવ ચઢતા જાય છે તેમ બજારની માનસિકતા સાવચેતીભર્યા આશાવાદમાંથી વધુ મજબૂત લાગણી કે વિશ્વાસ તરફ એટલે કે રોકાણના એક વિશ્વસનીય વિકલ્પને સોનામાંના રોકાણને જોતા થઈ ગયા છે. સોનું હવે માત્ર હેજિંગ માટેનું સાધન રહ્યું નથી. સોનું ઇન્વેસ્ટમેન્ટ કરવાનું એક લક્ષ્ય બની ગયું છે.
શેરબજાર અને તેમાંય ખાસ કરીને બ્રોડર માર્કેટ અને કેટલાક સેક્ટર્સ ભારતીય રોકાણકારો માટે નબળા સાબિત થઈ રહ્યા છે. એક સમય હતો જ્યારે શેરો સ્થિર કમ્પાઉન્ડિંગનું વચન આપતા હતા. પરંતુ હવે શેર્સ વધુ અસ્થિર, અનિશ્ચિત અને સાઇડવેઝ રિટર્ન આપતા બની ગયા છે. આ ખાલી જગ્યામાં સોનું અને તેની નાની બહેન ચાંદી રિટેલ પોર્ટફોલિયોમાં વધુ લોકપ્રિય બની રહ્યા છે. જ્વેલર્સ, ડિજિટલ ગોલ્ડ પ્લેટફોર્મ્સ અને કોમોડિટી ટ્રેડિંગ ટર્મિનલ્સ સહિતના દરેક મંચ પર એક જ વાત ચાલી રહી છે કે સોનાના બજારમાં રોકાણકારોની ભાગીદારી સતત વધી રહી છે. COMEX ગોલ્ડની લાંબા ગાળાની ટેક્નિકલ રચના જોતાં સોનું ટ્રોય ઔંસદીઠ $6,000 નજીકના અપસાઇડ ઝોન તરફ જઈ રહ્યું હોવાનો સંકેત આપી રહ્યું છે. આ અંદાજ બહુ એટલે કે વધુ પડતો આશાવાદી લાગતો હતો. પરંતુ જેની અપેક્ષા ન હતી તે હતી તેની ઝડપથી ટાર્ગેટને વળોટી જવા આગળ વધી રહ્યો છે. કહેવાય છે કે ધીરજના ફળ મીઠાં. બીજા શબ્દોમાં કહીએ તો બજાર ઘણીવાર ધીરજ રાખનારને ઇનામ આપે છે. બજાર ચાલે છે ત્યારે સૌની સંમતિની રાહ પણ જોતું નથી.
હવે ભાવનાઓને બાજુએ રાખીને ચાર્ટ્સ તરફ નજર કરીએ. સોનું સતત કમાણી કરાવી આપતું ઇન્વેસ્ટમેન્ટ રહ્યું છે. છેલ્લા 25 વર્ષના COMEX ગોલ્ડના ચાર્ટમાં માત્ર ભાવ નહીં પરંતુ એક લાંબી યાત્રા દેખાય છે. સોનાએ વૈશ્વિક નાણાકીય સંકટો, કરન્સી વોર, મહામારી અને જીઓ-પોલિટિકલ તણાવ વચ્ચે સોનાને માર્ગ બનાવ્યો છે. ટેકનિકલ ચાર્ટમાં નીચેની સપાટીએ ભયભીત રોકાણકારોને સપોર્ટ આપ્યો છે. તેમ જ ઉપરની પ્રતિકાર સપાટીએ રોકાણકારોના અતિઉત્સાહમાં અવરોધ ઊભો કર્યો છે. 25 વર્ષીય ચેનલની ઉપર થયેલો તાજેતરનો બ્રેકઆઉટ ટેક્નિકલ દૃષ્ટિએ અત્યંત મહત્વનો છે. દાયકાઓથી ચાલતી ચાર્ટની રચનામાંથી બજાર બહાર આવે છે, ત્યારે તેનો અર્થ છે કે ટ્રેન્ડ માત્ર આગળ વધતો નથી. ટ્રેન્ડ વિસ્તરી રહ્યો હોવાનો સંકેત આપે છે.
સોનાના બજારમાં મજબૂત બ્રેકઆઉટ્સ આવ્યા પછી ભાવની તલાશનો સમય શરૂ થાય છે, જ્યાં જૂના રેફરન્સ પોઇન્ટ્સ કામ નથી કરતા. આથી સોનું $3,800થી $4,000નો ઝોન આ દાયકાનો નવો બેઝ બની શકે છે. જો ભાવ પુલબેક દરમિયાન પણ આ લેવલ ઉપર રહે, તો સમજવું કે સોનું હવે ઊંચી કક્ષામાં પ્રવેશી ગયું છે.
ભારતીય રિટેલ રોકાણકારો માટે આ ખાસ મહત્વનું છે, કારણ કે COMEXમાં મજબૂત આધાર હોવાનો અર્થ MCX ગોલ્ડમાં પણ વિશ્વાસ વધી રહ્યો છે. તેમાંય ખાસ કરીને રૂપિયા નબળો હોય અથવા વૈશ્વિક અનિશ્ચિતતા વધી રહી હોય ત્યારે આ વિશ્વાસ વધી રહ્યો હોવાથી આ બાબત વધુ મહત્વની છે.
આજનો સોનું અને ચાંદી ભાવ: ઉતાર-ચઢાવ છતાં મજબૂત ટ્રેન્ડ
ફેડ ચેરમેન તરીકે કેવિન વોર્શની અફવાઓને કારણે સોનાના ભાવમાં 4 ટકાનો ઘટાડો જોવા મળ્યો છે. સ્ટોનએક્સના સિનિયર એનાલિસ્ટ મેટ સિમ્પસનના જણાવ્યા મુજબ ઓછા ડોવિશ ફેડ ચેરમેનની આશંકાએ એશિયન ટ્રેડમાં સોનાને દબાણમાં મૂકી દીધું છે. છતાં સોનું જાન્યુઆરી માસમાં 1980 બાદની સૌથી મજબૂત માસિક તેજી તરફ આગળ વધી રહ્યું છે. જાન્યુઆરીમાં અત્યાર સુધી સોનાના ભાવમાં 20 ટકાથી વધુ ઉછાળો આવ્યો છે. સોનામાં સતત છઠ્ઠા મહિને વધારો નોંધાઈ રહ્યો છે. LKP સિક્યોરિટીઝના જતીન ત્રિવેદીનું કહેવું છે કે સેન્ટ્રલ બેન્કની ખરીદી, હેજ ડિમાન્ડ અને વૈશ્વિક આર્થિક અનિશ્ચિતતાએ સોનામાં સેફ-હેવન ફ્લોઝ બહુ જ મજબૂત કરી દીધો છે. ટેક્નિકલ ચાર્ટની દ્રષ્ટિએ સોનું રૂ. 1,70,000ની ભાવ સપાટીએ મજબૂત સપોર્ટ ધરાવે છે. તેમ જ રૂ. 1,85,000 સપાટીએ પ્રતિકાર ધરાવે છે.
ચાંદીમાં પણ નફાકીય વેચવાલી આવી રહી હોવાથી 4 ટકાથી વધુનો ઘટાડો થયો છે, પરંતુ જાન્યુઆરીમાં 50 ટકાથી વધુ તેજી સાથે તે ઐતિહાસિક ભાવ સપાટીએ પહોંચવા તરફ આગળ વધી રહી છે. ચાંદીમાં ઇન્ડસ્ટ્રિયલ અને ઇન્વેસ્ટમેન્ટ ડિમાન્ડ બંને રેકોર્ડ સ્તરે છે.
