કાચા માલના ભાવમાં ત્રણવાર વધારો થતાં લેમિનેટ્સની કિંમતમાં વધારો કરવામાં આવ્યો
મેથાનોલ અને ફેનોલ બનાવવા માટેના કાચા માલનો જથ્થો બંદર પરના ગાદામોમાં ઘટી રહ્યો હોવાથી લેમિનેટ્સ મેન્યુફેક્ચરિંગ આગળ વધારવું કઠિન બની ગયું
અમદાવાદઃ અમેરિકા અને ઇઝરાયલે સાથે મળીને ઇરાન પર કરેલા આક્રમણને પરિણામે સર્જાયેલી સ્થિતિની અસર હેઠળ મેથાનોલ અને ફેનોલનો સપ્લાય મંદ પડીને બંધ થવાની અણી પર આવી જતાં યુદ્ધ પછી લેમિનેટ્સના ભાવમાં ત્રીજીવાર વધારો કરવાની ફરજ પડી હોવાનું ઇન્ડિયન લેમિનેટ મેન્યુફેક્ચરર્સ એસોસિયેશનની અખબારી યાદીમાં જણાવવામાં આવ્યું છે.
એસોસિયેશનના સૂત્રોનું કહેવું છે કે ભારતના લેમિનેટ મેન્યુફેક્ચરર્સ બહુધા મેથાનોલ અને ફેનોલનો સપ્લાય કતાર સહિતના અખાતના દેશોમાંથી જ મેળવે છે. મેથાનોલ ફોર્મલડિહાઈડના ઉત્પાદન માટેનું મુખ્ય કાચો માલ છે. ફોર્મલ ડિહાઈડ બનાવવા માટે સ્થાનિક બંદરોના ગોદામોમાં પડે રહેલા માલ પર જ લેમિનેટ બનાવનારાઓ નિર્ભર છે. તેમની પાસેનો મેથાનોલનો જથ્થો ઘટી રહ્યો છે.
બીજું, ફેનોલના સ્થાનિક ઉત્પાદકો પાસે ફેનોલ બનાવવા માટેનો કાચો માલ ઉપલબ્ધ ન હોવાથી તેમણે તેમના એકમો બંધ કરી દેવાની ફરજ પડી રહી છે. પરિણામે સ્થાનિક સ્તરે બજારમાંથી મળી રહેતો ફેનોલનો સપ્લાય પણ લગભગ બંધ થવા આવ્યો છે. જેમની પાસે ફેનોલનો સ્ટોક ખતમ થઈ ગયો હોય તેમને માટે ફેનોલનો જથ્થો મેળવવા લગભગ અશક્યવત બની ગયો છે. તેનો થોડોગણો જથ્થો ઉપલબ્ધ બનશે તેને માટે લેમિનેટ મેન્યુફેક્ચરર્સે મોટી કિંમત ચૂકવવી પડશે.
ઇઝરાયલ-અમેરિકાએ સાથે મળીને ઇરાન પર હુમલો કર્યો તે પછી લેમિનેટના મેન્યુફેક્ચરર્સે કાચા માલના ભાવમાં વધારો આવી ગયો હોવાની એડવાઈઝરી ત્રણવાર બહાર પાડવાની ફરજ પડી છે. પહેલો વધારો 9મી માર્ચે, ત્યારબાદ 20મી માર્ચે અને હવે 30મી માર્ચે ભાવ વધારાની જાહેરાત કરવાની ફરજ પડી છે. લાઈનર, 0.8 એમ.એમ., 0.9 એમ.એમ., એક એમ.એમ., તથા ડોરસ્કીનના ભાવમાં વધારો કરવાની ફરજ પડી છે. લાઈનરમાં કૂલ રૂ. 72, 0.8 એમ.એમ.માં રૂ. 100નો, 0.9 એમ.એમ.માં રૂ. 120નો, 1 એમ.એમ.ના ભાવમાં રૂ. 150નો તથા ડોર સ્કીનના ભાવમાં રૂ. 150નો વધારો કરવાની ફરજ પડી છે.
