નવા વર્ષમાં રસોડામાં વપરાતી દરેક વસ્તુઓના ભાવ ત્રણથી ચાર ટકા વધી જશે

ક્રૂડના મૂલ્યમાં વધારો અને ભારતીય રૂપિયાનું અવમૂલ્યન ભાવ વધાર માટે જવાબદાર બની શકેઃ અત્યારની તુલનાએ ખેડૂતોને જીરું, હળદર, મરચાં, ટામેટાં, કપાસના સારા ભાવ મળે તેવી સંભાવના

ભારતમાં ફાસ્ટમુવિંગ કન્ઝ્યુમર ગુડ્સની કેટેગરીમાં આવતી દૈનિક વપરાશની વસ્તુઓ બનાવતી કંપનીઓ 2026-27ના ટેક્સ યરના પ્રથમ ત્રિમાસિક ગાળામાં જ તેમના ઉત્પાદનોના ભાવમાં વધારો કરી દે તેવી સંપૂર્ણ શક્યતા છે. આ વધારો અંદાજે ત્રણથી ચાર ટકાનો આવશે, એમ નુવામાં ઇન્સ્ટિટ્યૂશનલ ઇક્વિટીઝે તેના અહેવાલમાં જણાવ્યું છે. કાચા માલના વધી રહેલા ભાવને કારણે ફાઈનલ પ્રોડક્ટ્સના ભાવમાં વધારો કરવાની ફરજ પડશે એમ અહેવાલમાં જણાવવામાં આવ્યું છે. ફેબ્રુઆરી 2026માં રિઝર્વ બેન્કે પણ ફાસ્ટ મુવિંગ કન્ઝ્યુમર ગુડ્સના ભાવમાં વધારો થવાની શક્યતાનો નિર્દેશ આપ્યો હતો.

અમેરિકા અને ઇઝરાયલે મળીને ઇરાન પર કરેલા આક્રમણને કારણે ક્રૂડ ઓઈલના ભાવમાં વધારો થયો છે અને ભારતીય રૂપિયો નબળો પડીને અમેરિકી ડૉલર સામે 95ના તળિયાને સ્પર્શી આવ્યો હોવાથી એફએમસીજી કંપનીઓનો ઉત્પાદન ખર્ચ વધી રહ્યો છે. પરિણામે કંપનીઓએ ભાવ વધારવાનો નિર્ણય લેવાનો સંકેત આપ્યો છે. જો આ સ્થિતિ ચાલુ રહેશે તો જૂન 2026ના અંત સુધીમાં જ ઘર ઘરમાં વપરાતી વસ્તુઓના ભાવમાં  ઓછામાં ઓછા 3 ટકાથી 4 ટકા સુધીનો ભાવ વધારો થઈ શકે છે.

 હાલની સ્થિતિ શું છે?

હાલમાં કંપનીઓ પાસે 30–45 દિવસનો સ્ટોક હોવાથી માર્ચ 2026ના અંત સુધી પ્રોડક્ટ્સના ભાવમાં વધારો નહિ આવે તેવી ગણતરી હતી અને તે મુજબ જ થયું છે. પરંતુ સ્ટોક ખતમ થતાં જ નવા ભાવ લાગુ થશે

કયા સેક્ટર પર વધુ અસર?

ખાસ કરીને પેઇન્ટ્સ, ખાદ્ય તેલ, સાબુ અને ડિટર્જન્ટ્સના ભાવમાં વધારો થઈ જવાની સંભાવના વધારે છે. બીજીતરફ પેકેજિંગ ખર્ચમાં પણ વધારો કરવાની ફરજ પડે તેમ સમગ્ર ગુજરાતના પેકેજિંગ મટિરિયલ બનાવનારા પ્લાસ્ટિક્સ મેન્યુફેક્ચરર્સે થોડા દિવસ પહેલા જ જાહેર કરી દીધું છે. ક્રૂડના સપ્લાયમાં ઘટાડો થતાં પ્લાસ્ટિકના દાણાનું ઉત્પાદન ઘટી જતાં અને સપ્લાય સીમિત થઈ જતાં પ્લાસ્ટિકના દાણાના ભાવ 50થી 70 ટકા સુધી વધી ગયા હોવાથી તેમને પણ પેકેજિંગ મટિરિયલના ભાવમાં વધારો કરવાની ફરજ પડશે.

 પેકેજિંગ ખર્ચમાં મોટો વધારો

FMCG કંપનીઓના પ્રોડક્ટ્સના કુલ ઉત્પાદન ખર્ચમાં પેકેજિંગ મટિરિયલનો ખર્ચ અંદાજે 15થી 20 ટકાનો હોય છે. ક્રૂડ ઓઈલનો ભાવ $100 પ્રતિ બેરલ નજીક હોવાથી પેકેજિંગ ખર્ચ વધ્યો છે. અમેરિકા અને ઇઝરાયલે ઇરાન પર કરેલા આક્રમણને પરિણામે એક તબક્કે ક્રૂડ ઓઈલના બેરલદીઠ ભાવ 119.50 અમેરિકી ડૉલરને વળોટી ગયા હતા. તેની સાથે જ પોલીપ્રોપોલીન  અને પોલીઈથાયલિન જેવા પેટ્રોકેમિકલ ઉત્પાદનો મોંઘા થયા છે.

મોટી કંપનીઓએ પહેલેથી ભાવ વધાર્યા

એશિયન પેઈન્ટ્સ અને બર્જર પેઈન્ટ જેવી કંપનીઓએ તો પેઈન્ટ્સના ભાવમાં પહેલાથી જ વધારો શરૂ કરી દીધો છે. બર્જર પેઈન્ટ્સે માર્ચ મહિનાના છેલ્લા સપ્તાહમાં જ ભાવમાં વધારો કર્યો છે. જોકે એશિયન પેઈન્ટ્સ એપ્રિલના મધ્ય સુધીમાં પેઈન્ટ્સના ભાવમાં વધુ વધારો કરી શકે છે

વિદેશી બજારની અસર

ડાબર અને ઇમામિ જેવી કંપનીઓને થતી કુલ આવકમાંથી લગભગ 6 ટકા આવક મધ્યપૂર્વના દેશોમાંથી જ થાય છે. મધ્યપૂર્વના દેશોમાં યુદ્ધ ચાલી રહ્યું હોવાથી વેપારમાં અવરોધ આવી રહ્યો છે. તદુપરાંત શિપિંગ અને ઈન્શ્યોરન્સ ખર્ચમાં વધારો થયો છે. ઉત્તર અને પૂર્વ ભારતમાં કમોસમી વરસાદ પડતા ડિમાન્ડ ઓછી થઈ રહી છે. આ પરિસ્થિતિની અસર હેઠળ આવનારા ઉત્પાદનોમાં ટેલ્કમ પાવડર, આઈસક્રીમ, કોલ્ડ ડ્રિંક્સ જેવી વસ્તુઓનો સમાવેશ થાય છે. માર્કેટ ટ્રેન્ડ દર્શાવે છે કે મોંઘવારી વધે ત્યારે મોટી કંપનીઓ બજારમાં વધુ હિસ્સો મળે છે. નાના ખેલાડીઓ માટે મુશ્કેલી વધે છે. આમ એફએમસીજીના સેક્ટરની નાની નાની કંપનીઓની હાલાકીમાં વધારો થવાની સંભાવના રહેલી છે.

તેથી જ FMCG સેક્ટરમાં ભાવ વધારો લગભગ નક્કી જ છે. ક્રૂડ ઓઈલના ભાવ વધારાની પહેલી અસર તેના પર જોવા મળી રહી છે. ભારતીય રૂપિયો હૂડિયામણ બજારમાં નબળો પડી રહ્યો હોવાથી પણ તેમના ઉત્પાદનો મોંઘા થઈ રહ્યા છે. કારણ કે કાચા માલની આયાતનો ખર્ચ વધી રહ્યો છે. પેકેજિંગ ખર્ચમાં થઈ રહેલા વધારો પણ પ્રોડક્ટ્સના ભાવ વધારા માટે જવાબદાર બની શકે છે.

ભાવ વધારની ખેડૂત પર અસર

ફાસ્ટ મુવિંગ કન્ઝ્યુમર ગુડ્સના ભાવમાં ત્રણથી ચાર ટકાનો વધારો થવાને કારણે ખેતી કરવા માટે જોઈતા કાચા માલ એટલે કે ઇનપુટ ખર્ચમાં વધારો થઈ જશે. પેકેજિંગ મટિરિયલ્સ એટલે કે પ્લાસ્ટિક અને કેમિકલ્સ મોંઘા થશે. તેમ જ ડીઝલ અને એનર્જી ખર્ચમાં વધારો થશે. કેમિકલ આધારિત ખાતર સહિતના ઇનપુટના ખર્ચમાં વધારો થશે. પરિણામેશાકભાજી, તેલિબિયાં અને ફૂડ પ્રોસેસમાં વપરાતા દરેક પાકની કિંમતમાં વધારો થશે. બીજું, કાચા માલની માંગ વધે ત્યારે ખેડૂતને થોડો વધારે ભાવ મળી શકે છે. મગફળી અને સોયાબિનના ભાવ વધુ સારા મળી શકે છે. તેમ જ કપાસના ભાવ પણ ઊંચા જઈ શકે છે. કોટન એસોસિયેશન ઓફ ઇન્ડિયાએ પણ ફેબ્રુઆરી 2026માં કપાસના ભાવમાં વધારો થઈ જવાની શક્યતાનો નિર્દેશ આપ્યો છે. ટામેટાં, કાંદા અને મરચાંનો ભાવ પણ વધી શકે છે. મિનિસ્ટ્રી ઓફ એગ્રીકલ્ચર એન્ડ ફાર્મર્સ વેલ્ફેરે માર્ચ 2026માં કૃષિ ઉપજના ભાવમાં વધારો થઈ જવાની સંભાવનાનો નિર્દેશ આપ્યો જ છે.

દૂધના ભાવ પણ વધી શકે

દૂધ અને દૂધની બનાવટના ભાવમાં વધારો થવાની સંભાવના જોવા મળી રહી છે. પશુદાણની કિંમત વધી જતાં દૂધના ભાવમાં વધારો કરવાની ફરજ પડશે. નેશનલ ડેરી ડેવલપમેન્ટે આ અંગેનો નિર્દેશ આપ્યો જ છે. જીરું અને હળદરના ભાવ પણ ઊંચકાઈ શકે છે. જીરુ અને હળદરની નિકાસના બજારમાં ડિમાન્ડ વધી જવાની સંભાવના છે. ફૂડ પ્રોસેસ ઇન્ડસ્ટ્રીઝમાં પણ તેની ડિમાન્ડ વધી શકે છે. આ સંભાવનાઓને ધ્યાનમાં રાખીને ખેડૂતો પણ તેમણે કયા પાકની ખેતી કરવી તેનો નિર્ણય લઈ શકે છે.