અમેરિકી પ્રમુખ ડોનાલ્ડ ટ્રમ્પ ફરી શરૂ કર્યું ટેરિફનું તોફાનઃ બ્રાન્ડેડ દવાની આયાત પર સો ટકા ટેરિફ
- મોટી દવા કંપનીઓને આ નિયમો અમલમાં મૂકવા માટે 120 દિવસ અને નાની કંપનીઓને 180 દિવસનો સમય આપવામાં આવ્યો
- મેટલમાં ઓછી કિંમત બતાવવાની પ્રથાને અટકાવવા માટે હવે ટેરિફની ગણતરી આયાત મૂલ્યની બદલે અમેરિકામાં વેચાણ મૂલ્યના આધારે કરવામાં આવશે
અમેરિકાના પ્રમુખ ડોનાલ્ડ ટ્રમ્પે વેપાર નીતિમાં મોટા ફેરફારો જાહેર કરતાં કેટલીક બ્રાન્ડેડ દવાઓના આયાત પર 100 ટકા ટેરિફ લગાવવાનો નિર્ણય લીધો છે. તેની સાથે સાથે જ સ્ટીલ, એલ્યુમિનિયમ અને કોપર પરના ટેરિફ માળખામાં પણ ફેરફાર કરવાની જાહેરાત કરી દીધી છે. આ પગલાનો હેતુ વિદેશી દવા ઉત્પાદકોને દવાઓના ભાવ ઘટાડવા અને ઉત્પાદન અમેરિકા તરફ ખસેડવા માટે પ્રોત્સાહિત કરવાનો છે.
અમેરિકાના પ્રમુખે કરેલી નવી જાહેરાત અનુસાર પેટન્ટ ધરાવતી દવાઓ બનાવતી વિદેશી કંપનીઓએ અમેરિકાની સરકાર સાથે કરાર કરીને દવાઓના ભાવ ઘટાડવા પડશે. તેમજ ઉત્પાદન અમેરિકા ખાતે ખસેડવું પડશે. ડોનાલ્ડ ટ્રમ્પે મૂકેલી બંને શરતો પૂર્ણ ન કરે તો 100 ટકા ટેરિફ લાગશે. દવાના ઉત્પાદકો માત્ર જે તે દવાના ઉત્પાદનના હિસ્સોને અમેરિકામાં ખસેડશે તો તેમની દવાઓ પર 20 ટકા ટેરિફ લાગશે.
અમેરિકાએ કેટલાક દેશો સાથેના વેપાર કરારોને કારણે યુરોપિયન યુનિયન, જાપાન, દક્ષિણ કોરિયા અને સ્વિટ્ઝર્લેન્ડ માટે ટેરિફ 15 ટકા સુધી જ મર્યાદિત રહેશે. બ્રિટન સાથેના કરાર મુજબ બ્રિટિશ દવાઓ પર ઓછામાં ઓછા ત્રણ વર્ષ માટે કોઈ ટેરિફ લાગશે નહીં મોટી દવા કંપનીઓને આ નિયમો અમલમાં મૂકવા માટે 120 દિવસ અને નાની કંપનીઓને 180 દિવસનો સમય આપવામાં આવ્યો છે.
ધાતુઓ પરના ટેરિફમાં પણ ફેરફાર કર્યો
ડોનાલ્ડ ટ્રમ્પ પ્રશાસને સ્ટીલ, એલ્યુમિનિયમ અને કોપર સંબંધિત ઉત્પાદનો પરની ટેરિફના દરમાં પણ ફેરફાર કર્યા છે. ઘણા ઉત્પાદનો પર ટેરિફ દર 50 ટકાથી ઘટાડીને 25 ટકા કર્યો છે. ધાતુનો ઓછો વપરાશ ધરાવતા ઉત્પાદનો પર ટેરિફ સંપૂર્ણપણે દૂર કર્યો છે. પરંતુ કાચા સ્ટીલ, એલ્યુમિનિયમ અને કોપર પર 50 ટકા ટેરિફ યથાવત રાખ્યો છે. ધાતુનું મૂલ્ય ખોટી રીતે ઓછું દેખાડવાની પ્રથાને તોડવા ટે હવે ટેરિફની ગણતરી આયાત મૂલ્યની બદલે અમેરિકામાં વેચાણ મૂલ્યના આધારે કરવામાં આવશે.
15 ટકાથી ઓછા ધાતુ ધરાવતા ઉત્પાદનો (જેમ કે નાના સ્ટીલ બ્લેડ ધરાવતા ડેન્ટલ ફ્લોસ બોક્સ) પર હવે ટેરિફ લાગશે નહીં. સરકારે કેટલાક ઉદ્યોગ અને પાવર ગ્રીડ સાધનો પર ટેરિફ 2027 સુધી 50 ટકાથી ઘટાડીને 15 ટકા કરવાનો નિર્ણય પણ લીધો છે.
આ ફેરફારો “લિબરેશન ડે”ના એક વર્ષ બાદ આવ્યા છે, જેમાં ટ્રમ્પે તમામ વેપાર ભાગીદારો પર 10 ટકાથી 50 ટકા સુધીના ટેરિફ જાહેર કર્યા હતા. પરંતુ અમેરિકાની સુપ્રીમ કોર્ટે ફેબ્રુઆરીમાં આ ટેરિફને ગેરકાયદેસર ઠરાવ્યા હતા, જેના કારણે સરકારને લગભગ 166 અબજ ડોલરના ટેરિફ પરત આપવા માટે યોજના બનાવવી પડી રહી છે.
ઉદ્યોગોની પ્રતિક્રિયા
અમેરિકાના ચેમ્બર ઓફ કોમર્સે ચેતવણી આપી છે કે નવા ટેરિફથી દવાઓના ખર્ચમાં વધારો થઈ શકે છે. મેન્યુફેક્ચરિંગ, બાંધકામ અને ઊર્જા ક્ષેત્રમાં ખર્ચ વધી શકે છે. પરંતુ સ્ટીલ ઉદ્યોગના પ્રતિનિધિઓએ આ નિર્ણયનું સ્વાગત કર્યું છે અને તેને સ્થાનિક ઉદ્યોગ માટે લાભદાયક ગણાવ્યો છે.
