કરવેરા અને અન્ય કાયદા (સુધારા) બિલ, ૨૦૨૬: ભારતની જનતાના ખિસ્સા, નોકરીઓ અને રોજના ડિજિટલ વ્યવહારો પર શું અસર પડશે?
કરવેરા અને અન્ય કાયદા (સુધારા) બિલ, ૨૦૨૬: ભારતની જનતાના ખિસ્સા, નોકરીઓ અને રોજના ડિજિટલ વ્યવહારો પર શું અસર પડશે?
ગુજરાતના સુરત અને ભાવનગર જેવા શહેરોમાં કામ કરતા લાખો રત્નકલાકારો અને સ્થાનિક ડાયમંડ ઉત્પાદકો માટે આ માસ્ટરસ્ટ્રોક છે.
ભારતમાં આઈફોન, એન્ડ્રોઈડ સ્માર્ટફોન અને ઈલેક્ટ્રોનિક ગેજેટ્સનું સ્થાનિક ઉત્પાદન બમણી ઝડપે વધશે. આનાથી દેશના યુવાનો માટે એસેમ્બલી લાઈનથી લઈને એન્જિનિયરિંગ સુધીની લાખો નવી નોકરીઓ ઊભી થશે
સંસદ દ્વારા પસાર કરવામાં આવેલું ‘કરવેરા અને અન્ય કાયદા (સુધારા) બિલ, ૨૦૨૬’ માત્ર ટેક્સ ફ્રેમવર્ક કે વિદેશી રોકાણ પૂરતું સીમિત નથી, પરંતુ તેની સીધી અને પરોક્ષ અસર દેશના સામાન્ય નાગરિકોના રોજિંદા જીવન પર પડવાની છે. એક તરફ જ્યાં આ બિલ દેશમાં હજારો નવી રોજગારીઓ અને ટેકનોલોજીના ક્ષેત્રે મોટો ઉછાળો લાવશે, ત્યાં બીજી તરફ રોજિંદા ઓનલાઈન પેમેન્ટ-યુપીઆઈ અને ડેબિટ કાર્ડ ટ્રાન્ઝેક્શન કરનાર સામૂહિક જનતા માટે આર્થિક ફેરફારોના સંકેત આપે છે.
ડિજિટલ પેમેન્ટ્સ અને ગ્રાહકો: યુપીઆઈ, રૂપે અને પર મર્ચન્ટ ડિસ્કાઉન્ટ રેટ લાદવાની શક્યતા
બિલમાં ‘પેમેન્ટ એન્ડ સેટલમેન્ટ સિસ્ટમ્સ એક્ટ, ૨૦૦૭’ માં કરાયેલો સુધારો સામાન્ય ગ્રાહકને સૌથી વધુ સ્પર્શે છે. આ સુધારો યુપીઆઈ અને રૂપે ડેબિટ કાર્ડ ટ્રાન્ઝેક્શન પર મર્ચન્ટ ડિસ્કાઉન્ટ રેટ વસૂલવાનો માર્ગ મોકળો કરી રહ્યુ છે. અત્યાર સુધી નાના-મોટા વેપારીઓ કે ગ્રાહકો માટે યુપીઆઈ પર કરવામાં આવતા નાણાંકીય વ્યવહારો મફત હતા. જો બેંકો કે પેમેન્ટ સર્વિસ પ્રોવાઇડર્સ વેપારીઓ પાસેથી ફી વસૂલવાનું શરૂ કરશે, તો વેપારીઓ તેનો બોજો પરોક્ષ રીતે સામાન કે સેવાની કિંમતમાં ઉમેરીને ગ્રાહકો પર નાખી શકે છે, અથવા નાના વેપારીઓ યુપીઆઈ પેમેન્ટ સ્વીકારવામાં ખચકાટ અનુભવી શકે છે.
રોજગારીનું નવું વાવાઝોડું: મેન્યુફેક્ચરિંગ અને ટેક નોકરીઓમાં વધારો
એપલ અને ગૂગલ જેવી વૈશ્વિક બિગ-ટેક કંપનીઓ માટે ઇલેક્ટ્રોનિક્સ મેન્યુફેક્ચરિંગ ક્ષેત્રે કેપિટલ ગુડ્સ પર માર્ચ ૨૦૪૧ સુધી (વધારાના ૧૦ વર્ષ) ટેક્સ હોલિડે લંબાવવામાં આવ્યો છે. ભારતમાં આઈફોન, એન્ડ્રોઈડ સ્માર્ટફોન અને ઈલેક્ટ્રોનિક ગેજેટ્સનું સ્થાનિક ઉત્પાદન બમણી ઝડપે વધશે. આનાથી દેશના યુવાનો માટે એસેમ્બલી લાઈનથી લઈને એન્જિનિયરિંગ સુધીની લાખો નવી નોકરીઓ ઊભી થશે. સાથોસાથ, સ્થાનિક સ્તરે ઉત્પાદન વધવાથી ભવિષ્યમાં ઈલેક્ટ્રોનિક વસ્તુઓની કિંમતોમાં પણ સ્થિરતા અને રાહત મળી શકે છે.
સુરક્ષિત ડેટા અને આઈટી ક્ષેત્ર: ડેટા સેન્ટર અને ક્લાઉડ સર્વિસિસ
બિલમાં વિદેશી કંપનીઓ માટે ભારતમાં સીધી માલિકીના બદલે લીઝ પર ડેટા સેન્ટર ચલાવવાની શરતો સરળ બનાવાઈ છે અને ૨૦૪૭ સુધી ટેક્સ હોલિડેની મંજૂરી પ્રક્રિયામાંથી સરકારી લાલ ફીતાશાહી-રેડ ટેપિઝમ દૂર કરવામાં આવ્યું છે. એક, ભારતીયોનો ડેટા (સોશિયલ મીડિયા, બેંકિંગ, ક્લાઉડ સંગ્રહ) દેશની સરહદોની અંદર જ ભારતીય ડેટા સેન્ટરોમાં સુરક્ષિત રહેશે. બે, ભારતમાં જ ડેટા સેન્ટરો વધવાથી ક્લાઉડ એપ્લિકેશન્સ, ઓનલાઈન સ્ટ્રીમિંગ અને ડિજિટલ સેવાઓની સ્પીડમાં સુધારો થશે. ત્રણ, ડેટા સેન્ટર ઈન્ફ્રાસ્ટ્રક્ચર, સાયબર સિક્યોરિટી અને ક્લાઉડ મેનેજમેન્ટમાં હાઈ-સ્કેલ ટેકનિકલ જોબ્સ ઊભી થશે.
હીરા ઉદ્યોગ અને રફ ડાયમંડ: રત્નકલાકારો માટે રાહત
વિદેશી ડાયમંડ માઇનિંગ કંપનીઓ માટે ભારતમાં રફ ડાયમંડના વેચાણ પર માર્ચ ૨૦૪૧ સુધી ટેક્સ હોલિડે પૂરો પાડવામાં આવ્યો છે. ગુજરાતના સુરત અને ભાવનગર જેવા શહેરોમાં કામ કરતા લાખો રત્નકલાકારો અને સ્થાનિક ડાયમંડ ઉત્પાદકો માટે આ માસ્ટરસ્ટ્રોક છે. અત્યાર સુધી કાચા હીરા માટે વિદેશી મધ્યસ્થીઓ પર નિર્ભર રહેવું પડતું હતું. હવે વિદેશી માઇનિંગ કંપનીઓ સીધા ભારતમાં જ રફ ડાયમંડ વેચશે, જેથી કાચો માલ સસ્તો મળશે અને સ્થાનિક હીરા ઉદ્યોગમાં રોજગારી સુરક્ષિત થશે.
રિયલ એસ્ટેટ કે ઈન્ફ્રાસ્ટ્રક્ચરમાં નાના અને મધ્યમ વર્ગીય રોકાણકારો નાના મ્યુચ્યુઅલ ફંડ જેવી સિસ્ટમથી રોકાણ કરે છે, તેમને મળતું ડિવિડન્ડ હવે ટેક્સ-ફ્રી રહેશે
રિયલ એસ્ટેટ ઇન્વેસ્ટમેન્ટ ટ્રસ્ટ્સ અને ઇન્ફ્રાસ્ટ્રક્ચર ઇન્વેસ્ટમેન્ટ ટ્રસ્ટના યુનિટ ધારકો માટે ડિવિડન્ડ પર ટેક્સ મુક્તિ આપવાનો પ્રસ્તાવ છે. રિયલ એસ્ટેટ કે ઈન્ફ્રાસ્ટ્રક્ચરમાં નાના અને મધ્યમ વર્ગીય રોકાણકારો નાના મ્યુચ્યુઅલ ફંડ જેવી સિસ્ટમથી રોકાણ કરે છે, તેમને મળતું ડિવિડન્ડ હવે ટેક્સ-ફ્રી રહેશે. આનાથી સ્થાનિક રોકાણકારોને વધુ સારું રિટર્ન મળશે અને પ્રોપર્ટી માર્કેટમાં રોકાણ કરવાનો ઉત્સાહ વધશે.
નિષ્ણાતના મંતવ્યો
બિલના લાંબા ગાળાના આર્થિક ફાયદાઓ અંગે ડિલોઈટ ઈન્ડિયાના પાર્ટનર સુમિત સિંઘાનિયા એ જણાવ્યું હતું કે: “ઈલેક્ટ્રોનિક ગુડ્સ ઉત્પાદકો માટે વિસ્તૃત ટેક્સ હોલિડેનો સમયગાળો અને ડેટા સેન્ટરો માટે હળવી કરવામાં આવેલી પાત્રતાની શરતો રોકાણકારોને આ ક્ષેત્રોમાં લાંબા ગાળાની મૂડી રોકવા માટે સક્ષમ બનાવશે.” સિંઘાનિયાએ વધુમાં ઉમેર્યું કે: “વિદેશી ફંડ મેનેજરો માટે ટેક્સ મુક્તિના નિયમોનું તર્કસંગતીકરણ એ વિદેશી ફંડ્સ માટે પારદર્શક અને વિશ્વસનીય ટેક્સ ફ્રેમવર્ક પ્રદાન કરવા તરફનું એક મોટું પગલું છે, જે ભારતને તેમના વૈશ્વિક કામગીરી હબ તરીકે ઉપયોગ કરવા માગે છે.” આ બિલ ભારતને માત્ર ‘ગ્લોબલ મેન્યુફેક્ચરિંગ અને ડેટા હબ’ બનાવવાની દિશામાં જ નથી લઈ જતું, પરંતુ તેનો સીધો ફાયદો દેશના યુવાનોને નોકરીઓ અને રોકાણકારોને ટેક્સમાં બચત સ્વરૂપે આપશે. જોકે, UPI પર MDR અંગે સરકાર આવનારા દિવસોમાં શું નીતિગત નિર્ણયો લે છે, તેના પર દેશની આખી ડિજિટલ ઇકોનોમી અને સામાન્ય ગ્રાહકના ખિસ્સાનો આધાર રહેશે.
