સંવત 2083ની શેરબજારની તેજી કેટલી ટકાઉ રહેવાની સંભાવનાઃ બજારમાં ભારે ઉતાર-ચઢાવ જોવા મળશે

સંવત 2083ની શેરબજારની તેજી કેટલી ટકાઉ રહેવાની સંભાવનાઃ તેજી સીધી રેખામાં નહીં થાય, પરંતુ ભારે ઉતાર-ચઢાવ જોવા મળશે

વિક્રમ સંવત ૨૦૮૩ના પ્રારંભે ભારતીય શેરબજારમાં જોવા મળેલો તીવ્ર ઉછાળો રોકાણકારો માટે આશાનું કિરણ લાવ્યો છે. જોકે, આ તેજી લાંબા ગાળા સુધી ટકી શકશે કે કેમ તે અંગે બજારના નિષ્ણાતો અને વિશ્લેષકોમાં સાવચેતીભર્યો દ્રષ્ટિકોણ જોવા મળી રહ્યો છે. એફઆઈઆઈ (FII) ની ભારે વેચવાલી સામે સ્થાનિક સંસ્થાકીય રોકાણકારો (DIIs) અને મ્યુચ્યુઅલ ફંડ્સે ભારતીય બજારને મજબૂત સપોર્ટ આપ્યો હોવાથી તેજી ટકી રહી છે. સંવત ૨૦૮૨ થી સંવત ૨૦૮૩ વચ્ચે એફઆઈઆઈએ આશરે રૂ. ૨.૭૬ લાખ કરોડની વેચવાલી કરી હતી, જેની સામે મ્યુચ્યુઅલ ફંડ્સે રૂ. ૫.૩૭ લાખ કરોડનું ભારે રોકાણ કરીને બજારને તૂટતા અટકાવ્યું હોવાનું નેશનલ સ્ટોક એક્સચેન્જના ડેટામાં દર્શાવવામાં આવી રહ્યું છે. 

વૈશ્વિક રોકાણ પ્રવાહમાં ફેરફાર

અમેરિકાના ટેકનોલોજી સેક્ટરના શેરોમાં જોવા મળેલા કરેક્શનને કારણે આંતરરાષ્ટ્રીય રોકાણકારો પોતાની મૂડી ભારત જેવા ઇમર્જિંગ માર્કેટ્સ તરફ ડાઇવર્ટ કરી રહ્યા છે. નિફ્ટી ૫૦નો ટ્રેલિંગ પી.ઈ. રેશિયો ૨૨.૭૨ થી ઘટીને ૨૦.૬૫ થયો છે. જ્યારે મિડકેપ ૧૫૦ અને માઇક્રોકેપ ૨૫૦ ના પી.ઈ. રેશિયોમાં ૧૭ થી ૨૦ ટકાનો ઘટાડો થયો છે, જે દર્શાવે છે કે શેરોના ભાવની સરખામણીએ કંપનીઓની કમાણીમાં સુધારો થયો છે.

સંવત ૨૦૮૩ માટેના મુખ્ય જોખમી પરિબળો 

અમેરિકી ટેક શેરોમાં મોટો કડાકો બોલાય તો એફઆઈઆઈ (FII) નું આઉટફ્લો વધી શકે છે અને ભારતીય બજાર પર દબાણ આવી શકે છે. અમેરિકામાં બોન્ડ થકી થતી આવકમાં-યીલ્ડમાં વધારો અને ક્રૂડ ઓઇલના ભાવમાં સભવિત ઉછાળો ભારતીય રૂપિયા અને ફુગાવા પર દબાણ લાવી શકે છે. ભારતીય બજારમાં નિફ્ટીમાં રિકવરી દેખાય છે, પરંતુ અંડરલાઇંગ બજાર નબળું છે. નિફ્ટી ૫૦૦ ના ૪૮૧ માંથી ૨૭૨ શેરો (૫૬.૫ ટકા શેર્સે)એ નેગેટિવ રિટર્ન આપ્યું છે અને ૧૨૯ શેરોમાં ૨૦ ટકાથી વધુનો કડાકો બોલાયો છે.

ઐતિહાસિક વલણ શું કહે છે?

વર્ષ ૨૦૦૦ થી સંવત-ટુ-સંવત ડેટા દર્શાવે છે કે જ્યારે પણ બજારમાં નેગેટિવ રિટર્ન આવ્યું છે, તે પછીના વર્ષે બજારે રિકવરી દર્શાવી છે. સંવત ૨૦૦૮ થી ૨૦૦૯ વચ્ચે નિફ્ટીમાં ૯૧.૫૩ ટકાઅને નિફ્ટી ૫૦૦ માં ૧૦૦.૭૬ ટકાનો અસાધારણ ઉછાળો આવ્યો હતો. ૨૦૧૨, ૨૦૧૬ અને ૨૦૨૩ પછી પણ ૯ થી ૧૦ ટકાની રિકવરી જોવા મળી હતી. ઐતિહાસિક રીતે, રિકવરીવાળા વર્ષોમાં પણ બજારમાં ૧૦ ટકાથી ૧૯ ટકાનો મહત્તમ ઘટાડો જોવા મળ્યો છે. એટલે કે તેજી સીધી રેખામાં નહીં થાય, પરંતુ ભારે ઉતાર-ચઢાવ જોવા મળશે.

એક્સપર્ટ્સના અભિપ્રાય

રાજેશ જૈન પહારીયા, માર્કેટ એનાલિસ્ટઃ 

“વૈશ્વિક ભૌગોલિક-રાજકીય તણાવ અને સપ્લાય ચેઇનના મુદ્દાઓને કારણે આયાત ખર્ચ વધી રહ્યો છે. રોકાણકારોએ માત્ર રેલી પાછળ દોડવાને બદલે કંપનીના મજબૂત ફંડામેન્ટલ્સ જોઈને જ રોકાણ કરવું જોઈએ.”

એસ. ચંદ્રશેખરન, ટ્રેડ પોલીસી એનાલિસ્ટઃ 

“ક્લાઇમેટ ફેક્ટર્સ અને ગ્લોબલ મેક્રો ઇકોનોમિક પરિબળો ટૂંકા ગાળા માટે બજારમાં વોલેટિલિટી જાળવી રાખશે. રોકાણકારોએ ઉચ્ચ વેલ્યુએશન ધરાવતા સ્મોલકેપ શેરોથી દૂર રહેવું જોઈએ.”

૩. સીરાજ હુસૈન, કૃષિ અર્થતંત્રના નિષ્ણાતઃ 

“બજારમાં તેજીની રિકવરી મુખ્યત્વે કોર્પોરેટ ગ્રોથ અને આંતરરાષ્ટ્રીય ચીજવસ્તુઓના ભાવ પર આધારિત રહેશે. સંવત ૨૦૮૩ માં સિલેક્ટિવ સ્ટોક પિકિંગ (Stock Specific Approach) જ શ્રેષ્ઠ વ્યૂહરચના બની રહેશે.”

દરેક રોકાણકાર અને ટ્રેડરને સૂચન

નવા રોકાણકારો: ઉછાળા પર ખરીદી કરવાના બદલે બજારમાં આવતા કરેક્શનનો ઉપયોગ કરીને તબક્કાવાર રોકાણ કરવું જોઈએ.

ટ્રેડર્સ: સ્ટોપ-લોસ વગર ટ્રેડિંગ ન કરવું, કારણ કે નિફ્ટીમાં ૧૦-૧૫ ટકાનો ઇન્ટ્રા-યર ડ્રોપડાઉન આવવાની પૂરી શક્યતા છે.

વેલ્યુએશન પર ધ્યાન: સ્મોલકેપ ૨૫૦ નો પી.ઈ. રેશિયો હજુ પણ ૩૦.૭૭ થી વધીને ૩૧.૯૯ થયો છે જે મોંઘો છે. તેથી લાર્જકેપ અને ગુણવત્તાયુક્ત મિડકેપ શેરો તરફ વલણ રાખવું જરૂરી છે.