વિદેશ પ્રવાસમાં લેવાતા આરોગ્ય વીમામાં તમામ સારવાર મળી શકતી નથી

બાળકને પહેલેથી ચોક્કસ બીમારી હોય અને તેના અનુસંધાનમાં જ કંઈક થાય તેવા કિસ્સાઓમાં સામાન્ય રીતે વિદેશના પ્રવાસનો વીમો આપતી કંપનીઓ કવરેજ માત્ર જીવલેણ કટોકટી હળવી કરી આપવા સુધી મર્યાદિત હોય છે

વિદેશ પ્રવાસે જતાં પરિવારના બાળકને પોલીસી લીધા પહેલાના 36 મહિનાના ગાળામાં કોઈ બીમારી થઈ હોવાનું અને તેના અનુસંધાનમાં જ વિદેશમાં તેને કોઈ બીમારી થઈ હોવાનું પ્રસ્થાપિત થાય તો તેવા સંજોગોમાં વિદેશ પ્રવાસ દરમિયાનનો આરોગ્ય વીમો હોવા છતાં તેને તે બીમારીનો ખર્ચ મળી શકતો નથી. દરેક વીમા કંપનીઓ તેને માટે અલગ શરત રાખે છે. આ બીમારી દરમિયાન વીમા ધારકના જીવ સામે જોખમ હોય તો તે જોખમ હળવું કરવા સુધી જ બીમારીની સારવારના ખર્ચને આવરી લેવામાં આવે છે. તેનાથી વધુ ખર્ચને આવરી લેવામાં આવતો નથી. તમારા બાળકને આંચકી આવવાની બીમારી હોય તો તેને તે માટેની પ્રાથમિક સારવાર મળી રહે છે. તે ગંભીર બની જાય તો તેની સંપૂર્ણ સારવાર મળી શકતી નથી. તેની ગંભીરતા હળવી કરવા સુધીની સારવાર જ અપાય છે. તેથી વીમો લેતા પહેલા જ તેની શરતોને સમજી લેવી જરૂરી છે.

તમે વિદેશનો પ્રવાસ કરો તે દરમિયાન આબોહવા પરિવર્તનને કારણે તમારા બાળકને તાવ, શરદી અથવા વાયરલ ઇન્ફેક્શન થાય, તો તેને સામાન્ય રીતે નવી અને અણધારી બીમારી ગણવામાં આવે છે. આવા કિસ્સાઓમાં મોટાભાગની વ્યાપક પોલિસીઓ આઉટપેશન્ટ ડિપાર્ટમેન્ટના હેઠળ મળતા લાભો એટલે કે ડોક્ટરની સલાહ, નિદાન અને સૂચવેલી દવાઓ સહિતના તબીબી રીતે જરૂરી ખર્ચાઓને આવરી લે છે.

તમે તમારા પરિવાર સાથે વિદેશમાં રજાઓ ગાળવા ગયા હોવ તે વખતે અચાનક તાવ અથવા વાયરલ ઇન્ફેક્શન તણાવ પેદા કરી શકે છે, ખાસ કરીને જ્યારે તમે બાળકો સાથે મુસાફરી કરી રહ્યા હોવ ત્યારે આ જોખમ વધારે રહે છે. ટ્રાવેલ ઇન્સ્યોરન્સના નિષ્ણાતો કહે છે કે વ્યાપક ટ્રાવેલ ઈન્સ્યોરન્સ વિદેશમાં ડોક્ટરની સલાહ અને તબીબી સારવારના ખર્ચને આવરી લે છે, પરંતુ તેને માટે પણ પોલિસીની શરતો પર ધ્યાન આપવું મહત્વનું છે. તેમાં રૂટિન અથવા બીમારી નિવારવા માટેના ચેક-અપનો સમાવેશ કરવામાં આવતો નથી, કારણ કે ટ્રાવેલ ઈન્સ્યોરન્સ મુસાફરી દરમિયાન અણધારી તબીબી જરૂરિયાતો માટે હોય છે.

આમ તો વિદેશ પ્રવાસ કરતા પરિવારો માટે, ખાસ કરીને નાના બાળકો સાથે વિદેશ પ્રવાસ કરનારાઓ માટેની ટ્રાવેલ ઈન્સ્યોરન્સ પોલિસીના સમયગાળા દરમિયાન અણધારી તબીબી ઘટનાઓને આવરી લેવા માટે બનાવવામાં આવ્યો છે. છતાં તેમાં સંપૂર્ણ કવરેજ મળતું નથી. આંશિક કવરેજ આપવામાં આવે છે. તેથી જ વિદેશ પ્રવાસ માટેનો વીમો લેનારાઓએ તેની શરતોનો અભ્યાસ કરી લેવો જરૂરી છે.

વિદેશની મુસાફરી દરમિયાન અચાનક થતી બીમારીઓ જેમ કે તાવ, ફ્લૂ, ફૂડ પોઈઝનિંગ અથવા ઈન્ફેક્શન થાય તો તેની સારવાર મળી શકે છે. વિદેશમાં ઈમરજન્સી ડોક્ટર કન્સલ્ટેશન અને હોસ્પિટલમાં દાખલ થવાનો ખર્ચ આપવામાં આવે છે. તેમ જ ડાયગ્નોસ્ટિક ટેસ્ટ, દવાઓ અને ઇમરજન્સી મેડિકલ પ્રક્રિયાઓ માટેનો ખર્ચ પણ આપવામાં આવે છે. તબીબી સ્થળાંતર એટલે કે તબીબી કારણઓસર મેડિકલ ઇવેક્યુએશન કરવાની કે પછી ઇમરજન્સી ટ્રાન્સપોર્ટેશન જરૂર ઊભી થાય તો તે ખર્ચ આપવામાં આવે છે. પહેલેથી અસ્તિત્વમાં રહેલા રોગો માટે કવરેજ સામાન્ય રીતે માત્ર ઈમરજન્સી સ્ટેબિલાઈઝેશન સુધી મર્યાદિત હોય છે. રૂટિન હેલ્થ ચેક-અપ, આયોજિત સારવાર અને કોસ્મેટિક પ્રક્રિયાઓ બાકાત રાખવામાં આવે છે.