હોસ્પિટલમાં વપરાતી મેડિકલ ડિવાઈઝની પડતર કિંમત અને દરદી પાસે વસૂલેલી કિંમત અલગથી દર્શાવવી પડશેઃ

મેડિકલ ડિવાઈઝના બેફામ ભાવ લઈને હોસ્પિટલ્સ દ્વારા ચલાવવામાં આવતી લૂંટ પર નિયંત્રણ આવશે

હોસ્પિટલ્સમાં ઊઘાડી લૂંટ ચાલી રહી છે. અપર મિડલ ક્લાસના પરિવારના કોઈ સભ્યને બે મહિના સુધી કોર્પોરેટ હોસ્પિટલ્સમાં સારવાર લેવાની નોબત આવે તો તે અપર મિડલ ક્લાસ પરિવાર બે મહિના પછી બિલો પોવર્ટી લાઈનની કેટેગરીમાં આવી જાય છે. આ પરિસ્થિતિથી લોકોને બચાવવા અને હોસ્પિટલની ચાર્જિંગ સિસ્ટમમાં પારદર્શકતા લાવવા માટે સરકારે પ્રયાસ ચાલુ કર્યા છે.

હોસ્પિટલના બિલિંગમાં પારદર્શિતા અને યુનિફોર્મ નેશનલ ફ્રેમવર્ક

કેન્દ્રીય આરોગ્ય મંત્રાલય દ્વારા હોસ્પિટલોના દરેક સારવારના દરો દરદીઓ અને તેમના સ્વજનનો દેખાય તે રીતે બોર્ડ પર મૂકવાનો  નિર્દેશ અને કર્ણાટક FDA દ્વારા હોસ્પિટલના બિલમાં ડિવાઇસની હોસ્પિટલની પડતર કિંમત અને છૂટક કિંમત દર્શાવવાનું ફરજિયાત કરવામાં આવ્યું છે. તેમના આ આદેશને ને AiMeD એ આવકાર્યો છે. એઆઈએમઈડીના રાજીવ નાથના જણાવ્યા મુજબ, પારદર્શિતા માત્ર હોસ્પિટલના અંતિમ બિલ સુધી સીમિત ન રહેવી જોઈએ. આયાત લેન્ડેડ કોસ્ટ અથવા ઉત્પાદકના એક્સ-ફેક્ટરી ભાવથી લઈને પ્રથમ વેચાણ બિંદુ સુધી માર્જિન ટ્રેસ થવું જોઈએ. સંગઠને સમગ્ર દેશમાં આ માટે એક સમાન રાષ્ટ્રીય નીતિ બનાવવાની વિનંતી કરી છે, જેની ડિઝાઇનમાં એઆઈએમઈડી મદદ કરવા તૈયાર છે.

ભારતીય ઉત્પાદનની વૈશ્વિક સ્પર્ધાત્મકતામાં વધારો

જીએસટી કાઉન્સિલ દ્વારા સંગ્રહિત ઇનપુટ ટેક્સ ક્રેડિટનું રિફંડ આપવાની ભલામણ નું AiMeD એ સ્વાગત કર્યું છે. અગાઉ કેપિટલ ઇન્વેસ્ટમેન્ટ અને આઉટસોર્સ્ડ સર્વિસ પર ચૂકવેલ જીએસટી બ્લોક રહેતો હતો, જેનાથી મેન્યુફેક્ચરિંગ કોસ્ટ વધતી હતી. આ ઐતિહાસિક સુધારાથી “મેઇક ઇન ઇન્ડિયા” ને મોટો વેગ મળશે અને ભારતીય બનાવટના મેડિકલ ડિવાઇસ વૈશ્વિક સ્તરે સ્પર્ધાત્મક બનશે.

સિંગલ-યુઝ મેડિકલ ડિવાઇસના પુનઃઉપયોગ પર પ્રતિબંધ

ડિરેક્ટોરેટ જનરલ ઓફ હેલ્થ સર્વિસિસે ૧૬ ઓક્ટોબર ૨૦૨૬ના રોજ સરકારી અને ખાનગી હોસ્પિટલોમાં સિંગલ-યુઝ મેડિકલ ડિવાઇસ અને ડિસ્પોઝેબલ સર્જિકલ આઇટમ્સના રિયુઝ (પુનઃઉપયોગ) પર મૂકવામાં આવેલા પ્રતિબંધને AiMeD એ દર્દીઓની સુરક્ષા માટેનો ઐતિહાસિક નિર્ણય ગણાવ્યો છે. એક જ વાર વાપરવા માટે બનેલા ડિવાઇસને સાફ કે રી-સ્ટરલાઇઝ કરીને ફરી વાપરવાથી ક્રોસ-ઇન્ફેક્શન અને ડિવાઇસ ફેલ્યોરનું ભારે જોખમ રહે છે. જો કોઈ હોસ્પિટલ કે વ્યક્તિ લેબલ પર લખેલી સૂચનાથી વિપરીત રિયુઝ કરે અને કોઈ હોનારત થાય, તો તેની જવાબદારી ઉત્પાદકની રહેશે નહીં પરંતુ પુનઃઉપયોગ કરનાર સંસ્થાની રહેશે.

AiMeD દ્વારા કરવામાં આવેલી મુખ્ય ૫ ભલામણો 

કડક અને નિયમિત તપાસ: આરોગ્ય સંસ્થાઓની નિયમિત તપાસ કરવી અને સાધનોના ઉપયોગ તથા નિકાલનો શોધી શકાય તેવો રેકોર્ડ રાખવો ફરજિયાત કરવો જોઈએ. બે, મેડિકલ ડિવાઇસ રૂલ્સ, ૨૦૧૭ અને ક્લિનિકલ એસ્ટાબ્લિશમેન્ટ્સ એક્ટ, ૨૦૧૦ હેઠળ પુનઃઉપયોગ કરનારા સામે ચોક્કસ કાનૂની પગલાં લેવા જોઈએ. ત્રણ, હોસ્પિટલ સ્ટાફને ઇન્ફેક્શન કન્ટ્રોલ અને બાયોમેડિકલ વેસ્ટ હેન્ડલિંગ અંગે યોગ્ય તાલીમ આપવી જોઈએ. ચાર, લેબલિંગથી વિપરીત રિયુઝ કરવાથી થતી કોઈ પણ નિષ્ફળતા માટે ઉત્પાદક જવાબદાર નથી તેવી સ્પષ્ટ કાનૂની જોગવાઈ કરવી જરૂરી છે. પાંચ, વધુ સુરક્ષિત અને આર્થિક રીતે પરવડે તેવા સિંગલ-યુઝ વિકલ્પો પૂરા પાડવા જેથી કિંમતના કારણે કોઈ રિયુઝ કરવા મજબૂર પણ થાય જ નહિ.