એવરેસ્ટના જીરા પાવડરમાંથી ક્ષમતા કરતા વધુ જંતુનાશકો મળ્યા: FSSAIએ ઈમેજિએટ બેચ પાછી ખેંચવા કંપનીને આદેશ આપ્યો

નવી દિલ્હી: ખાદ્ય સુરક્ષા નિયામક ફૂડ સેફ્ટી એન્ડ સ્ટેન્ડર્ડ્સ ઓથોરિટી ઓફ ઈન્ડિયા (FSSAI) દ્વારા જાણીતી મસાલા ઉત્પાદક કંપની એવરેસ્ટ ફૂડ પ્રોડક્ટ્સ (Everest Food Products) ના પ્રી-પેક્ડ જીરા પાવડર (Cumin Powder)ની ચોક્કસ બેચને માર્કેટમાંથી તુરંત જ પાછી ખેંચી લેવા (રીકોલ) આદેશ આપવામાં આવ્યો છે. લેબોરેટરી ટેસ્ટિંગમાં આ જીરા પાવડર ખાદ્ય સામગ્રી તરીકે વાપરવા માટે અસુરક્ષિત જાહેર કરવામાં આવ્યો છે.

તપાસમાં શું સામે આવ્યું?

FSSAI દ્વારા આપવામાં આવેલી માહિતી અનુસાર, ગોવા સ્થિત ‘રિવરસાઇડ રિસોર્ટ્સ એન્ડ હોલિડે હોમ્સ’ ના પરિસરમાંથી એવરેસ્ટના “પ્રી-પેક્ડ જીરા પાવડર” નું સેમ્પલ લેવામાં આવ્યું હતું. ફૂડ એનાલિસ્ટના રિપોર્ટમાં આ સેમ્પલમાં ‘એઝોક્સીસ્ટ્રોબિન’ (Azoxystrobin) અને ‘થિયામેથોક્સામ’ (Thiamethoxam) નામના જંતુનાશક રસાયણોના અવશેષો નિયત મહત્તમ મર્યાદા કરતા વધુ પ્રમાણમાં મળી આવ્યા હતા. જેના કારણે ખાદ્ય સુરક્ષા અને માપદંડ કાયદા, ૨૦૦૬ (Food Safety and Standards Act, 2006) હેઠળ આ સેમ્પલને ‘અસુરક્ષિત’ જાહેર કરવામાં આવ્યું હતું.

કંપનીની અપીલ બાદ પણ સેમ્પલ ફેલ

નિયમ મુજબ એવરેસ્ટ ફૂડ પ્રોડક્ટ્સને આ રિપોર્ટ સામે અપીલ કરવાની તક આપવામાં આવી હતી. કંપનીની અપીલ બાદ સેમ્પલને રેફરલ ફૂડ લેબોરેટરીમાં મોકલવામાં આવ્યું હતું, જ્યાં રી-ટેસ્ટિંગમાં પણ આ જીરા પાવડર અસુરક્ષિત હોવાની પુષ્ટિ થઈ હતી.

FSSAI દ્વારા કડક સૂચનાઓ:

• બેચ નંબર E080668761 રીકોલ: FSSAI એ જીરા પાવડરની આ ચોક્કસ બેચ (Batch No. E080668761) ના તમામ પેકેટ્સને બજારમાંથી તાત્કાલિક પાછા ખેંચી લેવાનો આદેશ આપ્યો છે.

• રેકોર્ડ અને રિપોર્ટિંગ: કંપનીએ પાછા ખેંચાયેલા પ્રોડક્ટ્સનો સંપૂર્ણ રેકોર્ડ રાખવો પડશે અને સમયમર્યાદામાં તેની સ્થિતિનો રિપોર્ટ FSSAI ને સબમિટ કરવાનો રહેશે.

• સુધારાત્મક પગલાં: ભવિષ્યમાં આવી ઘટના ન બને તે માટે કંપનીને જરૂરી સુધારાત્મક પગલાં લેવા અને રીકોલ પ્રક્રિયા પૂર્ણ થયા બાદ અહેવાલ સોંપવા જણાવાયું છે.

આ સિવાય, FSSAI એ એક અન્ય કાર્યવાહીમાં ગંભીર અસ્વચ્છતા અને સુચિતાના અભાવને કારણે ‘ક્રિએટિવ બેકર્સ એન્ડ કન્ફેક્શનર્સ’ (Creative Bakers and Confectioners) નું લાઇસન્સ પણ સસ્પેન્ડ કર્યું છે.