અસુરક્ષિત ખાદ્ય નમૂના પકડાતા FSSAI બિસ્લેરી, વસંત મસાલા સામે કેસ ચલાવવા મંજૂરી આપી

અસુરક્ષિત ખાદ્ય નમૂના પકડાતા FSSAI બિસ્લેરી, વસંત મસાલા સામે કેસ ચલાવવા મંજૂરી આપી
ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયા-એફએસએસએઆઈ દ્વારા ખાદ્ય સુરક્ષાના નિયમોનું ઉલ્લંઘન કરવા બદલ દેશની બિસ્લેરી ઈન્ટરનેશનલ, વસંત મસાલા પ્રાઈવેટ લિમિટેડ, ટિટ-બિટ ફૂડ્સ, આશા કન્ફેક્શનરી અને મીમાંસા ઈન્ડસ્ટ્રીઝ પ્રાઈવેટ લિમિટેડ સહિતની કંપનીઓ સામે કાનૂની કાર્યવાહી શરૂ કરવાની મંજૂરી આપી છે. એફએસએસએઆઈ દ્વારા સોશિયલ મીડિયા પર આ અંગે સત્તાવાર માહિતી આપતા જણાવવામાં આવ્યું છે કે, વિવિધ કંપનીઓના ખાદ્ય અને પીણાના નમૂનાઓ તપાસમાં અસુરક્ષિત જણાયા બાદ ફૂડ સેફ્ટી એન્ડ સ્ટાન્ડર્ડ્સ (FSS) એક્ટ હેઠળ આ પગલું ભરવામાં આવ્યું છે.
કઈ કંપનીના નમૂનામાં શું ખામી મળી?
-
બિસ્લેરી ઈન્ટરનેશનલ: કંપનીનો નિયમનકારી નમૂનો નિર્ધારિત ‘બ્રોમેટ મર્યાદા’ મુજબનો ન જણાતા ફૂડ સેફ્ટી સ્ટાન્ડર્ડ એક્ટ હેઠળ અસુરક્ષિત જાહેર કરાયો હતો. આ નમૂનો રેફરલ ફૂડ લેબમાં મોકલવામાં આવતા ત્યાં પણ તેમાં PAHs (પોલિસાયક્લિક એરોમેટિક હાઇડ્રોકાર્બન્સ) મળી આવતા તેને અસુરક્ષિત જાહેર કરાયો છે. જેના પગલે બિસ્લેરી સામે કેસ ચલાવવાની મંજૂરી આપવામાં આવી છે.
-
વસંત મસાલા પ્રાઈવેટ લિમિટેડ: વસંત મસાલાના મરચા પાવડરનો નમૂનો રેફરલ લેબની તપાસમાં પણ અસુરક્ષિત સાબિત થયો છે.
-
ટિટ-બિટ ફૂડ્સ ઈન્ડિયા પ્રાઈવેટ લિમિટેડ: આ કંપનીના પ્રી-પેકેજ્ડ હળદર પાવડર અને મરચા પાવડરના નમૂનાઓમાં જંતુનાશકોના અવશેષો નિર્ધારિત મર્યાદા કરતા વધુ મળી આવતા તે અસુરક્ષિત જાહેર થયા છે.
-
મીમાંસા ઈન્ડસ્ટ્રીઝ પ્રાઈવેટ લિમિટેડ : કંપનીના અખરોટના ગર્ભ -માનવના ખાવા પાત્ર હિસ્સાનો નમૂનો તપાસમાં અસુરક્ષિત જણાયો છે.
-
આશા કન્ફેક્શનરી: અન્ય નિયમોના ઉલ્લંઘન બદલ આ કંપની સામે પણ કાર્યવાહીની મંજૂરી આપવામાં આવી છે. તમામ નમૂનાઓ લેબોરેટરી પરીક્ષણમાં નિષ્ફળ જતાં ગ્રાહકોના સ્વાસ્થ્ય સાથે ચેડાં ન થાય તે હેતુથી એફએસએસએઆઈ દ્વારા આ તમામ કંપનીઓ સામે કોર્ટમાં કેસ દાખલ કરવાની મંજૂરી આપી દેવામાં આવી છે.
