કેન્સરની દવાઓ પર NPPAના નવા દર નિયંત્રણ બાદ ફાર્મા ક્ષેત્રમાં સંકટ: કંપનીઓનું બહાનું કે વાસ્તવિકતા?

કેન્સરની દવાઓ પર NPPAના નવા દર નિયંત્રણ બાદ ફાર્મા ક્ષેત્રમાં સંકટ: કંપનીઓનું બહાનું કે વાસ્તવિકતા?

માર્કેટમાં પહોંચી ચૂકેલી દવાઓ પરત મંગાવી નવેસરથી લેબલ લગાવીને નવ નવેમ્બર સુધીમાં બજારમાં પાછી મોકલવી કઠિન

કેન્દ્ર સરકારના કેન્દ્રીય ડ્રગ રેગ્યુલેટર દ્વારા કેન્સરની દવાઓ પર ટ્રેડ માર્જિન રેશનલાઈઝેશન-ટ્રેડ માર્જિનને સમતોલ કરવાનો કડક આદેશ બહાર પાડ્યો તે પછી ઓન્કોલોજી (કેન્સર) ક્ષેત્રે કામ કરતી ફાર્મા ઉત્પાદક અને માર્કેટિંગ કંપનીઓ વિમાસણમાં મુકાઈ છે. ઓર્ડર જાહેર થયાના માત્ર 7 દિવસની અંદર NPPA અને સ્ટેટ ડ્રગ કંટ્રોલર્સને રિવાઇઝ્ડ પ્રાઇઝ ફોર્મ એટલે કે એનેક્સર-1 સબમિટ કરવું, માર્ચ 2026 કે 12 મહિનાના વેચાણ ડેટાના આધારે ભાવ ગણતરી કરવી, રાષ્ટ્રીય દૈનિક અખબારોમાં જાહેર નોટિસ આપવી અને 9 નવેમ્બર પહેલા નવા ભાવના સ્ટીકર સાથે સ્ટોક માર્કેટમાં ઉતારવા સહિતની તમામ કાયદાકીય શરતો એકસાથે પૂરી કરવાનો કંપનીઓ પર મોટો બોજ આવ્યો છે.

કંપનીઓનું બહાનું કે વાસ્તવિકતા?

કંપનીઓ જે દલીલો કરી રહી છે તેમાં અમુક અંશે વાસ્તવિક લોજિસ્ટિકલ મુશ્કેલીઓ છે, પરંતુ તેનો બીજો પાસો નફા પર કાપ મુકાવાના કારણે કંપનીઓ દ્વારા કરાતો વિલંબ કે બહાના પણ હોઈ શકે છે.

NPPA ના આદેશના મુખ્ય કાયદાકીય અને ઓપરેશનલ પાસાઓ

1. નવા ભાવ અને જાહેરાત: દરેક કંપનીએ પોતાના નવા ભાવ અંગે રાષ્ટ્રીય વર્તમાનપત્રોમાં જાહેર ખબર આપવી પડશે અને પોતાની સત્તાવાર વેબસાઈટ પર મૂકવું પડશે.
2. IPDMS પોર્ટલ ફાઇલિંગ: 9 નવેમ્બરની અમલીકરણ તારીખ પહેલા દેશભરના ડીલરોને નવા ભાવનું પત્રક (Form V) પોર્ટલ દ્વારા મોકલવાનું રહેશે.
3. ઉત્પાદન ચાલુ રાખવાની કડક સૂચના: કંપનીઓ ભાવ ઘટાડાના કારણે ઉત્પાદન ઘટાડી શકશે નહીં. સરેરાશ માસિક ઉત્પાદન જાળવી રાખવું ફરજિયાત છે. જો ઉત્પાદન બંધ કરવું હોય તો Form-IV ભરીને 6 મહિના અગાઉ મંજૂરી લેવી પડશે.

4. ઉલ્લંઘન પર કડક કાર્યવાહી: જો કંપની નિયમોનું પાલન નહીં કરે તો ‘એસેન્શિયલ કમોડિટીઝ એક્ટ, 1955’ હેઠળ કાયદાકીય કાર્યવાહી અને વ્યાજ સાથે પેનલ્ટી વસૂલવામાં આવશે.