SIPમાં રોકાણ રૂ. 2500થી શરૂ કરી રૂ. 70,000નું માસિક રોકાણ કર્યું, યુવાનનો પોર્ટફોલિયો નવ વર્ષમાં 1 કરોડને પાર ગયો

રૂ. 2,500થી શરૂ કરી માસિક રૂ. 70,000 ની SIP કરનાર યુવાનનો પોર્ટ ફોલિયો નવ વર્ષમાં રૂ. 1 કરોડને આંબી ગયો 

જીવનશૈલીનો મોહ તમારા આખા પગાર વધારાને હડપ ન કરી જાય તેનું ધ્યાન રાખવું કેટલું મહત્વપૂર્ણ છે. જેમ જેમ તેમની આવક સુધરી, તેમ તેમ તેમની રોકાણની રકમ પણ વધવી જોઈએ.

દર મહિને રૂ. 2,500 ની SIP આખરે વધીને દર મહિને રૂ. 70,000 નું રોકાણ અને રૂ. 1 કરોડથી વધુનો પોર્ટફોલિયો બની ગયો છે. આ સફળતા છે પૂણેના મયુરેશ જાધવની. રોકાણ કરવામાં શિસ્ત અને આવક વધતા રોકાણ વધારતા જઈને તેણે કરેલા આયોજને તેને મોટી સફળતા અપાવી છે.  આજે તે દર મહિને રૂ. 70,000ની એસઆઈપી કરે છે. મયૂરેશ જાદવે 2013 માં પોતાની કારકિર્દી શરૂ કરી હતી, પરંતુ 2017 માં દર મહિને માત્ર રૂ. 2,500ની SIPથી ગંભીરતાપૂર્વક રોકાણ કરવાનું શરૂ કર્યું હતું. આજે, 35 વર્ષની ઉંમરે, તેઓ મ્યુચ્યુઅલ ફંડમાં દર મહિને લગભગ રૂ. 70,000 નું રોકાણ કરે છે અને તેમણે લગભગ રૂ. 1.03 કરોડની નાણાકીય સંપત્તિ બનાવી લીધી છે.

તેમની આ યાત્રા બિલકુલ સંપૂર્ણ ન હતી. તેમણે એક ફાયનાન્સિયલ પ્રોડક્ટ તેને પૂરી રીતે સમજ્યા વગર ખરીદી લીધી હતી. તેમની પાસે ચૂકવવા માટે લોન હતી. તેમણે પોતાના માતાપિતાને આર્થિક ટેકો આપ્યો અને પોતાની બહેનના લગ્નમાં યોગદાન આપ્યું હતું. તેમણે એક એવી પ્રોપર્ટી પણ ખરીદી કે જેનું રિટર્ન તેમના ઇક્વિટી રોકાણોની સરખામણીમાં મર્યાદિત રહ્યું છે. છતાં, જેમ જેમ તેમની આવક વધતી ગઈ તેમ તેમ તેમણે પોતાનું રોકાણ વધારવાનું ચાલુ રાખ્યું હતું. આમ રોકાણ કરવામાં એક ડિસિપ્લિન જાળવી રાખી હતી. આ તેમની સફર વ્યક્તિની આદતો અને નિર્ણયો વિશેની છે. તેના ઉત્કૃષ્ટ નાણાકીય યોજના ન હોવા છતાં પણ સંપત્તિ બનાવવામાં મદદ કરી શકે છે.

રોકાણકારો એસઆઈફી શરૂ કરવાનું વિચારે છે, ત્યારે તેઓ ઘણીવાર ચિંતા કરે છે કે નાની રકમથી બહુ મોટો તફાવત નહીં પડે. પરંતુ પહેલી એસઆઈપીનો હેતુ તરત જ મોટું ભંડોળ ઊભું કરવાનો નથી હોતો. તેનો હેતુ આદત પાડવાનો છે. મયુરેશે રૂ. 2,500 થી શરૂઆત કરી હતી. તેમની એસઆઈપી રૂ. 2,500 થી વધીને રૂ. 5,000, પછી રૂ. 8,000-10,000, ત્યારબાદ રૂ. 25,000 અને રૂ. 40,000 થઈને આજે લગભગ રૂ. 70,000 સુધી પહોંચી છે. મયુરેશના નાણાકીય જીવનમાં સૌથી મોટો ફેરફાર કોઈ ચોક્કસ મ્યુચ્યુઅલ ફંડ ન હતો. તે તેમનો પગાર હતો. તેમણે 2013 માં લગભગ રૂ. 2.4 લાખના વાર્ષિક પેકેજ સાથે શરૂઆત કરી હતી. આજે તેમનું વાર્ષિક પેકેજ લગભગ રૂ. 40 લાખ છે. જેમ જેમ તેમની આવક વધી તેમ તેમની પાસે બચત અને રોકાણ કરવા માટે વધુ નાણાં ઉપલબ્ધ થયા. આ એક એવો મહત્વપૂર્ણ મુદ્દો છે જે રોકાણની ચર્ચાઓમાં ઘણીવાર ભુલાઈ જાય છે.

આવક વધે તેમ તેમ રોકાણ વધારો

રોકાણકારો 12 ટકા, 13 ટકા કે 14 ટકા રિટર્ન આપનારા ફંડ્સની સરખામણી કરવામાં ઘણો સમય વિતાવે છે. પરંતુ કારકિર્દીની શરૂઆતમાં હોય તેવી વ્યક્તિ માટે, રોકાણની રકમ વધારવાથી અંતિમ ભંડોળ પર ખૂબ મોટી અસર પડી શકે છે. આવક અથવા બચત ક્ષમતામાં નોંધપાત્ર વધારા વિના રૂ. 2,500 ની SIP અચાનક રૂ. 70,000 થઈ શકતી નથી. તેથી સંપત્તિનું સર્જન એ માત્ર રોકાણની સમસ્યા નથી, પણ આવક વૃદ્ધિની પણ બાબત છે. રોકાણકારે તેના પગારના દરેક વધારાને જીવન શૈલી સુધારવામાં વાપરી નાખવો ન જોઈએ. વધારાનો પગાર બે વિકલ્પો આપે છે. તમે તમારો ખર્ચ વધારી શકો છો અથવા બચત અને રોકાણની રકમ વધારી શકો છો. આદર્શ રીતે, તમારે બંને થોડું-થોડું કરવું જોઈએ. મયુરેશની સફર દર્શાવે છે કે જીવનશૈલીનો મોહ તમારા આખા પગાર વધારાને હડપ ન કરી જાય તેનું ધ્યાન રાખવું કેટલું મહત્વપૂર્ણ છે. જેમ જેમ તેમની આવક સુધરી, તેમ તેમ તેમની રોકાણની રકમ પણ વધવી જોઈએ. જીવન શૈલી માટેનો ખર્ચ ભાવિની અસલામતી વધારી શકે છે.

ખૂબ મોટો ત્યાગ કરી રહ્યા છો તેવું અનુભવ્યા વિના સંપત્તિ બનાવવાની આ એક સૌથી સરળ રીત છે. એકવાર રોકાણ નક્કી કરીને તેને આજીવન સરખું રાખવાને બદલે, તમે તમારી આવકની સાથે તમારા રોકાણને પણ વધારી શકો છો. દરેક પગાર વધારો એ તમારી ભવિષ્યની સંપત્તિ વધારવાની એક તક છે. બીજી વાત અલગ લાગી તે એ હતી કે મયુરેશ તેમની સમગ્ર આવક રોકાણ માટે ઉપલબ્ધ હોય તેવી સ્થિતિમાં નહોતા. તેમની પાસે કૌટુંબિક જવાબદારીઓ હતી. તેમણે પોતાના માતાપિતાને આર્થિક ટેકો આપ્યો અને પોતાની બહેનના લગ્ન માટે પણ રૂ. 7-8 લાખનું યોગદાન આપ્યું. સાથે સાથે, તેમની પાસે લોનની ચુકવણી અને પોતાના ઘરના ખર્ચાઓ પણ હતા.

આ મહત્વપૂર્ણ છે કારણ કે પર્સનલ ફાયનાન્સની સલાહ સાંભળીને ક્યારેક એવું લાગે છે કે સંપત્તિનું સર્જન કોઈ અલગ જ દુનિયામાં થાય છે. વાસ્તવિકતામાં, લોકોને માતાપિતા, ભાઈ-બહેન, જીવનસાથી અને અન્ય જવાબદારીઓ હોય છે. રોકાણ શરૂ કરતા પહેલાં તમારી પાસે કોઈ નાણાકીય જવાબદારી ન હોય તેવા સમયની રાહ જોવાનો અર્થ એ થઈ શકે છે કે તમારે કાયમ માટે રાહ જોવી પડશે.

જીવન વીમાની પોલીસી કેટલી જરૂરી

શરૂઆતના વર્ષોમાં રકમ નાની રાખવી પડે તો પણ જવાબદારીઓની સાથે જ રોકાણ કરવું એ વધારે સારો અભિગમ હોઈ શકે છે. મયુરેશની સૌથી મોટી નાણાકીય ભૂલ એ સૌથી સામાન્ય ભૂલ પણ હતી. તેમણે જીવન વીમાની પોલિસી એટલા માટે ખરીદી કારણ કે તેમની ઓળખીતી વ્યક્તિએ તેની ભલામણ કરી હતી. તે સમયે તેઓ આ પ્રોડક્ટને પૂરી રીતે સમજતા નહોતા. આખરે, તેમને સમજાયું કે તે તેમના માટે યોગ્ય ન હતી. તેને લગભગ આઠથી નવ વર્ષ સુધી રાખ્યા પછી, તેઓ બહાર નીકળી ગયા અને તેમણે જેટલું રોકાણ કર્યું હતું તેના માત્ર 70 ટકા રકમ જ પરત મળી હતી. અનુભવે તેમને એક સરળ પાઠ આપ્યો કે તમે વિશ્વાસ મૂકો છો તેવી વ્યક્તિની ભલામણ માત્રથી જ કોઈ ફાયનાન્સિયલ પ્રોડક્ટ તમારા માટે યોગ્ય બની જતી નથી. કોઈપણ રોકાણ કે વીમા પ્રોડક્ટ ખરીદતા પહેલા, તમે શું ચૂકવી રહ્યા છો, તમને શું પરત મળી શકે છે, તેનો લોક-ઈન પિરિયડ કેટલો છે અને જો તમે સમય પહેલાં બહાર નીકળો તો શું થશે તે સમજો. તેમના અનુભવમાંથી મેળવવા જેવો એક જ નિયમ છે: જો તમે પ્રોડક્ટને સરળ શબ્દોમાં સમજાવી શકતા નથી, તો તેને અત્યારે ખરીદશો નહીં.

એમ્પ્લોયી પ્રોવિડન્ટ ફંડ દર્શાવે છે કે સંપત્તિનું સર્જન હંમેશા સક્રિય હોવું જરૂરી નથી

જ્યારે આપણે સંપત્તિ બનાવવા વિશે વાત કરીએ છીએ, ત્યારે સામાન્ય રીતે ધ્યાન મ્યુચ્યુઅલ ફંડ, સ્ટોક્સ અને અન્ય રોકાણો પર હોય છે. પરંતુ મયુરેશના EPF એ શાંતિથી તેમના પોર્ટફોલિયોનો એક મહત્વપૂર્ણ હિસ્સો બનાવી દીધો છે. તેમનું એમ્પ્લોયી પ્રોવિડન્ટ ફંડ લગભગ રૂ. 32 લાખ છે. આ ફંડ બનાવવા માટે તેમણે દર મહિને કયો સ્ટોક ખરીદવો કે બજારમાં ક્યારે પ્રવેશ કરવો તે સક્રિયપણે નક્કી કરવાની જરૂર નહોતી પડી. તે તેમની નોકરી અને નિયમિત યોગદાન દ્વારા એકઠું થયું હતું. આ એક ઉપયોગી યાદ અપાવે છે કે સંપત્તિ નિર્માણના કેટલાક સૌથી અસરોકારક સાધનો પૃષ્ઠભૂમિમાં શાંતિથી કામ કરે છે. તમે કદાચ માસિક એમ્પ્લોયી પ્રોવિડન્ટ ફંડમાં યોગદાન પર ધ્યાન ન આપો. પરંતુ 10 કે 15 વર્ષોમાં, તે યોગદાન તમારી કુલ સંપત્તિનો અર્થપૂર્ણ ભાગ બની શકે છે.

ધનવાન બનવા માટે તમારે પરફેક્ટ પોર્ટફોલિયોની જરૂર નથી

મયુરેશે તેમની રોકાણ સફરની શરૂઆત પરફેક્ટ પોર્ટફોલિયો સાથે નહોતી કરી. જેમ જેમ તેઓ શીખતા ગયા તેમ તેમ તેમનું રોકાણ વિકસતું ગયું. તેમણે મ્યુચ્યુઅલ ફંડમાં રોકાણ કર્યું, પછીથી સોનું અને અમેરિકી કંપનીઓના સ્ટોક્સ ઉમેર્યા, અને એક ઈમરજન્સી ફંડ પણ બનાવ્યું છે. કેટલાક રોકાણોએ બીજા કરતા વધુ સારું પ્રદર્શન કર્યું. ઉદાહરણ તરીકે, તેમની પુણેની પ્રોપર્ટીએ તેમના ઇક્વિટી રોકાણોની સરખામણીમાં બહુ ઉત્સાહજનક રિટર્ન આપ્યું નથી. છતાં એકંદરે પોર્ટફોલિયો સતત વધતો રહ્યો છે. આ એક એવી બાબત છે જેને રોકાણકારો ઘણીવાર અંડરએસ્ટીમેટ કરે છે. એવી માન્યતા હોય છે કે સફળ રોકાણકારોએ શરૂઆતથી જ સાચી સંપત્તિ, સાચું ફંડ અને સાચી વ્યૂહરચના પસંદ કરી હોવી જોઈએ. વાસ્તવિક જીવનની નાણાકીય યાત્રાઓ સામાન્ય રીતે વધુ ગૂંચવણભરી હોય છે. ધ્યેય દરેક નિર્ણય સાચો પાડવાનો નથી. ધ્યેય શીખવાનો, ભૂલો સુધારવાનો અને મૂળ યોજના છોડ્યા વિના સતત સુધારો કરવાનો છે.

પ્રોપર્ટી એ હંમેશા તમારું શ્રેષ્ઠ રિટર્ન આપતું રોકાણ હોવું જરૂરી નથી

મયુરેશની પુણેની પ્રોપર્ટી એક રસપ્રદ ઉદાહરણ છે. તેમણે આ ફ્લેટ લગભગ રૂ. 57 લાખમાં ખરીદ્યો હતો. તેની કિંમત હવે લગભગ રૂ. 75 લાખ છે. તેમના ઇક્વિટી રોકાણોના પ્રદર્શનની સરખામણીમાં, તેની કિંમતમાં વધારો મર્યાદિત રહ્યો છે. પરંતુ તે પ્રોપર્ટીની બીજી ભૂમિકા છે. તે દર મહિને લગભગ રૂ. 28,000 ભાડું આપે છે, અને તે નાણાં નાસિકમાં તેમના માતાપિતાને તેમના ખર્ચાઓ પૂરા કરવા માટે જાય છે. તેથી, માત્ર પ્રોપર્ટીની કિંમતમાં થયેલા વધારાને જોવો એ આખી વાર્તા નથી. આ સંપત્તિ તેમના પરિવારને આર્થિક ટેકો પણ આપી રહી છે. આનો અર્થ એ નથી કે પ્રોપર્ટી આપમેળે એક સારું રોકાણ બની જાય છે. તે માત્ર એ દર્શાવે છે કે કોઈ નાણાકીય નિર્ણય સફળ રહ્યો કે નહીં તેનો ન્યાય કરતી વખતે સંપત્તિનો હેતુ મહત્વ ધરાવે છે. ક્યારેક કોઈ સંપત્તિ માત્ર રિટર્ન માટે જ નહીં, પણ સુરક્ષા, કૌટુંબિક જરૂરિયાતો અથવા લાંબા ગાળાના ઉપયોગ માટે ખરીદવામાં આવે છે.

દેવામુક્ત હોવાથી તમને વધુ નાણાકીય સ્વતંત્રતા મળે છે

મયુરેશે તેમની પુણે હોમ લોન ચૂકવી દીધી છે. તે તેમને આજે વધુ લવચીકતા આપે છે. પરંતુ રસપ્રદ વાત એ છે કે, તેઓ હવે બીજા નાણાકીય નિર્ણયનો સામનો કરી રહ્યા છે: ઠાણેમાં ઘર ખરીદવું કે ભાડે રહેવાનું ચાલુ રાખવું. તેઓ હાલમાં ભાડા પેટે મહિને લગભગ રૂ. 38,000 ચૂકવે છે. બીજી પ્રોપર્ટી ખરીદવાથી તેમને સ્થિરતા મળી શકે છે અને વધતા ભાડાની અનિશ્ચિતતા દૂર થઈ શકે છે. પરંતુ તેનો અર્થ એ પણ થશે કે બીજી મોટી હોમ લોન લેવી પડશે. તેઓ તરત જ એવું કરવા અંગે અચકાઈ રહ્યા છે. મારા માટે, આ એક મહત્વપૂર્ણ મુદ્દા પર પ્રકાશ પાડે છે. તમારી સંપત્તિ વધવા માત્રથી નાણાકીય નિર્ણયો સરળ બનતા નથી. પ્રશ્નો ફક્ત બદલાય છે. પહેલાં પ્રશ્ન એ હતો કે સંપત્તિ કેવી રીતે બનાવવી. હવે, પ્રશ્ન એ છે કે ભવિષ્યની નાણાકીય સ્વતંત્રતા સાથે સમાધાન કર્યા વિના તે સંપત્તિનો ઉપયોગ કેવી રીતે કરવો.

સૌથી મોટો ફાયદો રમતમાં ટકી રહેવાનો છે

કદાચ મયુરેશની સફરનો સૌથી મોટો પાઠ એ છે કે તેમણે બધું જ સાચું નહોતું કર્યું. તેમણે મોડેથી રોકાણ શરૂ કર્યું. તેમણે ન સમજાતી પ્રોપર્ટી ખરીદી. તેમને કૌટુંબિક જવાબદારીઓ હતી. તેમણે લોન લીધી. દરેક રોકાણના નિર્ણયે એકસરખું સારું કામ ન કર્યું. પરંતુ આમાંથી કોઈ પણ ભૂલે તેમને આગળ વધતા અટકાવ્યા નહીં. તેમનો પગાર વધ્યો. તેમની એસઆઈપી વધતી ગઈ. તેમનું એમ્પ્લોયી પ્રોવિડન્ટ ફંડ એકઠું થતું ગયું. તેઓ રોકાણ કરતા રહ્યા. આ સાતત્ય આખરે તેમની નાણાકીય સંપત્તિને રૂ. 1 કરોડની પાર લઈ ગયું. અને મારા માટે, તેમની સફરનો આ સૌથી ઉપયોગી પાઠ છે. સંપત્તિ બનાવવા માટે તમારે પરફેક્ટ નાણાકીય સફરની જરૂર નથી. તમારે એક સતત ટકી રહે તેવી સફરની જરૂર છે. આજે મયુરેશ જે રૂ. 70,000 ની SIP કરી રહ્યા છે તે રાતોરાત નથી થઈ. તે રૂ. 2,500 થી શરૂ થઈ હતી. આ રકમ વધી કારણ કે તેમની આવક વધી, તેમની બચત વધી અને તેમણે આ આદત ચાલુ રાખી. આજે શરૂઆત કરનાર કોઈપણ વ્યક્તિ માટે આ સૌથી મહત્વપૂર્ણ પાઠ હોઈ શકે છે. તમારી પહેલી એસઆઈપી પૂરતી મોટી છે કે નહીં તેની ચિંતા કરશો નહીં. શરૂઆત કરો. પછી, જ્યારે પણ તમારી આવક વધે, ત્યારે તમારી જાતને એક પ્રશ્ન પૂછો: આ વધારામાંથી હું કેટલો હિસ્સો મારા ભવિષ્ય માટે ઉપયોગી બનાવી શકું તેમ છું?