લ્યો કરો વાત, Q3માં નફો થયા છતાં Paytmના શેરના ભાવમાં ઘટાડો
બપોરે 12.10 વાગ્યે રૂ. 1,132.50 પર લગભગ 3 ટકા નીચો ટ્રેડ થતો હતો. અગાઉના બંધ ભાવ રૂ.1,168.10 સામે શેરે ઇન્ટ્રાડેમાં રૂ. 1,115.60 નીચી સપાટીને પણ સ્પર્શી ગયો હતો.
અમદાવાદઃ 2025-26ના નાણાંકીય વર્ષના ત્રીજા ત્રિમાસિક ગાળામાં એટલે કે Q3માં નફો નોંધાવ્યા બાદ પણ Paytmના શેરમાં શુક્રવારે ઘટાડો જોવા મળ્યો હત. RBIની Payments Infrastructure Development Fund (PIDF) યોજના હેઠળ મળતા પ્રોત્સાહનો બંધ થવાની શક્યતા અને ટૂંકાગાળાની ચિંતાઓને ધ્યાનમાં રાખીને રોકાણકારોએ સાવચેતી દાખવી હોવાથી આ ઘટાડો જોવા મળ્યો હોવાનું જણાય છે.
શેર દિવસ દરમિયાન લગભગ 4 ટકા સુધી ઘટ્યો હતો અને બપોરે 12.10 વાગ્યે રૂ. 1,132.50 પર લગભગ 3 ટકા નીચો ટ્રેડ થતો હતો. અગાઉના બંધ ભાવ રૂ.1,168.10 સામે શેરે ઇન્ટ્રાડેમાં રૂ. 1,115.60 નીચી સપાટીને પણ સ્પર્શી ગયો હતો. દિવસના અંતે NSE પર શેર 3 ટકા ઘટીને ₹1,137.50 પર બંધ રહ્યો, જ્યારે ઇન્ટ્રાડે લોઅ ₹1,112.20 રહ્યો હતો.
Paytmની પેરેન્ટ કંપની One97 Communications Ltdએ Q3 FY2025-26માં રૂ. 225 કરોડનો સંયુક્ત નફો નોંધાવ્યો હતા. ગયા વર્ષના આ જ સમયગાળામાં કંપનીને રૂ.208 કરોડનું નુકસાન થયું હતું. ઓપરેશન્સમાંથી આવક વર્ષ દર વર્ષે 20 ટકા વધી રૂ. 2,914 કરોડ થઈ હતી. આ આવક અગાઉ રૂ. 1,828 કરોડ હતી. આ વૃદ્ધિ મુખ્યત્વે ફાઇનાન્શિયલ સર્વિસિસ બિઝનેસમાં વૃદ્ધિ અને પેમેન્ટ્સ બિઝનેસના સતત વિસ્તરણને કારણે જોવા મળી છે.
મોટાભાગની બ્રોકરેજ કંપનીઓએ ત્રિમાસિક પરિણામોને હકારાત્મક ગણાવ્યા હતા. જોકે PIDF પ્રોત્સાહનો બંધ થવા અને સીઝનલ માર્જિન પરના દબાણને ધ્યાનમાં રાખીને કેટલાકે કમાણીના અંદાજ અને ટાર્ગેટ ભાવમાં ઘટાડો કર્યો હતો. મોતીલાલ ઓસવાલે જણાવ્યું હતુ કે Paytmએ અપેક્ષાઓ મુજબ મજબૂત ત્રિમાસિક પ્રદર્શન કર્યું છે. મજબૂત આવક વૃદ્ધિ અને સંયમિત અમલથી નફામાં નોંધપાત્ર વધારો થયો છે. બ્રોકરેજ કંપનીઓએ GMVમાં સારી વૃદ્ધિ અને 57 ટકાનો કન્ટ્રિબ્યુશન માર્જિન દર્શાવ્યો હતો. અસુરક્ષિત લોનિંગમાં સુધરતા ટ્રેન્ડને કારણે ફાઇનાન્શિયલ સર્વિસિસ સેગમેન્ટમાં ગતિ જળવાઈ રહેશે તેમ જણાવ્યું હતું. PIDF યોજના અંગેના વિકાસને ટૂંકાગાળાના મહત્વના પરિબળ તરીકે પણ તેણે નોંધ લીધી હતી.
ગ્લોબલ બ્રોકરેજ બર્નસ્ટિને ત્રિમાસિક પરિણામોને મજબૂત અને આશ્વાસન આપનારા ગણાવ્યા છે અને રૂ.1,600ના અપરિવર્તિત ટાર્ગેટ સાથે ‘આઉટપરફોર્મ’ રેટિંગ જાળવી રાખ્યું છે. તેણે જણાવ્યું છે કે વધારાની કેશબેક ખર્ચને કારણે માર્જિન પર પડતું દબાણ સીઝનલ છે અને પેમેન્ટ પ્રોસેસિંગ માર્જિન ફરીથી 4 બેસિસ પોઇન્ટથી ઉપર સ્થિર થવાની શક્યતા છે.
જેફરીઝે રૂ.1,450ના ટાર્ગેટ સાથે ‘બાય’ રેટિંગ જાળવી રાખ્યું છે. બ્રોકરેજ હાઉસે જણાવ્યું હતુ કે એક વખતના લેબર કોડ ખર્ચ છતાં Paytmનો ડિસેમ્બર ત્રિમાસિક નફો અપેક્ષાથી થોડો વધુ રહ્યો હતો. આવક વૃદ્ધિ મુખ્યત્વે ફાઇનાન્શિયલ સર્વિસિસમાં લોન ઓરિજિનેશનથી થઈ છે. જ્યારે કન્ટ્રિબ્યુશન પ્રોફિટ 30 ટકા વધ્યો છે અને માર્જિન 57 ટકા રહ્યો છે. PIDF પ્રોત્સાહનોમાં ઘટાડાને કેવી રીતે પૂરક બનાવાશે તેની સ્પષ્ટતા કરવામાં આવે તો તે આગળના સમય માટે મહત્વની રહેશે.
સિટીએ ‘બાય’ રેટિંગ જાળવી રાખ્યું પરંતુ ટાર્ગેટ ભાવ ઘટાડીને રૂ.1,375 કર્યો છે. PIDF પ્રોત્સાહનો બંધ થવાથી લાંબા ગાળાના અંદાજમાં ઘટાડો કરવામાં આવ્યો છે. જોકે પેમેન્ટ્સ બિઝનેસનું મોનેટાઇઝેશન ધીમે ધીમે સુધરતું રહેશે અને મર્ચન્ટ લોનિંગ તથા ઇક્વિટી બ્રોકિંગમાં ફાઇનાન્શિયલ સર્વિસિસ બિઝનેસમાં મજબૂત વૃદ્ધિની સંભાવના હોવાનું જણાવ્યું છે.
બીજી તરફ, CLSAએ રૂ. 1,000ના ટાર્ગેટ સાથે ‘અન્ડરપરફોર્મ’ રેટિંગ જાળવી રાખ્યું છે અને કર્મચારી ખર્ચમાં ત્રિમાસિક આધાર પર થયેલા વધારાને લઈને ચિંતા વ્યક્ત કરી છે. PIDF આવક બંધ થવાને કારણે તેણે નફાના અંદાજમાં ઘટાડો કર્યો છે.
મોર્ગન સ્ટેનલીએ રૂ.1,175ના ટાર્ગેટ સાથે ‘ઇક્વલ-વેઇટ’ રેટિંગ જાળવી રાખ્યું છે. આવક વૃદ્ધિ અને કન્ટ્રિબ્યુશન માર્જિનમાં ધીમાપણું જોવા મળ્યું હોવા છતાં, ખર્ચ નિયંત્રણને કારણે EBITDAમાં સુધારો થયો હોવાનું તેણે જણાવ્યું છે.
