ગુજકોમાસોલે સભાસદોને 20 ટકા ડિવિડંડ આપવાની જાહેરાત કરી
ગુજકોમાસોલે સભાસદોને 20 ટકા ડિવિડંડ આપવાની જાહેરાત કરી
મનુષ્યનું સરેરાશ વય અને આરોગ્ય સુધર્યું હોવાથી કર્મચારીઓની નિવૃત્તિ વય 58થી વધારી 60 કરી
અમદાવાદઃ ગુજકોમાસોલની આજે યોજવામાં આવેલી વાર્ષિક સામાન્ય સભામાં તેના સભાસદોને 2025-26ના વર્ષ માટે 20 ટકા ડિવિડંડ આપવાની જાહેરાત કરી છે. ગુજકોમાસોલના ચેરમેન દિલીપ સંઘાણી અને વાઈસ ચેરમેન બિપીન પટેલે આજે પ્રસ્તુત જાહેરાત કરી હતી. આ સાથે જ ગુજકોમાસોલના કર્મચારીઓની નિવૃત્તિ વય 58થી વધારીને 60 કરી દેવાના નિર્ણયની પણ જાહેરાત કરવામાં આવી છે.
ચેરમેને દિલીપ સંઘાણીએ જણાવ્યું હતું કે આજે સરેરાશ આયુષ્ય વધી ગયુ હોવાથી અને અગાઉના વરસોની તુલનાએ 58 વર્ષ સુધી વ્યક્તિ શારીરિક રીતે વધુ સ્વસ્થ રહેતી હોવાથી અને તેઓ કામ કરવાને વધુ ફિટ હોવાથી તેમની નિવૃત્તિ વય વધારીને 60 કરી દેવામાં આવી છે.
વર્ષ દરમિયાન ગુજકોમાસોલે ટેકાના ભાવે રૂ. 8680 કરોડના મૂલ્યના મગફળી, ચણા, સોયાબિન, રાયડો, મગ અને અડદની ખરીદી કરી હતી. તેમ જ રૂ. 2115 કરોડના મૂલ્યનું 17.59 લાખ મેટ્રિક ટન ખાતરનું વિતરણ કર્યું હતું. નેનો ખાતરની રૂ. 114.79 કરોડની બોટલનું વિતરણ કર્યું હતું. ગુજકો માસોલે ખેડૂતોને રૂ. 14.79કરોડના મૂલ્યનું સર્ટિફાઈડ બિયારણ પણ પૂરં પાડ્યું છે. તેમ જ રૂ. 3.13 કરોડ રૂપિયાના મૂલ્યની જંતુનાશક દવાઓનું પણ વેચાણ કર્યું હતું.
ગુજકોમાસોલ હવે વેલ્યુ એડિશન પર ફોકસ કરી રહ્યું હોવાનું જણાવતા ચેરમેને કહ્યું હતું કે ડાયવર્સિફિકેશન અને વેલ્યુ એડિશનના નામથી સક્રિય નવા વિભાગે પહેલા વરસે રૂ. 2.19 કરોડના કરેલા કામકાજ સામે 2025-26માં રૂ. 48 કરોડનું ટર્નઓવર કર્યું હતું. મૂલ્યવર્ધન માટે મહેસાણામાં એગ્રી લોજિસ્ટિક પાર્ક પણ વિકસાવવામાં આવી રહ્યો છે. આ પ્લાન્ટ ટૂંક સમયમાં કાર્યરત થઈ જશે. ગુજકોની બ્રાન્ડ ઊભી કરવા માટે ગુજરાત કોઓપરેટીવ નામથી નવી બ્રાન્ડનું રજિસ્ટ્રેશન પણ કરાવ્યું છે.
ગુજકોમાસોલે ગુજરાતમાં 145 ગોદામ તૈયાર કરીને બે લાખ ટનની સ્ટરજ ક્ષમતા વિકસાવી છે. આ ગોદામોનો પોતાની વસ્તુઓના સ્ટોરેજ માટે ઉપયોગ કરવા ઉપરાંત ભાડેથી આપવાની કામગીરી પણ કરવામાં આવી રહી છે. ઇલેક્ટ્રિક વેહિકલની વધી રહેલી ડિમાન્ડને ધ્યાનમાં લેતા ગુજકોમાસોલે પોતાની હેડ ઓફિસના પરિસરમાં ઇલેક્ટ્રિક વેહિકલના ચાર્જિંગ માટેનું સ્ટેશન પણ વિકસાવ્યું છે.
