વિશ્વ બજારને પગલે આજે ભારતના બજારોમાં સોનું વધુ તૂટે તેવા સંકેતો, ચાંદીમાં થોડી રિકવરી આવી શકે

• અમેરિકી ડોલરમાં સુધારો અને ફેડરલ રિઝર્વ બેન્કના નવા ચેરમેન તરીકે કેવિન વૉર્શોની નિમણૂકના પગલે કિંમતી ધાતુઓ પર દબાણ આવ્યું
• 30મી જાન્યુઆરીએ સોનું અને ચાંદી બંને સાથે ખાબક્યા, નફો બુક કરવા વેચવાલી નીકળતા મોટો કડાકો 
• મોટી આશા સાથે ETFના માધ્યમથી રોકાણ કરનારાઓના ગણિતો ખોરવાયા

અમદાવાદઃ મુંબઈ, અમદાવાદ અને દિલ્હી કોલકાતા સહિત દેશના તમામ બજારોમાં 30મી જાન્યુઆરી 2026ના શુક્રવારે સોના અને ચાંદી સહિતની તમામ કિંમતી ધાતુઓમાં ભારે ઘટાડો જોવા મળ્યો હતો. ચાંદીમાં 18 ટકાથી વધુનો કડાકો નોંધાયો હતો, જેના પરિણામે સોનાં અને ચાંદીના એક્સચેન્જ ટ્રેડેડ ફંડ્સ (ETF)માં અનુક્રમે 9–12 ટકા અને 18–23 ટકાનો ઘટાડો થયો હતો. એક તબક્કે ભારતીય બજારમાં ચાંદીના કિલોદીઠ ભાવ રૂ. 4.36ની સપાટીને વળોટી ગયા હતા. જ્યારે સોનું દસ ગ્રામના રૂ. 1.85 લાખને આંબી ગયા હતા.

વિશ્વ બજારમાં પણ ચાંદી ઘટીને 92 ડૉલર પર આવી ગઈ છે. ચાંદી તૂટીને 80 ડૉલરની સપાટી સુધી આવી શકે છે. જોકે 31મી જાન્યુઆરી 2026ના સવારે છ વાગ્યે આ લખાય છે ત્યારે વિશ્વ બજારમાં ચાંદી ફરી 98 ડૉલરની સપાટીએ આવી હોવાના વાવડ છે. વિશ્વ બજારમાં આજે એટલે કે 30મી જાન્યુઆરી 2026ના સોનાના ટ્રોય ઔંસના 5438 ડૉલરની ભાવ સપાટીએ ખૂલેલું સોનું દિવસ દરમિયાન 4955.62ની સપાટીએ આવી ગયું હતું. જોકે 31મી જાન્યુઆરીએ સવારે છ વાગ્યે આ લખાય છે તે પૂર્વે વિશ્વ બજારમાં સોનું 4879.55 અમેરિકી ડૉલરના તળીયે પહોંચી ગયું છે. તેની અસર આજે ભારતના બજારોમાં જોવા મળશે. જ્યારે સોનું ઘટીને દસ ગ્રામના રૂ. 1,68,000ની સપાટીએ આવી ગયું છે. સોનું 31મી જાન્યુઆરીએ ભારતના બજારોમાં રૂ. 1.50 લાખની સપાટીથી નીચે ઉતરી જાય તેવી સંભાવનાને નકારી શકાતી નથી.

વિશ્વના સ્પોટ માર્કેટમાં સોનાનો ભાવ ટ્રોય ઓંસદીઠ $5,183થી ઘટીને 5000 ડૉલર પર આવી ગઈ છે. બીજીતરફ ચાંદી પણ ટ્રોય ઓંસદીઠ $109.55ની સપાટીથી તૂટીને 92 ડૉલરના તળિયે આવી ગઈ છે. પરિણામે નિપ્પોન ઇન્ડિયા સિલ્વર ETF સહિતના ભારતીય ETFમાં પણ આ જ ટ્રેન્ડ જોવા મળ્યો, જેમાં નિપ્પોન ઇન્ડિયા સિલ્વર ETF લગભગ 14 ટકા તૂટ્યો છે. ભારતીય બજારમાં ચાંદીમાં રૂ.4.40 લાખની સપાટીથી તૂટીને રૂ. 3.39 લાખની સપાટીએ આવી ગઈ છે. આમ ચાંદીમાં રૂ. 1 લાખનું ગાબડું પડી ગયું છે.

અમેરિકાના પ્રમુખ ડોનાલ્ડ ટ્રમ્પ અને અમેરિકાની ફેડરલ રિઝર્વ બેન્ક વચ્ચે કોઈ મોટો ટકરાવ નહીં થાય તેવી ધારણાથી રોકાણકારોએ સોના અને ચાંદીમાં નફો બુક કરવાનું શરૂ કર્યું હતું તેને કારણે કિંમતી ધાતુઓના ભાવ તૂટ્યા હોવાનું જાણવા મળ્યું છે.

છેલ્લા કેટલાક અઠવાડિયાંમાં અમેરિકાની ફેડરલ રિઝર્વ બેન્કના વડાને મુદ્દે અનિશ્ચિતતા પ્રવર્તતી હોવાથી રોકાણકારો કરન્સી અને બોન્ડમાંથી બહાર આવી સોનામાં રોકાણ કરી રહ્યા હતા. જોકે, ડોનાલ્ડ ટ્રમ્પ દ્વારા કેવિન વોર્શને નવા ફેડ ચીફ તરીકે નિયુક્ત કરતા વૈશ્વિક સ્તરે કિંમતી ધાતુઓમાં જોવા મળતી ફાટફાટ તેજી પર જબરદસ્ત બ્રેક લાગી છે અને ગાડી  રિવર્સ ગિયરમાં ચાલવા લાગી છે.

ચાંદી પર સૌથી મોટો પ્રહાર

ભારતીય સમય મુજબ સાંજે 7:30 વાગ્યે સોનું $5,008 પ્રતિ ઔંસ સુધી ઘટ્યું હતું અને કોમેક્સ પર એપ્રિલ ફ્યુચર્સ $5,027.81 પર આવી ગયું હતું, જે એક સમયે 10 ટકાથી વધુનો ઘટાડો દર્શાવે છે. મુંબઈ સ્પોટ માર્કેટમાં સોનું પ્રતિ 10 ગ્રામ રૂ.1,65,795 પર બંધ થયું હતું, જ્યારે અગાઉ તે રૂ.1,75,340 હતું. MCX પર એપ્રિલ ફ્યુચર્સ રૂ.1,68,938 પર ટ્રેડ થયું હતું, જે ગુરુવારની તુલનાએ 8 ટકાથી વધુ ઘટાડો છે.

છેલ્લા બે મહિનાથી તેજીમાં રહેલી ચાંદીમાં ભારે કડાકો આવ્યો અને ભાવ $100 પ્રતિ ઔંસથી નીચે સરકી $98.93 સુધી પહોંચી ગયા. કોમેક્સ પર માર્ચ ફ્યુચર્સ $98.58 પર રહ્યા. મુંબઈ બજારમાં ચાંદી પ્રતિ કિલો રૂ.3,39,350 પર આવી ગઈ, જ્યારે અગાઉ રૂ. 3,85,933 હતી. MCX પર માર્ચ કોન્ટ્રાક્ટ રૂ.3,37,945 સુધી ઘટ્યા છે.

નિપ્પોન ઈન્ડિયા AMC, HDFC AMC અને DSP મ્યુચ્યુઅલ ફંડના ગોલ્ડ ETFમાં 10–13 ટકાનો ઘટાડો નોંધાયો હતો. જ્યારે નિપ્પોન ઈન્ડિયા, આદિત્ય બિરલા સન લાઈફ અને ICICI પ્રુડેન્સિયલના સિલ્વર ETFમાં 18–20 ટકાનો ઘટાડો થયો હતો.

ગોલ્ડ ETFમાં રોકાણ

વર્લ્ડ ગોલ્ડ કાઉન્સિલના આંકડા મુજબ 2025માં ભારતીયોએ ગોલ્ડ ETFમાં $4.37 અબજનું રોકાણ કર્યું હતું અને ફંડની હોલ્ડિંગ્સમાં 65 ટકાનો વધારો થયો હતો. કુલ ETF એસેટ્સ અન્ડર મેનેજમેન્ટ $14 અબજ છે. આ અઠવાડિયાની શરૂઆતમાં સોનું $5,600 અને ચાંદી $118 પ્રતિ ઔંસના રેકોર્ડ સ્તરે પહોંચ્યા હતા.

ઑગમૉન્ટના રિસર્ચ હેડ ડૉ. રેણિશા ચૈનાણીએ જણાવ્યું કે મજબૂત ડોલર, માર્જિનના પ્રેશર અને ઊંચા સ્તરે નફાકીય વેચવાલી આવતા સોનું અને ચાંદીના ભાવમાં તીવ્ર ઘટાડો થયો છે.

રિદ્ધિસિદ્ધિ બુલિયન્સના મેનેજિંગ ડિરેક્ટર અને ઇન્ડિયા બુલિયન એન્ડ જ્વેલર્સ એસોસિયેશનના પ્રમુખ પૃથ્વીરાજ કોઠારીએ જણાવ્યું કે સોનાના ભાવમાં ઘટાડા છતાં સોનું વર્ષ દરમિયાન હજુ પણ લગભગ 25 ટકા અને ચાંદી 45 ટકા ઉપર છે અને 1999 બાદનું સૌથી મજબૂત માસિક પ્રદર્શન આપવાની દિશામાં છે. અમેરિકાની ફેડરલ રિઝર્વ બેન્કે વ્યાજદર સ્થિર રાખવાના નિર્ણય અને મોંઘવારી ટાર્ગેટના લેવલથી ઉપર હોવાને કારણે બજારમાં અસ્થિરતા વધી હોવાનું તેમણે ઉમેર્યું હતું. કોટક મ્યુચ્યુઅલ ફંડના ફંડ મેનેજર સતીશ દોંડાપાટીએ કહ્યું કે ડોલરની મજબૂતી સોનું અને ચાંદી વેચાવાનું મુખ્ય કારણ છે.

પ્લેટિનમ ગ્રુપ ધાતુઓમાં પણ કડાકો

તાજેતરની તેજી વધારે ખેંચાયેલી અને ટકાઉ નહીં હોવાનું લાગતાં રોકાણકારોએ ઊંચા સ્તરે નફો બુક કર્યો હતો. શેરબજારમાં નબળાઈને કારણે અન્ય એસેટ ક્લાસમાં પણ વેચવાલી જોવા મળી હતી. ચોઇસ વેલ્થના CEO નિકુંજ સરાફે જણાવ્યું કે ટ્રમ્પ હેઠળ ફેડરલ રિઝર્વ બેન્કના ચેરમેનની પસંદગીથી કડક નીતિની ભીતિ ઊભી થઈ છે. તેથી જ ડોલર મજબૂત થયો અને વધારે ખરીદેલી ધાતુઓમાં કડાકો બોલી ગયો છે. પ્લેટિનમ ગ્રુપ મેટલ્સમાં પ્લેટિનમ 12 ટકાથી વધુ ઘટીને $2,288.20 અને પેલેડિયમ લગભગ 10 ટકા ઘટીને $1,827.50 પ્રતિ ઔંસ થઈ ગયું છે.

MCX પર સોનું પ્રતિ 10 ગ્રામ રૂ.1,93,096 અને ચાંદી પ્રતિ કિલો રૂ.4,20,048ના રેકોર્ડ સ્તરે પહોંચ્યા બાદ રોકાણકારોએ નફો બુક કરતા સોના અને ચાંદીમાં ભાવ ગગડી ગયા છે. ડોનાલ્ડ ટ્રમ્પે ફેડરલ રિઝર્વ બેન્કના ચેરમેનની કરેલી પસંદગીથી વૈશ્વિક સ્તરે કડક નાણાકીય નીતિની આશંકા વધી જતાં અમેરિકી ડોલર મજબૂત થયો અને ઓવર બોટ પોઝિશનમાં આવી ગયેલી તમામ કિંમતી ધાતુઓ પર ભારે દબાણ આવ્યું હતું.

રોકાણકારો માટે સંદેશ સ્પષ્ટ છે:
આ ઘટાડો વિશ્વાસની કસોટી છે. પેનિક સેલિંગથી દૂર રહેવું, પોર્ટફોલિયોનું વૈવિધ્યીકરણ કરવું અને સેન્ટ્રલ બેન્કની માંગથી સંભવિત રિબાઉન્ડ પર નજર રાખવી જરૂરી છે. લાંબા ગાળાના તેજીવાદી રોકાણકારો હજુ પણ પોતાનું સ્થાન જાળવી રાખે છે.