રિન્યુએબલ એનર્જીના સેક્ટરની કંપનીઓના શેર્સ પર નજર રાખી શકાય
બજેટમાં સોલાર એનર્જી માટે થયેલી મોટી જાહેરાતો બાદ ભારતના રિન્યુએબલ એનર્જી સેક્ટરમાં નવી તકો ઊભી થઈ
નાણાં મંત્રી નિર્મલા સીતારમણે પહેલી ફેબ્રુઆરીના સંસદમાં રજૂ કરેલા 2026ના યુનિયન બજેટમાં સોલાર એનર્જી માટે થયેલી મોટી જાહેરાતો બાદ ભારતના રિન્યુએબલ એનર્જી સેક્ટરમાં નવી તકો ઊભી થઈ રહી છે. સરકારે PM સૂર્ય ઘર યોજનાને વધુ મોટા ફલક પર લઈ જવાની કરેલા જાહેરાત અને સોલાર ઇન્ફ્રાસ્ટ્રક્ચર માટે ઐતિહાસિક ફંડ ફાળવણ કરતાં આગામી દાયકામાં આ સેક્ટરની કંપનીઓની વૃદ્ધિ લગભગ નક્કી કરી દીધી છે. પરિણામે રિન્યુએબલ એનર્જીના સેક્ટરની કંપનીઓના શેરબજારના પરફોર્મન્સ પર નજર રાખી શકાય છે. તેમાંથી સારા શેર્સ પસંદ કરીને તેમાં રોકાણ કરવાનું વિચારી શકાય છે. તેમાં રોકાણ કરવાથી ફાયદો થવાની સંભાવના રહેલી છે.
.આ કેટેગરીમાં આવતી એક કંપનીમાં ગુજરાત ઇન્ડસ્ટ્રીઝ પાવર કોર્પોરેશન લિમિટેડ-Gujarat Industries Power Co Ltd (GIPCL)નો સમાવેશથાય છે. 1985માં આ કંપનીની સ્થાપના કરવામાં આવેલી છે. GIPCL વીજળીના ઉત્પાદનમાં સક્રિય ગુજરાત સરકારની જાહેર ક્ષેત્રની કંપની છે. બજેટમાં રિન્યુએબલ એનર્જી પર ફોકસ કરવાનું નક્કી કરવામાં આવ્યું તે પછી ગુજરાત ઇન્ડસ્ટ્રીઝ પાવર કોર્પોરેશન લિમિટેડના શેરના ભાવ ઊંચકાવા માંડ્યા છે. દસમી ફેબ્રુઆરીએ તેના શેરનું બજાર મૂડીકરણ-માર્કેટ કેપિટલાઈઝેશન રૂ. 2364 કરોડનું થઈ ગયું હતું. 9મી ફેબ્રુઆરી 2026 સુધી તેનું માર્કેટ કેપ રૂ. 2,286 કરોડ હતું. દસમી ફેબ્રુઆરીએ તેના શેરનો ભાવ રૂ. 152થી 153ની રેન્જમા હતો. શેરના ભાવમાં ધીમો વધારો જોવા મળી રહ્યો છે. કંપનીની તવારીખમાં તેના શેરનો ભાવ રૂ. 270ની મહત્તમ સપાટી સુધી પહોંચી ચૂકેલો છે. આજકાલ તેનો ભાવ રૂ. 152ની આસપાસનો છે. આ ભાવ તેના મહત્તમ ભાવ કરતાં 45 ટકા નીચો છે.
ગુજરાત ઇન્ડસ્ટ્રીઝ પાવર કોર્પોરેશન લિમિટેડ આજની તારીખે ગેસ, લિગ્નાઇટ, પવન અને સોલાર તમામ પ્રકારની ઉર્જાનો ઉપયોગ કરીને વીજળી પેદા કરી રહી છે. કંપનીએ કચ્છ જિલ્લાના ખાવડામાં સોલાર પ્રોજેક્ટ ચાલુ કર્યો છે. GIPCL ખાવડામાં 2,375 MWનું વિશાળ રિન્યુએબલ એનર્જી પાર્ક વિકસાવી રહી છે. ફેબ્રુઆરી 2026 સુધીમાં 600 MWના ફેઝ-1માંથી 465 MWનું ઉત્પાદન શરૂ થઈ ચૂક્યું છે.
છેલ્લા 5 વર્ષમાં કંપનીની આવક અને EBITDA થોડો ઘટાડો જોવા મળ્યો છે. આ ગાળામાં કંપની જૂના થર્મલ રેવન્યૂને ઘટાડીને સોલાર રેવન્યૂ જનરેટ કરવા પર ફોકસ કરીને બેસી ગઈ હતી. છતાંય કંપનીનો રિટર્ન ઓન ઇક્વિટી-ROE હાલમાં 6.2 ટકાનો છે. કંપની રોકાણકારો માટે અત્યારે પણ સુરક્ષિત હોવા છતાં સંપત્તિ સર્જક-વેલ્થ જનરેટર બની ગઈ નથી. કંપનીના શેરહોલ્ડર્સને નિયમિત સરેરાશ 2.74 ટકાનું ડિવિડંડ મળતુ હોવાનું જોવા મળે છે. ગુજરાત ઇન્ડસ્ટ્રીઝ પાવર કોર્પોરેશન લિમિટેડનો પ્રાઈસ અર્નિગં રેશિયો માત્ર 12 ગણો છે. રિન્યુએબલ એનર્જી સેક્ટરનો પી.ઈ. 26 ગણો છે.
શેરબજાર આજેય GIPCLને થર્મલ યુટિલિટી તરીકે જ જોઈ રહ્યું છે, પરંતુ ખાવડા પ્રોજેક્ટ થકી આવક થવા માંડતા તેના મૂલ્યનું નવેસરથી મૂલ્યાંકન થવાની સંભાવના નકારી શકાતી નથી. કંપનીએ જાન્યુઆરી 2026માં જ નવા ચીફ ફાઈનાન્સ ઓફિસર-CFO ની નિમણૂક કરી છે. આ નિમણૂક કંપનીના મૂડી ખર્ચમાં થઈ રહેલા વધારા-Capex વચ્ચે કંપનીની સ્થિરતાનો સંકેત આપી રહ્યો છે. કંપની માટે એક તરફ સોલાર અને બીજી તરફ 700 MW લિગ્નાઇટ પ્લાન્ટ છે. આ બંને GIPCLના હાઇબ્રિડ ભવિષ્યને નવ આકાર આપી રહ્યા છે.
