આજે શેરબજારમાં શું કરશો?
અદાણી એનર્જી સોલ્યુશન્સમાં લેણ કરી શકાય
વર્તમાન બજારમાં રૂ. ૧,૫૫૬.૫૦ના ભાવે મળી રહેલા અદાણી એનર્જી સોલ્યુશન્સના શેરમાં લેણ કરી શકાય છે. ટ્રેડર્સ અત્યારે રૂ. ૧,૫૫૬ પર લોંગ પોઝિશન લઈ શકે છે એટલે કે ખરીદી કરી શકે છે. શેરના ભાવમાં ઘટાડો આવે તો રૂ. ૧,૪૬૦ની ભાવ સપાટીએ વધુ લેણ કરીને સરેરાશ ખરીદ કિંમત નીચે લાવી શકે છે. ટ્રેડર્સ કે ઇન્વેસ્ટર્સે પ્રારંભિક સ્ટોપ-લોસ રૂ. ૧,૪૨૦ પર રાખવો જોઈએ.
અદાણી એનર્જી સોલ્યુશન્સનો શેર એપ્રિલની શરૂઆતથી સતત વધી રહ્યો છે. જો કે, જૂનની શરૂઆતથી તે મોટાભાગે એક મર્યાદિત દાયરામાં (sideways) રહ્યો છે, જે રૂ. ૧,૪૬૦ અને રૂ. ૧,૬૦૦ વચ્ચે વધઘટ થઈ રહ્યો છે. આ રેન્જમાં અથડાઈ રહ્યો છે. ટેકનિકલ ચાર્ટ દર્શાવે છે કે આ શેરે રૂ. ૧,૪૬૦ પર સારો સપોર્ટ (બેઝ) બનાવ્યો છે અને તેના જ જોરે તે છેલ્લા બે સત્રોમાં વધ્યો છે. આ દર્શાવે છે કે બુલ્સ-તેજીવાળા તેમની પકડ મજબૂત કરી રહ્યા છે. નિષ્ણોતોની અપેક્ષા છે કે આ સ્ટોક સારી મજબૂતી મેળવશે અને ટૂંક સમયમાં રૂ.૧,૬૦૦ની સપાટીને તોડીને આગળ વધી શકે છે.
એકવાર આવું થાય પછી, નજીકના ગાળામાં કિંમત રૂ. ૧,૭૨૦ સુધી વધી શકે છે. તેથી, ટ્રેડર્સ અત્યારે રૂ. ૧,૫૫૬ પર લોંગ પોઝિશન લઈ શકે છે અને રૂ. ૧,૪૬૦ પર વધુ શેર ખરીદી શકે છે. પ્રારંભિક સ્ટોપ-લોસ રૂ.૧,૪૨૦ પર રાખી શકે છે. ત્યારબાદ ભાવ વધીને રૂ. ૧,૬૨૦ અને રૂ. ૧,૬૮૦ ને સ્પર્શે, ત્યારે સ્ટોપ-લોસ અનુક્રમે રૂ. ૧,૫૫૦ અને રૂ. ૧,૬૩૦ પર લઈ જઈ શકાય છે. શેરનો ભાવ રૂ. ૧,૭૨૦ પર આવે ત્યારે નફો બુક કરીને નીકળી જવાની સલાહ છે.
ઇન્ડિયન હોટેલ્સ કંપની લિમિટેડના શેર પર નજર રાખો, લેણ કરી શકાય
સાનુકૂળ બેઝ ઇફેક્ટ, સુધરી રહેલી સ્થાનિક માંગ અને ૨૦૨૫-૨૬ ના ચોથા ક્વાર્ટર (જાન્યુઆરી-માર્ચ/Q4) ના મુલતવી રાખવામાં આવેલા કાર્યક્રમોની અસરને કારણે ૨૦૨૬-૨૭ (FY27) ના પ્રથમ ક્વાર્ટર (એપ્રિલ-જૂન/Q1) માં ભારતની અગ્રણી હોટેલ કંપનીઓના પ્રદર્શનને વેગ મળ્યો છે. આ સેક્ટરમાં સૌથી મોટી કંપની, ઇન્ડિયન હોટેલ્સ કંપની લિમિટેડ (IHCL), આ ક્વાર્ટર દરમિયાન રૂમના ઊંચા દરો અને વધતા ઓક્યુપન્સી લેવલથી લાભ મેળવે તેવી અપેક્ષા છે.
મધ્યમ ગાળામાં, તેની બ્રાન્ડ્સનું પોર્ટફોલિયો, વિસ્તરણની પાઇપલાઇન અને માંગ-પુરવઠા વચ્ચેનો તફાવત તેની આવક અને નફાની વૃદ્ધિને ટેકો આપશે. આ શેરે છેલ્લા એક મહિનામાં ૧૨ ટકા અને છેલ્લા ત્રણ મહિનામાં ૨૪ ટકાનો ફાયદો કર્યો છે. આગળનો વધારો Q1FY27 ના ઓપરેશનલ મેટ્રિક્સ (કામગીરીના આંકડા) અને નાણાકીય વર્ષ ૨૭ દરમિયાન રિકવરીની ગતિ પર નિર્ભર રહેશે.
જોકે Q1FY27 પ્રવાસના અવરોધો અને હવાઈ ભાડામાં વધારાથી પ્રભાવિત થયું હતું, તેમ છતાં હોટેલ સેક્ટરે મજબૂત પ્રદર્શન કર્યું છે. એન્ટિક સ્ટોક બ્રોકિંગના નિષ્ણાતોના મતાનુસાર આ ક્વાર્ટર દરમિયાન વૃદ્ધિ મજબૂત સ્થાનિક માંગને કારણે થઈ હતી, જેણે વિદેશી પ્રવાસીઓના ઓછા આગમનની ખોટ પૂરી કરી હતી. આ ઉપરાંત, ફરીથી નિર્ધારિત કરાયેલા લગ્નોની વધારાની માંગ, બ્રિક્સ ૨૦૨૬ (Brics 2026) જેવી મોટી રાજદ્વારી ઇવેન્ટ્સ અને ગયા વર્ષના નીચા બેઝનો પણ લાભ મળ્યો છે. બ્રોકરેજ હાઉસ અપેક્ષા રાખે છે કે IHCL ઉપલબ્ધ રૂમ દીઠ આવકમાં ૧૧-૧૨ ટકાની વૃદ્ધિ નોંધાવશે, જે મુખ્ય બજારોમાં રૂમના દરોમાં ૯ ટકાના વધારા અને ઓક્યુપન્સીમાં ૨૦૦-બેસિસ-પોઇન્ટના વધારાને કારણે થશે.
બ્રિજ હોસ્પિટાલિટી, ક્લાર્ક્સ હોટેલ્સ એન્ડ રિસોર્ટ્સ અને આત્મંતનના એક્વિઝિશન (જે પ્રથમ આખા વર્ષ માટે યોગદાન આપશે) અને વારાણસીમાં ૧૦૦ નવી ચાવીઓ-ઓરડાઓના ઉમેરાને કારણે આવક ૧૪ ટકા વધવાની અપેક્ષા છે. કંપની નાણાકીય વર્ષ ૨૭ માં ૧૨-૧૪ ટકાની બે આંકડામાં આવક વૃદ્ધિ થવાની શક્યતા દર્શાવી રહી છે. તેમ જ પશ્ચિમ અશિયાની તણાવપૂર્ણ સ્થિતિ સ્થિર થશે તો તેમાં વધુ વધારો થઈ શકે છે.
સેક્ટરના સ્તરે, મોતીલાલ ઓસ્વાલ હકારાત્મક વલણ ધરાવે છે. તેઓ વધતી જતી MICE (મીટિંગ્સ, ઇન્સેન્ટિવ્સ, કોન્ફરન્સ અને એક્ઝિબિશન) પ્રવૃત્તિઓ, લગ્નો, સાંસ્કૃતિક કાર્યક્રમો, લેઝર ટ્રાવેલ (મનોરંજન પ્રવાસ) અને કોર્પોરેટ પ્રવાસને કારણે વધી રહેલા સ્થાનિક પ્રવાસનો હવાલો આપે છે. બ્રોકરેજ પાસે IHCL પર ‘બાય’ (ખરીદો) રેટિંગ છે, જેમાં ₹૮૨૦ નો ટાર્ગેટ ભાવ નક્કી કરાયો છે.
મધ્યમ ગાળામાં વૃદ્ધિ નવા વ્યવસાયો, તાજેતરના એક્વિઝિશન અને રૂમના વિસ્તરણ દ્વારા સંચાલિત થવાની અપેક્ષા છે. કંપનીએ વર્ષ દરમિયાન વિક્રમી ૨૫૦ હોટેલ્સ સાઇન કરી અને ૧૩૨ હોટેલ્સ ખોલી છે, જેનાથી તેનું ઓપરેટિંગ પોર્ટફોલિયો ૩૭૩ હોટેલ્સ અને ૩૩,૦૦૦ રૂમ પર પહોંચી ગયું છે. તેનું કુલ પોર્ટફોલિયો ૬૩૦ હોટેલ્સ સુધી વિસ્તર્યું છે, જેમાં વધારાના રૂમનો મોટો હિસ્સો તેના કેપિટલ-લાઇટ (ઓછી મૂડીવાળા) વિસ્તરણ મોડલ દ્વારા આવ્યો છે. વેલનેસ, બુટિક અને એક્સપિરિયન્શિયલ લેઝર સેગમેન્ટ્સમાં વ્યૂહાત્મક ઉમેરાઓ તેમજ ૧૪ બ્રાન્ડ્સનું પોર્ટફોલિયો કંપનીને ૨૦૩૦ સુધીમાં ૭૦૦ હોટેલ્સના તેના લક્ષ્યને પ્રાપ્ત કરવા માટે મજબૂત સ્થિતિ પ્રદાન કરે છે.
કંપની પાસે રહેલી રૂમ્સની મજબૂત પાઇપલાઇન, ઉદ્યોગની હાઈ સિંગલ-ડિજિટ વૃદ્ધિ અને નવા વ્યવસાયો તથા મેનેજમેન્ટ ફીના યોગદાન સાથે, મધ્યમ ગાળામાં આવક અને ઓપરેટિંગ નફામાં ૧૫ ટકા આસપાસ (mid-teens) વૃદ્ધિ સક્ષમ બનાવી શકે છે. બ્રોકરેજે તેનું ‘બાય’ રેટિંગ જાળવી રાખ્યું છે અને ટાર્ગેટ પ્રાઇસ વધારીને ₹૯૨૫ કરી છે. માર્ચ સુધીમાં તેની રૂ. ૪,૩૦૦ કરોડની નેટ કેશ પોઝિશન એક્વિઝિશનને ટેકો આપશે. જેએમ ફાઇનાન્શિયલના વિશ્લેષકો નિર્દેશ કરે છે કે રૂ. ૪,૩૦૦ કરોડથી વધુની ગ્રોસ લિક્વિડિટી ઓર્ગેનિક અને ઇનઓર્ગેનિક બંને પ્રકારની વૃદ્ધિ માટે પૂરતો અવકાશ આપે છે. કંપની પાસે વૃદ્ધિના બહુવિધ સ્ત્રોતો છે, જેમાં આગામી ૪ થી ૫ વર્ષોમાં પાઇપલાઇનમાં રહેલા ૩૧,૦૦૦ રૂમ સાથે એસેટ-લાઇટ વિસ્તરણ, નવા વ્યવસાયોમાંથી વધુ યોગદાન અને રૂમના ઊંચા દરો દ્વારા સંચાલિત સેમ-સ્ટોર વૃદ્ધિનો સમાવેશ થાય છે. બ્રોકરેજ પાસે રૂ. ૮૫૦ ના ટાર્ગેટ ભાવ સાથે ‘બાય’ રેટિંગ છે.
