લેઝર પાવર એન્ડ ઇન્ફ્રા લિમિટેડના રૂ. 742 કરોડનો IPOમાં રોકાણ કરી શકાય

લેઝર પાવર એન્ડ ઇન્ફ્રા લિમિટેડ – Laser Power & Infra Ltdના રૂ. 742 કરોડનો IPOમાં રોકાણ કરી શકાય

પાવર ટ્રાન્સમિશન અને ડિસ્ટ્રિબ્યુશન સેક્ટર સાથે જોડાયેલી અગ્રણી કંપની લેઝર પાવર એન્ડ ઇન્ફ્રા લિમિટેડ આગામી 9 જુલાઈ, 2026ના રોજ મૂડીબજારમાં તેનો પ્રાઇમરી પબ્લિક ઇશ્યૂ (IPO) લાવવા જઈ રહી છે. રીટેલ રોકાણકારો માટે આ ઇશ્યૂ 13 જુલાઈ, 2026 સુધી ખુલ્લો રહેશે. કંપની આ ઇશ્યૂ દ્વારા કુલ રૂ. 742.00 કરોડ એકત્રિત કરવાનું લક્ષ્ય ધરાવે છે.

ઇશ્યૂ ઓપનિંગ તારીખ: ગુરુવાર, 9 જુલાઈ, 2026

ઇશ્યૂ ક્લોઝિંગ તારીખ: સોમવાર, 13 જુલાઈ, 2026

કુલ ઇશ્યૂ સાઇઝ: રૂ. 742.00 કરોડ

ફ્રેશ ઇશ્યૂ (નવા શેર): રૂ. 542.00 કરોડ

ઓફર ફોર સેલ (OFS): રૂ. 200.00 કરોડ (પ્રમોટર્સ દ્વારા હિસ્સો વેચવામાં આવશે)

ફેસ વેલ્યુ (નિમિત્ત મૂલ્ય): રૂ.5 પ્રતિ શેર

શેર ફાળવણી તારીખ: 14 જુલાઈ, 2026 (સંભવિત)

લિસ્ટિંગ તારીખ: 16 જુલાઈ, 2026 (BSE અને NSE પર)

લીડ મેનેજર્સ: IIFL કેપિટલ સર્વિસીસ લિમિટેડ અને ICICI સિક્યોરિટીઝ લિમિટેડ

રજિસ્ટ્રાર: MUFG ઇનટાઇમ ઇન્ડિયા પ્રાઇવેટ લિમિટેડ

કંપની દ્વારા સત્તાવાર પ્રાઇસ બેન્ડ (Price Band) અને લોટ સાઇઝની ઘોષણા ટૂંક સમયમાં કરવામાં આવશે. બજારના અનધિકૃત અંદાજો મુજબ પ્રાઇસ બેન્ડ રૂ. 203થી રૂ. 214 આસપાસ રહેવાની ચર્ચા છે, પરંતુ સત્તાવાર જાહેરાતની રાહ જોવી હિતાવહ છે.

કંપનીની નાણાકીય સ્થિતિ 

છેલ્લા ત્રણ નાણાકીય વર્ષમાં કંપનીનું પ્રદર્શન નીચે મુજબ રહ્યું છે:

નાણાકીય વિગત (₹ કરોડમાં)	31 માર્ચ, 2026	31 માર્ચ, 2025	31 માર્ચ, 2024
કુલ સંપત્તિ (Assets)	2,632.36	2,270.17	1,986.99
કુલ આવક (Total Income)	2,347.89	2,592.53	1,763.65
કરવેરા પછીનો નફો (PAT)	151.59	106.75	40.41
EBITDA	301.44	250.39	156.10
કુલ દેવું (Borrowings)	828.23	502.95	393.75

મહત્વના નાણાકીય નિર્દેશકો

ઇક્વિટી પર વળતર (ROE): 23.32 ટકા. આ વળતરને  ખૂબ જ મજબૂત વળતર તરીકે ઓળખાવી શકાય છે.

રોકાયેલી મૂડી પર વળતર (ROCE): 17.83 ટકા

દેવા-ઇક્વિટી ગુણોત્તર (Debt/Equity Ratio): 1.10x-ગણો

પ્રી-આઈપીઓ EPS (શેર દીઠ કમાણી): રૂ. 13.18

આકર્ષક પાસાં અને કંપનીની મજબૂતી 

1. વિશાળ ઓર્ડર બુક: 31 માર્ચ, 2026 સુધીમાં કંપની પાસે રૂ. 32,434 મિલિયન  એટલે કે આશરે રૂ. 3,243 કરોડની મજબૂત ઓર્ડર બુક છે, જે ભવિષ્યમાં કંપનીની આવકની સ્થિરતા દર્શાવે છે.

2. વૈવિધ્યસભર બિઝનેસ મોડલ: કંપની પાવર કેબલ્સ અને કંડક્ટર્સના ઉત્પાદન ઉપરાંત પાવર ડિસ્ટ્રિબ્યુશન સેક્ટરમાં EPC (Engineering, Procurement, and Construction) સેગમેન્ટમાં પણ સક્રિય છે, જે ગ્રામીણ વીજળીકરણ અને સબસ્ટેશન ઇન્સ્ટોલેશન પર ધ્યાન કેન્દ્રિત કરે છે.

3. ભૌગોલિક વ્યાપ: કંપની ભારતના 26 રાજ્યો અને 4 કેન્દ્રશાસિત પ્રદેશો ઉપરાંત વૈશ્વિક સ્તરે 10 દેશોમાં પોતાનું ઓપરેશન ધરાવે છે.

4. નફાકારકતામાં વૃદ્ધિ: ભલે નાણાકીય વર્ષ 2025 ની સરખામણીએ નાણાકીય વર્ષ 2026 માં આવકમાં 9 ટકાનો સામાન્ય ઘટાડો નોંધાયો હોય, પરંતુ કંપનીનો ચોખ્ખો નફો (PAT) 42 ટકા જેટલો ઊછળીને રૂ. 151.59 કરોડ થયો છે, જે ઓપરેટિંગ કાર્યક્ષમતા સૂચવે છે.

જોખમી પરિબળો-Risk Factors

1. વધતું દેવું: કંપની પરનું કુલ દેવું વર્ષ 2025 માં રૂ. 502.95 કરોડથી વધીને વર્ષ 2026 માં રૂ.828.23 કરોડ થયું છે. જો કે, રાહતની વાત એ છે કે આ IPO ના ફ્રેશ ઇશ્યૂના ભંડોળમાંથી રૂ. 490.00 કરોડનો ઉપયોગ દેવું ચૂકવવા માટે કરવામાં આવશે, જેથી ભવિષ્યમાં વ્યાજ ખર્ચનો બોજ ઘટી જશે.

2. ગ્રે માર્કેટ પ્રીમિયમ (GMP) ની સ્થિતિ: હાલમાં સત્તાવાર પ્રાઇસ બેન્ડ જાહેર ન થઈ હોવાના કારણે ગ્રે માર્કેટમાં સત્તાવાર ટ્રેડિંગ અથવા મોટું પ્રીમિયમ (GMP) જોવા મળી રહ્યું નથી (હાલ પૂરતું ₹0 દર્શાવે છે). લિસ્ટિંગ ગેઇન મેળવવા ઇચ્છતા રોકાણકારોએ પ્રાઇસ બેન્ડ આવ્યા બાદ ગ્રે માર્કેટના વલણ પર નજર રાખવી પડશે.

રોકાણ કરવું કે નહીં?

લેઝર પાવર એન્ડ ઇન્ફ્રા લિમિટેડના કિસ્સામાં મજબૂત ઓર્ડર બુક અને પાવર સેક્ટરમાં ભારત સરકારના ઇન્ફ્રાસ્ટ્રક્ચર તૈયાર કરવા માટે ભારત સરકાર તરફથી કરવામાં આવી રહેલા પ્રયાસોને ધ્યાનમાં લેતાં આગામી વરસોમાં સીધો ફાયદો કંપનીને મળી શકે છે. કંપની તેની લિસ્ટેડ હરીફ કંપની અપાર ઇન્ડસ્ટ્રીઝ, પોલીકેબ, કે.ઈ.આઈ.ની સરખામણીમાં પૂર્વ ભારતમાં મજબૂત પકડ ધરાવે છે.

લાંબા ગાળાના રોકાણકારો: દેવું ચૂકવ્યા બાદ કંપનીની નફાકારકતા વધુ સુધરવાની આશા છે. આથી, મધ્યમથી લાંબા ગાળાના દ્રષ્ટિકોણ ધરાવતા રોકાણકારો આ ઇશ્યૂમાં સબસ્ક્રાઇબ કરવાનું વિચારી શકે છે.

ટૂંકા ગાળાના રોકાણકારો: સત્તાવાર પ્રાઇસ બેન્ડ જાહેર થયા બાદ અને ઇશ્યૂ ખુલવાના પ્રથમ બે દિવસોમાં ક્વોલિફાઇડ ઇન્સ્ટિટ્યુશનલ બાયર્સ (QIB) અને રીટેલ સબસ્ક્રિપ્શનના આંકડા જોઈને જ આખરી નિર્ણય લેવો વધુ સુરક્ષિત રહેશે.