૧૯મી જુલાઈએ બ્રેકડાઉન થયેલી ગાડીઓના વીમા ક્લેઈમ અગે ૨૧ દિવસ પછીય સ્પષ્ટ જવાબ આપતા નથી
અમદાવાદમાં ૧૯ જુલાઈએ પડેલા અસાધારણ વરસાદમાં હજારો ગાડી બગડી ગઈ
બગડેલી ગાડીઓના ક્લેઈમ અંગે હજી સુધી વીમા કંપનીઓ જવાબ આપતી નથી
બેથી ત્રણ મહિને તમારી ગાડીનો નંબર આવશે તેવી કંપનીના ગેરેજ ચલાવનારાઓની વાતથી મોટરમાલિકાની પરેશાની વધી ગઈ
અમદાવાદઃ ૧૯મી જુલાઈએ અમદાવાદમાં એક જ દિવસમાં પડેલા ૧૮ ઇંચ વરસાદમાં રસ્તાઓ જળબંબાકાર થઈ જતાં ડૂબી ગયેલા હજારો ગાડીઓ વીમા ક્લેઈમ માટે મોકલી આપ્યા બાદ આજે ૨૦ દિવસ પછી પણ વીમા કંપનીઓ કાર માલિકોની કાર ક્યારે રિપેર થઈને આવશે તેનો જવાબ આપતા જ નથી. તેમને વારંવાર ફોન કર્યા પછી ફોન સદભાગ્યે ઉપડી જાય તો એટલો જ જવાબદ આપવામાં આવે છે કે અમે સામેથી તમારો સંપર્ક કરી લઈશું.
મોટર પાણીમાં ફસાઈ જતા ચાલતી અટકી જતાં રસ્તાને કોરાણે મૂકીને હજારો લોકો ચાલતા ચાલતા જ ઘરે પહોંચી ગયા હતા. રિક્ષા કે અન્ય વાહનો પણ મળી શકે તેમ ન હોવાથી તેઓ ચાલતા ચાલતા જ ઘરે પહોંચી ગયા હતા. ત્યારબાદ અંદાજે પાંચથી સાત દિવસે કંપનીઓએ મોટર માલિકોને ખાનગી કાર ટોવિંગ કરનારાઓને બોલાવીને તેમની ગાડી ગેરેજ સુધી પહોંચાડવા જણાવ્યું હતું.
વીમા પોલીસીમાં બ્રેકડાઉન વખતે ગાડી લઈ જવાની અને લઈ આવવાની વીમા પોલીસીમાં શરત હોવા છતાંય બ્રેકડાઉનની સેવાઓ વીમા કંપનીઓએ આપી નહોતી. પરિણામે પાંચ સાત દિવસ ગાડી પડી રહેતા કંટાળેલા મોટર માલિકોએ પોતે ટોવિંગ વાહન ભાડે કરીને ગાડીઓને ગેરેજ પર મોકલી આપી હતી. ત્યારબાદ તેમને સાતથી આઠ દિવસે જવાબ આપવા જણાવવામાં આવ્યું હતું. તેમની ગાડીના સ્ટેટસ અને ગાડીના ઇન્સ્યોરન્સ ક્લેઈમ અંગે જવાબ આપવા જણાવવામાં આવ્યું હતું.
પરંતુ આજે આ વાતને અંદાજે ૨૧ દિવસ વીતી ગયા હોવા છતાંય બ્રેકડાઉનનો શિકાર બનેલી મોટરના માલિકોને તેમની મોટરના સ્ટેટસ અંગે કે પછી મોટરના વીમા ક્લેઈમ અંગે કોઈ જ જવાબ આપવામાં આવતો નથી. બીજીતરફ તેમના ક્લેઈમનું સ્ટેટ જાણવા માટે મોટર માલિકો ફોન કરે ત્યારે વીમા કંપનીઓએ નિયુક્ત કરેલા ગેરેજના માલિકો ફોન ઉપાડતા જ નથી. તેમ જ ફોન પર કોઈ જ જવાબ આપતા નથી.
તેઓ ભૂલે ચૂકેય ફોન ઉપાડી લે તો તેવા સંજોગમાં તેમની ગાડી તેમને હજી બેૈ મહિના સુધી મળે તેમ ન હોવાનું જણાવી દે છે. આમ એક તરફ ગાડી બગડી જવાથી ખાનગી વાહન કરીને ઓફિસે જનારાઓ પરનો ખર્ચ બોજ પણ વધી રહ્યો છે. ગેરેજ માલિકો નિશ્ચિત સમયગાળા જણાવે તો મોટર માલિકો મન મનાવી શકે છે કે બે મહિના પછી તેમને ગાડી મળી જશે. પરંતુ આ બાબતમાં પણ અત્યારે સંપૂર્ણ અનિશ્ચિતતા જ પ્રવર્તી રહી છે. મોટર માલિકોને તેમનો ક્લેઈમ પાસ કરશે કે નહિ તે અંગે પણ સ્પષ્ટ જવાબ આપવામાં આવતો ન હોવાથી તેમની પરેશાની અને હાલાકી વધી રહી છે.
