એન્ફોર્સમેન્ટ ડિરેક્ટોરેટો તાયલ ગ્રુપ પર પાડેલા દરોડામાં રૂ. 821 કરોડનું કૌભાંડ બહાર આવ્યું:  એન્ફોર્સમેન્ટ ડિરેક્ટોરેટની અમદાવાદ કચેરીએ કંપની સેક્રેટરી રવિ કપૂર અને રેઝોલ્યુશન પ્રોફેશનલ્સ કિરણ શાહ અને વિનોદ અંબાવતની મિલીભગતમાં થયેલું તોતિંગ કૌભાંડ પકડી પાડ્યુંઃ રવિ કપૂરની એલિસબ્રિજ ઓફિસ પર દરોડા

અમદાવાદ/મુંબઈ: એન્ફોર્સમેન્ટ ડિરેક્ટોરેટ, કોલકાતા ઝોનલ ઑફિસ-II દ્વારા બેંક ફ્રોડ, ગુનાઈત કમાણીના મની લોન્ડરિંગ તેમજ ઇન્સોલ્વન્સી એન્ડ બેન્કરપ્સી કોડની જોગવાઈઓના ગંભીર દુરુપયોગના કેસમાં મોટી કાર્યવાહી હાથ ધરવામાં આવી છે. 30 સપ્ટેમ્બર 2026 ના રોજ પ્રીવેન્શન ઓફ મની લોન્ડરિંગ એક્ટ, 2002 હેઠળ અમદાવાદ અને મુંબઈના 12 સ્થળો પર દરોડા પાડવામાં આવ્યા હતા. તાયલ ગ્રુપના પ્રમોટર્સ/ડાયરેક્ટર્સ પ્રવીણ તાયલ અને સૌરભ તાયલ દ્વારા રેઝોલ્યુશન પ્રોફેશનલ્સ કિરણ સી. શાહ, વિનોદ પી. અમ્બાવત અને રવિ કપૂરની મિલીભગતમાં રૂ. 821 કરોડના મૂલ્યનું કૌભાંડ આચર્યું હોવાનુંએન્ફોર્સમેન્ટ ડિરેક્ટોરેટના દરોડાને અંતે બહાર આવ્યું છે. 

એન્ફોર્સમેન્ટ ડિરેક્ટોરેટની તપાસ અનુસાર, તાયલ ગ્રુપની મુખ્ય કંપનીઓ  મેસર્સ કે. લાઈફસ્ટાઈલ ઇન્ડસ્ટ્રીઝ લિમિટેડ, મેસર્સ એક્ટિફ કોર્પોરેશન લિમિટેડ અને અને મેસર્સ જયભારત ટેક્સટાઈલ એન્ડ રિયલ એસ્ટેટ લિમિટેડ સામે દાખલ કરવામાં આવેલી ફરિયાદને આધઆરે તપાસ કરવામાં આવી રહી છે. માત્ર કાગળ પર જ અસ્તિત્વ ધરાવતી આ  કંપનીઓએ બેંકો સાથે અંદાજે રૂ. 820.86 કરોડથી વધુ રકમની છેતરપિંડી કરીને વિશાળ નાણાકીય કૌભાંડ આચર્યું છે.

શેલ કંપનીઓ અને 215 બેંક ખાતાઓ સીલ કર્યા

આરોપીઓએ બોગસ એટલે કે માત્ર કાગળ પર જ અસ્તિત્વ ધરાવતી શેલ કંપનીઓ બનાવી સહકારી બેંકોમાં પોતાના સહયોગીઓના નામે મોટા પ્રમાણમાં ખાતાઓ ખોલાવ્યા હતા. તપાસ દરમિયાન આવા 215 બેંક ખાતાઓને PMLA ની કલમ 17(1-A) હેઠળ સીલ કરવામાં આવ્યા છે.  બીજું, દરોડા દરમિયાન કંપનીના પ્રમોટર પ્રવીણ તાયલના નિવાસસ્થાનેથી રૂ. 20 લાખની રોકડ રકમ જપ્ત કરવામાં આવી છે. ઉપરાંત એન્ફોર્સમેન્ટ ડિરેક્ટોરેટ અને બેંક કાર્યવાહીથી છુપાવવામાં આવેલી વિવિધ સ્થાવર મિલકતોના દસ્તાવેજો મળી આવ્યા છે. દરોડા દરમિયાન ગ્રુપ કંપનીઓના નવા એનપીએ-નોન પરફોર્મિંગ એસેટ્સનો પણ પર્દાફાશ થયો છે.

એમ્પ્રેસ મોલ, નાગપુર: કૌભાંડના નાણાં શેલ કંપનીઓ મારફતે રિયલ એસ્ટેટમાં ડાયવર્ટ કરવામાં આવ્યા હતા. ડાયવર્ટ કરેલા નાણાંમાં નાગપુર સ્થિત અંદાજે રૂ. 483 કરોડની કિંમતનો ‘એમ્પ્રેસ મોલ’  તથા અન્ય સ્થાવર મિલકતોનો સમાવેશ થાય છે. આ મિલકતો પર એન્ફોર્સમેન્ટ ડિરેક્ટોરેટ કામચલાઉ ટાંચમાં લગાડવામાં આવી છે. 

કપૂર, અમ્બાવત અને શાહની મોડસ ઓપરેન્ડિ 

તાયલ ગ્રુપના પ્રમોટર્સ અને રેઝોલ્યુશન પ્રોફેશનલ્સ કિરણ સી. શાહ, વિનોદ પી. અમ્બાવત અને રવિ કપૂરની મિલીભગતમાં આ મસમોટું કૌભાંડ કરવામાં આવ્યું છે. એન્ફોર્સમેન્ટ ડિરેક્ટોરેટે મિલકતો એટેચ કર્યા બાદ, તાયલ ગ્રુપના પ્રમોટર્સે પોતાની જ શેલ કંપનીઓ મારફતે ઇન્સોલ્વન્સી એન્ડ બેન્કરપ્સી કોડની કલમ 7 હેઠળ ઇન્સોલ્વન્સીની પ્રક્રિયા શરૂ કરાવી હતી.

1. બોગસ લેણદારોની રચના: તાયલ ગ્રુપ હેઠળ સંપૂર્ણપણે નિયંત્રિત શેલ એન્ટિટીઝને બોગસ લેણદાર તરીકે દર્શાવીને માત્ર મિલકતો બચાવવા માટે ઉપયોગ કરવામાં આવ્યો.
2. લેણદાર બેંકોના વોટિંગ શેર ઘટાડવા: રેઝોલ્યુશન પ્રોફેશનલ્સ (RPs) એ તાયલ ગ્રુપની શેલ કંપનીઓના વગર ચકાસેલા અને વાસ્તવિક કરતાં વધુ બતાવેલા દાવોઓને ગેરકાયદેસર રીતે મંજૂર કર્યા હતા. તેનાથી બેંકોનો વોટિંગ પાવર ઘટી ગયો અને ઇન્સોલ્વન્સી પ્રક્રિયાનો મૂળ હેતુ જ નિષ્ફળ બનાવવામાં આવ્યો હતો. 
3. PMLA હેઠળના એટેચમેન્ટ સામે અરજીઓ અને આદેશો છુપાવવા: રેઝોલ્યુશન પ્રોફેશનલ્સે એન્ફોર્સમેન્ટ ડિરેક્ટોરેટના એટેચમેન્ટ હુકમો રદ કરાવવા માટે અદાલતો અને ટ્રિબ્યુનલોમાં મલ્ટિપલ અરજીઓ કરી અને વિરૂદ્ધમાં આવેલા આદેશોને છુપાવ્યા પણ હતા.
4. ભાડાની આવકમાંથી કરોડો રૂપિયાનું ડાયવર્ઝન: ટાંચમાં લીધેલી મિલકતોમાંથી ઉત્પન્ન થતા કરોડો રૂપિયાના ભાડાનો કબજો મેળવતા એન્ફોર્સમેન્ટ ડિરેક્ટોરેટને રોકવા માટે અડચણો ઊભી કરવામાં આવી હતી. ભાડાની રકમ પ્રમોટર્સની કંપનીઓ દ્વારા સતત મેળવવામાં આવતી હતી. આ કૌભાંડના સંદર્માંભ રવિ કપૂરના રહેઠાણ અને કાર્યાલય પર દરોડા પાડવામાં આવ્યા છે. રવિ કપૂર અગ્રણી રેઝોલ્યુશન પ્રોફેશનલ અને કંપની સેક્રેટરી છે. રવિ કપૂર એન્ડ એસોસિયેટ્સની અમદાવાદના સાહવાલ પ્લાઝા-એલિસબ્રિજની ઓફિસે પણ દરોડો પાડવામાં આવ્યો હતો. રવિ કપૂર કોર્પોરેટ કંપનીઓ દેવામાં ડૂબી જતાં નેશનલ કંપની લો ટ્રિબ્યુનલ હેઠળ ઇન્ટરિમ રેઝોલ્યુશન પ્રોફેશનલ, રેઝોલ્યુશન પ્રોફેશનલ અને લિક્વિડેટર તરીકે સેવાઓ આપે છે તેમજ કોર્પોરેટ લો કમ્પ્લાયન્સ અને ઇન્સોલ્વન્સી એન્ડ બેન્કરપ્સી કોડના કેસોમાં સલાહકાર તરીકે કામ કરે છે.

• કૌભાંડમાં મિલીભગત: તાયલ ગ્રુપના કૌભાંડમાં રવિ કપૂરે અન્ય રેઝોલ્યુશન પ્રોફેશનલ્સ સાથે મળીને તાયલ ગ્રુપના પ્રમોટર્સને મદદ કરી હતી. તેમણે શેલ કંપનીઓના વાસ્તવિક કરતાં ઘણાં મોટા દાવાઓને સ્વીકારીને બેંકોના અધિકારો નબળા પાડ્યા અને એન્ફોર્સમેન્ટ ડિરેક્ટોરેટના અધિકારીઓ જે તે પક્ષકારની મિલકતો જપ્ત કરવાની કાનૂની પ્રક્રિયા કરે ત્યારે તેમાં અવરોધો ઊભા કરવામાં સહયોગ આપ્યો હતો.

અમદાવાદ ઝોનની બીજી તપાસ અને આગળની કાર્યવાહી

એન્ફોર્સમેન્ટ ડિરેક્ટોરેટની અમદાવાદ ઝોનલ ઓફિસે તાયલ ગ્રુપ સામે હાથ ધરાયેલી અન્ય એક તપાસમાં પણ આ જ મોડસ ઓપરેન્ડિ સામે આવી છે. જેમાં તાયલ ગ્રુપે પોતાની કંપની મેસર્સ કૌસર ટેક્સટાઈલ પ્રાઈવેટ લિમિટેડ મારફતે બીજી ગ્રુપ કંપની મેસર્સ વિધાન્ત રિયલ્ટી પ્રાઈવેટ લિમિટેડ સામે ઇન્સોલ્વન્સી એન્ડ બેન્કરપ્સી કોડ હેઠળ ઇન્સોલ્વન્સી પ્રક્રિયા શરૂ કરાવી હતી. આ કેસમાં મેસર્સ ક્યૂબિકલ રિયલ્ટી પ્રાઈવેટ લિમિટેડને સક્સેસફુલ રેઝોલ્યુશન એપ્લિકન્ટ બનાવવામાં આવી હતી, જે ઇન્સોલ્વન્સી એન્ડ બેન્કરપ્સી કોડની કલમ 29-એનું સ્પષ્ટ ઉલ્લંઘન હતું કારણ કે આ કંપનીનું માલિકી હિત પ્રવીણ કુમાર તાયલ અને નવીન કુમાર તાયલ (તાયલ પરિવાર) પાસે જ હતું.