વડોદરાની ESI કોર્ટના ચૂકાદાને હાઈકોર્ટે માન્ય રાખ્યોઃ હજારો કર્મચારીઓને ESIના લાભ આપવાની ONGCને ફરજ પડશે

ગુજરાત સહિત દેશના ઓએનજીસીના અંદાજે ૨૫૦૦૦ કર્મિચારીેને ગુજરાત હાઈકોર્ટના પ્રસ્તુન ચૂકાદાને પરિણામ ફાયદો થશે

અમદાવાદ: વડોદરાની ઈએસઆઈ કોર્ટે ૨૦૨૩માં આપેલા ચૂકાદાની સદંતર અવગણના કરીને કામદારોને ઈએસઆઈસી-એમ્પ્લોયીસ્ટેટ ઇન્સ્યોરન્સના લાભ આપવાની અવગણના કરનાર ઓઈલ એન્ડ નેચરલ ગેસ કમિશન-ઓએનજીસીની અરજીને ગુજરાત હાઈકોર્ટના ન્યાયમૂર્તિ જે.સી. દોશીએ નકારી કાઢતા હવે ઓએનજીસેએ તેના ગુજરાત સહિત દેશભરના કર્મચારીઓને ઇએસઆઈના લાભ આપવાની ફરજ પડશે.

એમ્પ્લોયી સ્ટેટ ઇન્સ્યોરન્સ કોર્પોરેશન વતીથી હાઈકોર્ટમાં રજૂઆત કરનાર એડવોકેટ સચિન વસાવડાનું કહેવું છે કે ગુજરાત હાઈકોર્ટના ચૂકાદાને પરિણામે ઓએનજીસીએ ૨૫૦૦૦ જેટલા કર્મચારીઓને ઈએસઆઈના લાભ મળે તે માટે તેમના બેઝિક પગાર અને મોંઘવારી ભથ્થાની કુલ રકમના ૩.૨૫ ટકા નાણા ઈએસઆઈમાં જમા પણ કરવા પડશે. છેલ્લા પંદર વર્ષના નાણાં જમા કરાવવા ઉપરાંત ઓએનજીસીએ તેના પર વ્યાજ પણ ચૂકવવું પડશે. ઈએસઆઈ ઓએનજીસી પાસેથી અંદાજે છેલ્લા પંદર વર્ષના ઈએસઆઈના લેણા કાઢશે. પરિણામે ઓએનજીસીને માથે કરોડો રૃપિયાનો ખર્ચ બોજ આવી જશે.માસિક રૂ. ૨૧૦૦૦ સુધીનો પગાર ધરાવનારા કામદારોને ઈએસઆઈનો લાભ આપવો કાયદા હેઠળ ફરજિયાત છે.

આ કાનૂની જોગવાઈના અનુસંધાનમાં વડોદરાની ઈએસઆઈ કોર્ટે ૨૦૨૩ના અરસામાં ઓએનજીસીને કર્મચારીઓને એમ્પ્લોયી સ્ટેટ ઇન્સ્યોરન્સો લાભ આપવાનો આદેશ કર્યો હતો. આ આદેશ થયા પછી ઓએનજીસીએ તેની સદંતર અવગણના કરી હતી. પરિણામે ઈએસઆઈએ ૨૦૨૪ની સાલમાં ઓએનજીસી પાસેથી ઈએસઆઈ પેટે કર્મચારીઓના ફાળા પેટે કર્મચારીઓને બેઝિક પગાર અને મોંઘવારી ભથ્થાની થતી કુલ રકમના ૩.૨૫ ટકા  નાણાંની રિકવરી કરવાની પ્રક્રિયા શરુ કરી હતી. આ તબક્કે ઓએનજીસીએ વડોદરાનો ૨૦૨૩ના ચૂકાદાનો હાઈકોર્ટમાં પડકારવાનો નિર્ણય કર્યો હતો.

પરંતુ હાઈકોર્ટમાં વડોદરાની ઈએસઆઈ કોર્ટના ચૂકાદાને પડકારવામાં ૬૧૦ દિવસનો વિલંબ થઈ ગયો હતો. આ વિલંબ માફ કરીને તેમની વડોદરાની ઈએસઆઈ કોર્ટના ચકાદાને પડકારવાની માગણી કરતી અરજીનો સ્વીકાર કરવા ઓએનજીસીએ વિનંતી કરી હતી.જોકે આ વિલંબ માટે કાયદાકીય જોગવાઈ હેઠળ હાઈકોર્ટમાં મૂકવા પડતા તાર્કિક અને સંગીન કારણો રજૂ કરવાને બદલે ઓએનજીસીના વકીલે કંપનીના કર્મચારીની ભૂલને કારણે ચૂકાદાનો પડકારવામાં વિલંબ થયો હોવાની દલીલ કરી હતી. તેની સામે કામદારો વતીથી રજૂઆત કરનાર વકીલે એવી દલીલ કરી હતી કે કંપનીના અધિકારીની ભૂલ હોય તો કંપનીએ તે અધિકારી સામે કેમ પગલાં લીધા નથી. આમ તેમણે કંપનીએ જ જાણીબૂઝીને વડોદરાની ઈએસઆઈ કોર્ટના ચૂકાદાની અવગણના કરી હોવાનો સંકેત હાઈકોર્ટને આપી દીધો હતો.

હાઈકોર્ટે કામદારોના વકીલની દલીલને ગ્રાહ્ય રાખીને ડિલે કોન્ડોન કરવાની ના પાડી દીધી હતી. તેની સાથે જ વડોદરાની ઈએસઆઈ કોર્ટના ચૂકાદાને માન્ય પણ રાખ્યો હતો. તેથી ઓએનજીસીએ ગુજરાત સહિત દેશભરના એકમોમાં કામ કરતાં રૃા. ૨૧૦૦૦થી ઓછી માસિક આવક ધરાવતા કર્મચારીઓને ઈએસઆઈનો લાભ આપવાની ફરજ પડી રહી છે. તેને માટે ઓએનજીસીએ કરોડો રુપિયા ઈએસઆઈમાં જમા પણ કરાવવા પડશે.