H-1B વિઝાધારક ભારતીય પ્રોફેશનલ્સ નોકરી ગુમાવવાના કિસ્સામાં શું કરી શકે છે?

યુએસ H-1B ૬૦-દિવસનો ગ્રેસ પિરિયડ દૂર કરી શકે છે: નોકરી ગુમાવવાના કિસ્સામાં ભારતીય પ્રોફેશનલ્સ શું કરી શકે છે

અમેરિકાના ડિપાર્ટમેન્ટ ઓફ હોમલેન્ડ સિક્યોરિટીએ નોકરી ગુમાવ્યા પછી પાત્ર H-1B કર્મચારીઓને મળતો ૬૦-દિવસનો ગ્રેસ પિરિયડ નાબૂદ કરવાનો પ્રસ્તાવ મૂક્યો છે.

નોકરી જવી એ ગમે ત્યાં તણાવપૂર્ણ હોય છે, પરંતુ H-1B વિઝા પર તે એક ઊંધી ગણતરી (કાઉન્ટડાઉન) સમાન છે. હાલમાં તે કાઉન્ટડાઉન ૬૦ દિવસનું છે, જે બીજો સ્પોન્સર શોધવા, અન્ય સ્ટેટસમાં શિફ્ટ થવા અથવા વર્ષોથી બનાવેલું જીવન સમેટવા માટે પૂરતો સમય છે. વ્હાઇટ હાઉસના ઓફિસ ઓફ ઈન્ફોર્મેશન એન્ડ રેગ્યુલેટરી અફેર્સને સમીક્ષા માટે મોકલવામાં આવેલો ઉપરોક્ત પ્રસ્તાવ એચ-1બી વિઝા ધારકને મળતો ૬૦ દિવસ છીનવી શકે છે. અમેેરિકાના ડિપાર્ટમેન્ટ ઓફ હોમલેન્ડ સિક્યોરિટી (DHS) એ સ્વેચ્છાએ મળતા ૬૦-દિવસના ગ્રેસ પિરિયડને નાબૂદ કરવાનો પ્રસ્તાવ મૂક્યો છે. આ પ્રસ્તાવ હાલમાં સમીક્ષા હેઠળ છે.

H-1B વિઝા એ એક કામચલાઉ, એમ્પ્લોયર-સ્પોન્સર યુએસ નોન-ઇમિગ્રન્ટ વર્ક વિઝા છે. તે અમેરિકી કંપનીઓને વિશિષ્ટ વ્યાવસાયિક નોકરીઓ માટે વિદેશી નાગરિકોને રાખવાની મંજૂરી આપે છે. ભારતીય વ્યાવસાયિકો માટે, આની અસર માત્ર બીજી નોકરી શોધવા પૂરતી મર્યાદિત નથી. જો આ પ્રસ્તાવ અમલમાં આવે છે, તો નોકરી જવાથી કર્મચારીઓ પાસે તેમનું ઇમિગ્રેશન સ્ટેટસ બચાવવા માટે ખૂબ જ ઓછો સમય બચશે, ખાસ કરીને તે લોકો માટે કે જેમની પાસે અમેરિકામાં રહેવાની મંજૂરી આપતું અન્ય કોઈ સ્ટેટસ નથી.

ઇમિગ્રેશન એટર્ની કહે છે કે સૌથી મોટી અસર H-1B કર્મચારીઓ પાસે નોકરી ગુમાવ્યા પછી હાલમાં જે નિયમનકારી બફર (સમયગાળો) છે તે છીનવાઈ જશે. ગ્રેસ પિરિયડ નાબૂદ કરવામાં આવે આવે, તો રોજગાર સમાપ્ત થયા પછી કર્મચારી ખૂબ જ ટૂંક સમયમાં H-1B સ્ટેટસ ગુમાવી શકે છે.

નોકરી ગુમાવ્યા પછી તરત જ H-1B કર્મચારીઓએ શું કરવું જોઈએ?

પ્રથમ પગલું એ રોજગારનો છેલ્લો દિવસ ચોક્કસપણે નક્કી કરવાનો છે. કર્મચારીએ પછી તેમનું ફોર્મ I-94 અને H-1B મંજૂરી દસ્તાવેજો તપાસવા જોઈએ અને વિલંબ કર્યા વિના ઇમિગ્રેશન વ્યાવસાયિકની સલાહ લેવી જોઈએ. I-94 એ યુએસ કસ્ટમ્સ એન્ડ બોર્ડર પ્રોટેક્શન દ્વારા જારી કરાયેલ અધિકૃત આગમન અને પ્રસ્થાન રેકોર્ડ છે. તે તે તારીખ રેકોર્ડ કરે છે કે જ્યાં સુધી વિદેશી મુલાકાતીને અમેેરિકામાં રહેવા માટે અધિકૃત કરવામાં આવ્યા છે.

વર્તમાન સિસ્ટમ હેઠળ, ૬૦-દિવસનો સમયગાળો અન્ય લાયક એમ્પ્લોયરને શોધવા, અન્ય ઇમિગ્રેશન સ્ટેટસ શોધવા અથવા અમેરિકા છોડવાની ગોઠવણ કરવા માટે સમય પૂરો પાડે છે. જો તે સમયગાળો દૂર કરવામાં આવે તો કર્મચારીઓને બીજી નોકરી મળે છે કે નહીં તે જોવા માટે રાહ ન જોવાની સલાહ આપે છે. નોકરીની શોધ અને ઇમિગ્રેશન મૂલ્યાંકન બંને એક સાથે થવા જોઈએ. કર્મચારીઓએ તેમના ઇમિગ્રેશન અને રોજગાર રેકોર્ડની વ્યક્તિગત નકલો પણ પોતાની પાસે રાખવી જોઈએ, જેમાં નીચેનાનો સમાવેશ થાય છે:

ફોર્મ I-94

H-1B મંજૂરી નોટિસ (Approval Notices)

તાજેતરના પગારપત્રક (Pay Statements)

રોજગાર રેકોર્ડ્સ

અગાઉના ઇમિગ્રેશન ફાઇલિંગ્સ

ગ્રીન-કાર્ડ દસ્તાવેજો (જ્યાં લાગુ પડતું હોય)

શું H-1B કર્મચારી બીજા એમ્પ્લોયર પાસે જઈ શકે છે?

નોકરી ગુમાવનારા H-1B કર્મચારી માટે અન્ય લાયક એમ્પ્લોયર શોધવો એ મુખ્ય વિકલ્પોમાંથી એક રહેશે. લાયક કર્મચારી યોગ્ય ટ્રાન્સફર પ્રક્રિયા દ્વારા બીજા H-1B એમ્પ્લોયર પાસે જઈ શકે છે. પરંતુ માત્ર નોકરીની ઓફરથી જ ઇમિગ્રેશનનો મુદ્દો ઉકેલાઈ જતો નથી. કર્મચારીએ એ પણ સમજવું જરૂરી છે કે નવો એમ્પ્લોયર જરૂરી H-1B કાગળ ક્યારે ફાઇલ કરી શકે છે અને શું કર્મચારી સંક્રમણ (ટ્રાન્ઝિશન) દરમિયાન કાયદેસર સ્ટેટસ જાળવી શકે છે કે નહીં. જો હાલનો ૬૦-દિવસનો ગ્રેસ પિરિયડ નાબૂદ થાય તો તે વધુ મહત્વનું બની જાય છે.

શું મંજૂર થયેલું I-140 H-1B કર્મચારીનું રક્ષણ કરે છે?

સ્વચાલિત રીતે નહીં. I-140 એ વિદેશી કર્મચારી માટે યુએસ એમ્પ્લોયર દ્વારા ફાઇલ કરાયેલ ઇમિગ્રન્ટ અરજી છે જે રોજગાર-આધારિત ગ્રીન કાર્ડ માંગે છે. I-140 ની મંજૂરી દર્શાવે છે કે કર્મચારી પાસે મંજૂર થયેલ રોજગાર-આધારિત ઇમિગ્રન્ટ અરજી છે, પરંતુ તે પોતે કર્મચારીને અલગ નોન-ઇમિગ્રન્ટ સ્ટેટસ આપતું નથી. મંજૂર થયેલ I-140 એ રોજગાર-આધારિત ગ્રીન-કાર્ડ પ્રક્રિયામાં એક મહત્વપૂર્ણ પગલું છે, પરંતુ તે પોતે H-1B કર્મચારીને સ્વતંત્ર નોન-ઇમિગ્રન્ટ સ્ટેટસ આપતું નથી. વિઝા એટર્ની કહે છે કે કર્મચારીઓએ એવું ન માનવું જોઈએ કે માત્ર મંજૂર થયેલું I-140 તેમને H-1B નોકરી ગુમાવ્યા પછી અમેરિકામાં રહેવાની મંજૂરી આપે છે. કર્મચારીએ હજુ પણ નક્કી કરવાની જરૂર રહેશે કે અન્ય ઇમિગ્રેશન સ્ટેટસ અથવા કાનૂની આધાર ઉપલબ્ધ છે કે નહીં.

પેન્ડિંગ I-485 ધરાવતા H-1B કર્મચારીઓનું શું થશે?

યોગ્ય રીતે ફાઇલ કરેલી અને પેન્ડિંગ I-485 એડજસ્ટમેન્ટ-ઓફ-સ્ટેટસ અરજી ધરાવતી વ્યક્તિ માટે પરિસ્થિતિ અલગ હોઈ શકે છે. ફોર્મ I-485 એ એક અરજી છે જે અમેરિકામાં પહેલાથી મોજૂદ અને લાયક વિદેશી નાગરિકને દેશ છોડ્યા વિના કાયદેસર કાયમી નિવાસી (ગ્રીન-કાર્ડ ધારક) બનવા માટે અરજી કરવાની મંજૂરી આપે છે. પેન્ડિંગ એડજસ્ટમેન્ટ અરજી કર્મચારીને જુદી સ્થિતિમાં મૂકી શકે છે કારણ કે તે અરજી પેન્ડિંગ હોય ત્યારે અમેરિકામાં રહેવા માટે એક અલગ આધાર પૂરો પાડી શકે છે. કેટલાક કિસ્સાઓમાં, કર્મચારી પાસે એમ્પ્લોયમેન્ટ ઓથોરાઇઝેશન ડોક્યુમેન્ટ પણ હોઈ શકે છે જે H-1B એમ્પ્લોયરથી સ્વતંત્ર કામ કરવાની મંજૂરી આપે છે. જો કે, ગ્રીન-કાર્ડની અરજી હોવાથી દરેક H-1B કર્મચારીનું નોકરી છૂટ્યા પછી આપમેળે રક્ષણ થતું નથી. વ્યક્તિગત કેસની વિગતો મહત્વ ધરાવે છે. તેથી મંજૂર થયેલા I-140 અથવા પેન્ડિંગ I-485 અરજીઓ ધરાવતા કર્મચારીઓએ ટર્મિનેશન પછી નિર્ણયો લેતા પહેલા તેમના કેસોની સમીક્ષા કરાવવી જોઈએ.

H-4 ડિપેન્ડન્ટ્સનું શું થશે?

નવા પ્રસ્તાવની અસર કર્મચારીના પરિવાર સુધી લંબાઈ શકે છે. H-4 વિઝા એ ચોક્કસ H-1B વિઝા ધારકોના જીવનસાથી અને અપરિણિત બાળકો માટેનો ડિપેન્ડન્ટ નોન-ઇમિગ્રન્ટ વિઝા છે. H-4 સ્ટેટસ સામાન્ય રીતે મુખ્ય H-1B કર્મચારીના સ્ટેટસ સાથે જોડાયેલું હોય છે. તેથી H-1B કર્મચારીના ઇમિગ્રેશન સ્ટેટસમાં ફેરફાર પરિણામસ્વરૂપ H-4 જીવનસાથી અને બાળકો માટે અસરો ઊભી કરી શકે છે. ચોક્કસ પરિણામ પરિવારના સંજોગો પર આધાર રાખે છે, જેમાં H-4 સ્ટેટસની માન્યતા, પેન્ડિંગ અરજીઓ અને જ્યાં લાગુ પડતું હોય ત્યાં H-4 વર્ક ઓથોરાઇઝેશનનો સમાવેશ થાય છે. H-1B પરિવારો માટે, નોકરી ગુમાવવાના કિસ્સામાં ઇમરજન્સી પ્લાનમાં (કન્ટિન્જન્સી પ્લાન) જીવનસાથી અને બાળકોને પણ આવરી લેવા જોઈએ.

જો H-1B કર્મચારી પહેલાથી જ ૬૦-દિવસના ગ્રેસ પિરિયડમાં હોય તો શું થશે?

જો ડીએચએસ પ્રસ્તાવિત ફેરફારને આખરી ઓપ આપે તો આ સૌથી મહત્વપૂર્ણ પ્રશ્નોમાંથી એક બની શકે છે. ઉદાહરણ તરીકે, આખરી નિયમ અમલમાં આવે તે પહેલાં H-1B કર્મચારી પોતાની નોકરી ગુમાવી શકે છે પરંતુ નવો નિયમ અમલી બને ત્યારે પણ તે હાલના ૬૦-દિવસના સમયગાળામાં હોય તો શું તે કર્મચારી વર્તમાન રક્ષણ જાળવી રાખશે, કે નવો નિયમ તરત જ લાગુ થશે? હજુ સુધી તેનો કોઈ ચોક્કસ જવાબ નથી કારણ કે અંતિમ નિયમનકારી ભાષા અને કોઈપણ સંક્રમણ જોગવાઈઓ નક્કી કરશે કે DHS આવા કેસોને કેવી રીતે સંભાળશે. આ અંગે ચોક્કસ જવાબ આપવો ખૂબ વહેલો ગણાશે. તે કર્મચારીઓને એવું ના માનવાની પણ ચેતવણી આપે છે કે નવો નિયમ અમલમાં આવ્યો તે પહેલાં જે લોકોનો રોજગાર સમાપ્ત થયો હતો તેમને નવો પ્રતિબંધ આપમેળે લાગુ થશે. અંતિમ નિયમ પ્રકાશિત ન થાય ત્યાં સુધી, કર્મચારીઓએ એવું ન માનવું જોઈએ કે નવો પ્રતિબંધ ભૂતકાળની તારીખથી અમલી બનશે.

ભારતીય H-1B કર્મચારીઓએ અત્યારે શું કરવું જોઈએ?

એચ-વન બી વિઝાધારકોને સલાહ છે કે નોકરીમાંથી મુક્ત કરવામાં આવે તે પહેલાં નીચે મુજબની તૈયારી કરવાની છે.

ઇમિગ્રેશન રેકોર્ડ્સ રાખો: તમારા I-94, H-1B મંજૂરી નોટિસ, રોજગાર રેકોર્ડ્સ, પગારપત્રક અને અગાઉના ફાઇલિંગ્સની વ્યક્તિગત નકલો જાળવો.

તમારી તારીખો જાણો: તમારા એમ્પ્લોયર પર સંપૂર્ણ આધાર રાખવાને બદલે તમારી I-94 ની માન્યતા અને H-1B મંજૂરીના સમયગાળા પર નજર રાખો.

તમારા ગ્રીન-કાર્ડ કેસની સમીક્ષા કરો: જો તમારી પાસે મંજૂર I-140 અથવા પેન્ડિંગ I-485 છે, તો અમેરિકામાં રહેવા અને કામ કરવાની તમારી ક્ષમતા માટે તેનો શો અર્થ થાય છે તે સમજો.

તમારા પરિવારનું સ્ટેટસ તપાસો: સમજો કે H-1B સ્ટેટસમાં ફેરફાર H-4 ડિપેન્ડન્ટ્સને કેવી રીતે અસર કરી શકે છે.

લે-ઓફ પ્લાન રાખો: જાણો કે તમે કયા ઇમિગ્રેશન વ્યાવસાયિકનો સંપર્ક કરશો અને સંબંધિત દસ્તાવેજો સુલભ રાખો.

ઝડપથી કાર્ય કરો: જો રોજગાર સમાપ્ત થાય છે, તો ઉપલબ્ધ સમયગાળાના અંત સુધી રાહ જોવાને બદલે તરત જ ઇમિગ્રેશન અને રોજગાર વિકલ્પો શોધવાનું શરૂ કરો.

આગળ શું થશે?

હાલ માટે, હાલનો ૬૦-દિવસનો H-1B ગ્રેસ પિરિયડ અમલમાં છે. પ્રસ્તાવિત DHS ફેરફાર હજુ સુધી અંતિમ નિયમ બન્યો નથી. તેની અંતિમ ભાષા, અમલીકરણની તારીખ અને કોઈપણ સંક્રમણ જોગવાઈઓ નક્કી કરશે કે તે વર્તમાન અને ભવિષ્યના H-1B કર્મચારીઓને કેવી રીતે અસર કરે છે. પરંતુ ભારતીય વ્યાવસાયિકો માટે, વ્યવહારુ પાઠ એ છે કે જો વર્તમાન નિયમનકારી બફર અદૃશ્ય થઈ જાય તો નોકરી ગુમાવવી એ વધુ સમય-સંવેદનશીલ ઇમિગ્રેશન સમસ્યા બની શકે છે. તેથી કર્મચારીઓએ પોતાનું સ્ટેટસ જાણવું જોઈએ, તેમના દસ્તાવેજો તૈયાર રાખવા જોઈએ અને નોકરી ગુમાવવાનો પ્રસંગ આવે તે પહેલાં તેમના સંભવિત વિકલ્પો સમજી લેવા જોઈએ.