રૃ. ૨૧.૪૯ કરોડની બોગસ ઇનપુટ ટેક્સ ક્રેડિટ લેનાર અજયકુમાર શાહની ધરપકડ
બોગસ બિલિંગ કૌભાંડમાં ડિજિટલ ડેટા વાંધાજનક દસ્તાવેજો જપ્ત
પ્રાથમિક તપાસમાં રૃ. ૭૯.૪૫ કરોડની કરચોરઃ રૃ. ૪૮૫ કરોડની તપાસના અંતે કર ચોરીનો આંકડો વધવાની શક્યતા
ગુજરાત સ્ટેટ ગુડ્ઝ એન્ડ સવસ ટેક્સ વિભાગ દ્વારા હાથ ધરવામાં આવેલી રાજ્યવ્યાપી સર્ચ કાર્યવાહીમાં માલની વાસ્તવિક હેરફેર વિના માત્ર બોગસ બિલિંગને એટલે કે માત્ર બિલ-ઇન્વોઇસને આધારે ખોટી ઇનપુટ ટેક્સ ક્રેડિટ મેળવવાના કૌભાંડનો પર્દાફાશ કરાયો છે. પ્રાથમિક તપાસમાં ૧૧ બોગસ પેઢીઓની સંડોવણી બહાર આવી છે. ઓઢવ સ્થિત આ પેઢીઓ મારફતે રુ. ૧૧૯ કરોડના બિલિંગના વહેવારો કર્યા હોવાનું બહાર આવ્યું છે. અત્યાર સુધીમાં રૃ. ૨૧.૪૯ કરોડની વેરાકીય જવાબદારી ઉપસ્થિત કરવામાં આવી છે.
તપાસમાં મેસર્સ નટરાજ ઇન્ડસ્ટ્રીઝના માલિક તથા મેસર્સ નટરાજ મેટલ ઇન્ડસ્ટ્રીઝના ભાગીદાર અજયકુમાર સત્યનારાયણ શાહ દ્વારા બોગસ ખરીદીઓના આધારે રૃ. ૨૧.૪૯ કરોડથી વધુ રકમની ખોટ ઇનપુટ ટેક્સ ક્રેડિટ મેળવી હોવાનું બહાર આવ્યું છે. તેમની સક્રિય સંડોવણી અને ગુનાની ગંભીરતાને ધ્યાને લઈને વિભાગ દ્વારા તેમની ધરપકડ કરવામાં આવી છે.
સ્ટેટ જીએસટી વિભાગ દ્વારા સર્ચ દરમિયાન મહત્વપૂર્ણ દસ્તાવેજો, કમ્પ્યુટર અને અન્ય ડિજિટલ ઉપકરણો જપ્ત કરવામાં આવ્યા છે અને તેની ઊંડાણપૂર્વકની ચકાસણી ચાલુ છે અને તપાસ આગળ વધતાં વધુ તથ્યો તથા વધારાની વેરાકીય જવાબદારી બહાર આવવાની શક્યતા છે.
