ગુજરાતમાં બ્લડ પ્રેશર ને હાર્ટની દવાના 30 ડીલરો પર ફૂડ એન્ડ ડ્રગ કચેરીનો સપાટો, ડુપ્લિકેટ દવા જપ્ત કરી

મૂળ કંપનીના નામે બોગસ બેચનંબરથી દવા બજારમાં મૂકી

ગુજરાતમાં બ્લડ પ્રેશર ને હાર્ટની દવાના 30 ડીલરો પર ફૂડ એન્ડ ડ્રગ કચેરીનો સપાટો 

અમદાવાદઃ બ્લડ પ્રેશર અને હાર્ટના દરદીઓ માટે વપરાતી નિકાર્ડિયા રિટાર્ડની ૧૦ અને ૨૦ એમજીની ડુપ્લિકેટ દવા પકડી પાડવા માટે પાડવામાં આવેલા દરોડામાં ભાવનગર અને નડિયાદના ડીલરો પાસેથી અંદાજે રૃા. ૩.૫ લાખના મૂલ્યની દવાઓ મળી આવી છે. આ ડુપ્લિકેટ દવાના સેમ્પલ લઈને વડોદરાની લેબોરેટરીમાં તપાસ માટે મોકલી આપવામાં આવી છે. અમદાવાદની લીલાવતી ફાર્મસી એન્ડ વેલનેસ પ્રાઈવેલ લિમિટેડમાં પણ આ દવા વેચાતી હોવાની વાત બહાર આવી રહી છે. નડિયાદના કિસન મેડિકલ સ્ટોરમાંથી જે.બી. કેમિકલ્સ-ભરૃચના નામે દર્શાવેલી નિકાર્ડિય રેટાર્ડ ૧૦ એમજીની ૬૬૦ ટેબ્લેટનો જથ્થો મળી આવ્યો છે. જે.બી. કેમિકલ્સને હજી બે મહિના પૂર્વે જ ટોરન્ટ ફાર્માએ હસ્તગત કરી છે.અમદાવાદની પાર્શ્વ મેડિકલ એજન્સી પાલડી ખાતેથી પણ ૫૯૦ ટબ્લેટનો જથ્થો મળી આવ્યો છે. તેની પાસેથી સિલાકાર-૫, સિલાકાર-૧૦ સિલાકાર ૧૦ ટીએમ-૫૦ અને નિકાર્ડિયા રિટાર્ડ ૧૦ એમજીનો જથ્થો પણ મળી આવ્યો છે. આ દવાનો મૂળસ્રોત લખનૌની સેના ફાર્મસી હોવાનું જાણવા મળી રહ્યું છે. તેથી તપાસનો દોર લખનવ સુધી પહોંચી રહ્યો છે.

નડિયાદ અને ભાવનગરથી રુ. ૩.૫૦ લાખની કિંમતનો ડુપ્લિકેટ  નિકાર્ડિયા રિટાર્ડનો જથ્થો મળ્યો

 જોકે બાકીના  ૩૦થી વધુ ડિલરો પર પાડવામાં આવેલા દરોડામાં મોટાભાગના ડીલરોએ તેમની પાસે આવેલી દવાઓ વેચી દીધી હોવાનું જણાવવામાં આવી રહ્યું છે. ભરૂચની જે.બી. કેમિકલ્સ એન્ડ ફાર્માસ્યૂટિકલ્સની આ ટેબ્લેટ છે. આ કંપનીને બે મહિના પહેલા જ ટોરેન્ટ ફાર્માએ હસ્તગત કરી લીધી છે. જોકે આ ડીલરોને બચાવવાની આંતરિક કવાયત ચાલી રહી હોવાની વાતાઓ જોર પકડયું છે. તેથી જ તેમની પાસેથી દવા ન મળી હોવાનું જણાવવામાં આવી રહ્યું હોવાનું દવા બજારના જાણકાર સૂત્રોનું કહેવું છે. વીપીડી તરીકે ઓળખાતા અને વર્ધમાન સાથે સંકળાયેલી કંપની ભૂતકાળમાં આ પ્રકારને ડુપ્લિકેટ બેચની દવાઓ વેચતા પકડાઈ હોવાનું જાણકાર સૂત્રોનું કહેવું છે. આ કંપનીને જતી કરવામાં આવી રહી હોવાની દવા બજારમાં ચર્ચા છે.

જોકે આ 30 ડિલરોએ કોની પાસેથી કેટલા જથ્થામાં દવાઓ ખરીદી છે તેની તપાસ હજી કરવામાં આવી ન હોવાથી તેમને બચાવવાની કવાયત કરવામાં આવી રહી હોવાની આશંકા દવા બજારના સૂત્રો દ્વારા વ્યક્ત કરવામાં આવી રહી છે. જાણકાર સૂત્રોના જણાવ્યા મુજબ અંદાજે ૨૪૦૦૦ સ્ટ્રીપ જપ્ત કરવામાં આવી છે. તેમાંથી મોટાભાગની સ્ટ્રીપ વેચાઈ ગઈ હોવાનું કહેવાય છે.

ગુજરાતની ટોચની પાંચ ફાર્મા કંપનીઓમાં આવતી ટોરેન્ટ ફાર્મા નિકાર્ડિયા રિટાર્ડની બ્રાન્ડની માલિકી ધરાવે છે. તેમની આ દવા ડુપ્લીટેક બેચ નંબરથી બજારમાં મૂકવામાં આવતા તેમણે ફૂડ એન્ડ ડ્રગ કમિશનરની કચેરીના લેખિતમાં ફરિયાદ કર્યા પછી આ દરોડા પાડવામાં આવ્યા છે. હવે દરોડા દરમિયાન મળેલી માહિતી મુજબ આ દવાઓ લખનૌના કોઈ સપ્લાયર પાસેથી મંગાવવામાં આવી હતી. પરિણામે લખનૌ તરફ તેની તપાસ આગળ વધારવામાં આવી રહી છે.

આ દરોડા પાડયા પછી જપ્ત કરવામાં આવેલા સેમ્પલ્સ વડોદરા સ્થિત ફૂડ એન્ડ ડ્રગ કમિશનરની કચેરી હેઠળ ચાલતી લેબોરેટરીમાં મોકલી આપવામાં આવી છે. આ લેબોરેટરીમાંથી દસેક દિવસમાં જ રિપોર્ટ આવી જવાની સંભાવના છે.લેબોરેટરીમાં દવાના ઘટકો અને માનવ શરીરમાં ગયા પછી તે કેટલા સમયમાં અસર કરવા માંડશે તે સહિતની બાબતોના અખતરા કરીને પછી રિપોર્ટ આપવામાં આવશે.

આ દવાઓ તેના બજાર ભાવ કરતાં ઘણાં સસ્તા દામે વેચતા હોવાથી  આ દવાઓ ડુપ્લિકેટ હોવાની આશંકા સાથે અમદાવાદ અને વડોદરા સહિતના વિસ્તારોના ડીલરો પર દરોડા પાડવામાં આવ્યા છે. ડીલરોને કાયદેસર ૧૦ ટકા જ માર્જિન મળતાં હોવા છતાં તેઓ ૧૭થી ૧૮ ટકા ડિસ્કાઉન્ટથી દવાઓ વેચતા હોવાથી તેઓ ડુપ્લિકેટ કે સબસ્ડાન્ડર્ડ દવાઓ વેચતા હોવાની આશંકા સાથે દરોડા પાડવામાં આવ્યા હોવાનું જાણવા મળી રહ્યું છે. નિકાર્ડિયા રિટાર્ડમાં બ્લડ પ્રેશર અને હૃદયના ધબકારાને અંકુશમાં રાખવા માટે નિફિડિફિન નામનું ઘટક નાખવામાં આવે છે. પરંતુ આ દવાઓ અહીંના ડીલરે દિલ્હીના કેટલાક સપ્લાયરો પાસેથી લાવીને સસ્તા દામે વેચતા હોવાથી શંકા જન્મી છે.

નિકાર્ડિયા રિટાર્ડના ડુપ્લિકેટ બેચનો વેપાર કરતાં કેમિસ્ટો

– લીલાવતી ફાર્મસી એન્ડ વેલનેસ પ્રાઈવેટ લિમિટેડ

– પાર્શ્વનાથ મેડિકલ એજન્સી-પાલડી

– એપેક્સ ફાર્મા એજન્સી-ભાવનગર

– રોટરી ટીમ્બિ મેડિકલ સ્ટોર-ભાવનગર

– પારસ ઇકોમેડ-અમદાવાદ

– સાણંદ મેડિકલ સ્ટોર-સાણંદ

– ફાર્મા ૩૬૫-અમદાવાદ

– અરિહંત મેડિકલ એજન્સી-સેટેલાઈટ, અમદાવાદ

– જે.એલ.યુ. મેડિકલ એજન્સી-શાહીબાગ અમદાવાદ

– વર્ધમાન મેડિકલ એજન્સી, અમદાવાદ

– સાગર ફાર્મા એજન્સી-જૂનાગઢ

– આગમ ગમ ફાર્માસ્યૂટિકલ્સ મેઘાણીનગર અમદાવાદ

– આયુષ મેડિકલ એજન્સી, અમદાવાદ

– સુમેલ-શાહીબાગ, અમદાવાદ

– એશ્યોર હેલ્થકેર, દરિયાપુર અમદાવાદ

– રિદ્ધિસિદ્ધિ મેડિકલ એજન્સી, સોલા અમદાવાદ

– ગ્લોબલ ફાર્મા-ઘાટલોડિયા અમદાવાદ

– ગિરિરાજ હેલ્થકેર પાલડી અમદાવાદ

– કે.એમ. ડિસ્ટ્રીબ્યુર, એલીસબ્રિજ અમદાવાદ,

– મેરુ ફાર્મા – સુરત

– શ્યામ ડિસ્ટ્રીબ્યુટર સુરત

– સંજીવની મેડિકલ ગાંધીધામ ભુજ

–  રોટરી ટીમ્બી  મેડિકલ સ્ટોર ઉમરાળા-ભાવનગર

– રામ મેડિકલ સ્ટોર-ભાવનગર

– સત્યમ ફાર્મસી ભાવનગર