જીએસટી અધિકારીઓએ રૂ. ૧૨૮ કરોડનું બોગસ બિલિંગનું કૌભાંડ પકડી પાડયું
રૃા. ૨૩.૦૮ કરોડની જીએસટીની ચોરી પકડાઈઃ મેસર્સ મંડાવારા ટ્રેડિંગ કંપનીના માલિક સુરેશ શાહ અને તેમના પુત્ર આયુષ શાહની ધરપકડ કરવામાં આવી
અમદાવાદ: ગુડ્સ એન્ડ સર્વિસ ટેક્સની ગુજરાત કચેરીના અધિકારીઓએ રૃા. ૧૨૮ કરોડનું બોગસ બિલિંગનું કૌભાંડ પકડી પાડીને કૌભાંડમાં સંડોવાયેલા મેસર્સ મંડાવારા ટ્રેડિંગ કંપનીના માલિક આયુષ સુરેશચંદ્ર શાહની ધરપકડ કરવામાં આવી છે. તેમણે રૃા. ૨૩.૦૮ કરોડની જીએસટીની ચોરી પણ કરી હોવાનું બહાર આવ્યું છે. આ કૌભાંડના સંદર્ભમાં જીએસટીના અધિકારીઓએ મેસર્સ મંડાવારા ટ્રેડિંગ કંપનીના અમદાવાદ, ગાંધીનગર, વડોદરા, સુરત, ભાવનગર, જામનગરની ઓફિસો પર ગત ૧૬મી જૂને દરોડા પણ પાડવામાં આવ્યા હતા. દરોડા હેઠળ જુદી જુદી ૨૨ કંપનીઓને આવરી લેવામાં આવી હતી.
મેસર્સ મંડોવારા ટ્રેડિંગ કંપનીના માલિક સુરેશ શાહે પિત્તળ અને તાંબાની બોગસ ખરીદી બતાવીને મોટે પાયે ગુડ્સ એન્ડ સર્વિસ ટેક્સની ચોરી કરી હતી.તેની મદદથી બોગસ આર્થિક વહેવારોના અનુસંધાનમાં રુ. ૨૩.૦૫ કરોડની ગુડ્સ એન્ડ સર્વિસ ટેક્સની ચોરી કરી હોવાનું પણ બહાર આવ્યું છે. આ કેસમાં કરવામાં આવેલી પ્રાથમિક તપાસમાં જાણવા મળ્યું છે કે મંડાવારાની ટ્રેડિંગ કંપની માલની હેરફેર કર્યા વિના જ બોગસ બિલ બનાવીને સોદા બતાવીને ઇનપુટ ટેક્સ ક્રેડિટ લેતી હતી. આ રીતે સરકારી તિજોરીને સુરેશ શાહ અને આયુષ શાહ રુ. ૨૦.૦૮ કરોડનું નુકસાન પહોંચાડયું હતું.
ગુડ્સ એન્ડ સર્વિસ ટેક્સ એક્ટની કલમ ૧૩૨ (૧) (સી)માં કરવામાં આવેલી જોગવાઈનો ભંગ કરીને તેમણે ગેરકાયદેસર રીતે ઇનપુટ ટેક્સ ક્રેડિટ લીધી હતી. આ બોગસ બિલની મદદથી ઇનપુટ ટેક્સ ક્રેડિટ લઈને તેમણે કલમ ૧૩૨ (૨) (બી)ની જોગવાઈઓનો ભંગ કરીને બીજો ગુનો આચર્યો હતો. બોગસ બિલિંગના કૌભાંડમાં પ્રસ્તુત બંને આરોપી સંડોવાયેલા હોવાનું પ્રસ્થાપિત થતાં ગુડસ એન્ડ સર્વિસ ટેક્સ ડિપાર્ટમેન્ટે તેમની ધરપકડ કરી હતી. તેમની સામે વધુ તપાસ કરવા માટે પણ તેમની ધરપકડ કરવામાં આવી હોવાનું જણાવવામાં આવી રહ્યું છે.
